ផ្អាកចរាចរណ៍ទាំងស្រុង លើស្ពានបេតុង (ស្ពានដែកភ្លើង) ក្នុងខេត្តកំពង់ស្ពឺ ក្រោយជំនន់ទឹកភ្លៀងហូរច្រោះដី ប៉ះពាល់ដល់សមត្ថភាពទ្រទ្រង់សំណង់ស្ពាន
- កំពង់ស្ពឺ
ខេត្តកំពង់ស្ពឺ ៖ ដោយជំនន់ទឹកភ្លៀងហូរច្រោះដីនៅក្បាលស្ពានសងខាង រហូតដល់សរសរគ្រឹះ ដែលអាចប៉ះពាល់ដល់ ស្ថេរភាព និងសមត្ថភាពទ្រទ្រង់របស់សំណង់ស្ពាន។ នៅថ្ងៃទី២១ ខែតុលា ឆ្នាំ២០២៦នេះ មន្ទីរសាធារណការ និងដឹកជញ្ជូនខេត្តកំពង់ស្ពឺ បាន ជូនដំណឹងការផ្អាកចរាចរណ៍ទាំងស្រុងចំពោះយានយន្តគ្រប់ប្រភេទ លើស្ពានបេតុង (ស្ពានដែកភ្លើង)លើកំណាត់ផ្លូវ១៤១ ត្រង់គីឡូម៉ែត្រ០៣-២០០ ស្ថិតនៅក្នុង ភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ។
យោងតាមសេចក្តីជូនដំណឹងស្តីពីការផ្អាកចរាចរណ៍ទាំងស្រុងចំពោះយានយន្តគ្រប់ប្រភេទ លើស្ពានបេតុង (ស្ពានដែកភ្លើង)លើកំណាត់ផ្លូវខេត្តលេខ១៤១ ត្រង់គីឡូម៉ែត្រលេខ០៣-២០០ ស្ថិតនៅក្នុង ភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។
មន្ទីរសាធារណការ និងដឹកជញ្ជូនខេត្តកំពង់ស្ពឺ មានកិត្តិយសសូមជម្រាបជូនដំណឹងដល់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា និងបងប្អូនប្រជាពលរដ្ឋ ទាំងអស់ មេត្តាជ្រាបថា ស្ពានបេតុង (ស្ពានដែកភ្លើង) លើកំណាត់ផ្លូវខេត្តលេខ១៤១ ត្រង់គីឡូម៉ែត្រ៣-២០០ ត្រង់គីឡូម៉ែត្រ៣+២ មានប្រវែង១២ម៉ែត្រ ទទឹង៤ម៉ែត្រ ស្ថិតនៅក្នុងភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ បានទទួលរងខូចខាត ដោយជំនន់ទឹកភ្លៀងហូរច្រោះដីនៅក្បាលស្ពានសងខាង រហូតដល់សរសរគ្រឹះ ដែលអាចប៉ះពាល់ដល់ ស្ថេរភាព និងសមត្ថភាពទ្រទ្រង់របស់សំណង់ស្ពាន។ ដើម្បីបង្ការគ្រោះថ្នាក់ដែលអាចកើតមានជាយថាហេតុ និងការពារអាយុជីវិតអ្នកដំណើរ ក៏ដូចជាទ្រព្យសម្បត្តិសាធារណៈ មន្ទីរសាធារណការ និងដឹកជញ្ជូនខេត្តកំពង់ស្ពឺ សូមគោរពស្នើសុំការអនុញ្ញាតបិទចរាចរណ៍ទាំងស្រុងចំពោះយានយន្តគ្រប់ប្រភេទជាបណ្តោះអាសន្ន រហូតដល់ មានការត្រួតពិនិត្យ និងវាយតម្លៃសុវត្ថិភាពសំណង់ស្ពានដោយមន្ត្រីជំនាញ ព្រមទាំងមានដំណោះស្រាយ បច្ចេកទេសសមស្រប ដើម្បីធានាស្ពានអាចប្រើប្រាស់បានដោយសុវត្ថិភាព។
ដូចនេះដើម្បីសម្រួលការកកស្ទះចរារណ៍ និងបង្ការការកើតមានគ្រោះថ្នាក់ណាមួយជាយថាហេតុ មន្ទីរសាធារណការ និងដឹកជញ្ជូនខេត្តកំពង់ស្ពឺ សូមគោរពណែនាំ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា និងបងប្អូនប្រជាពលរដ្ឋ ទាំងអស់ដែលមានបំណងឆ្លងកាត់ផ្លូវនេះដូចខាងក្រោម ៖
១- ករណីយានយន្តមកពីផ្លូវជាតិលេខ៤ សូមប្តូរទៅផ្លូវជាតិលេខ៤១ (ស្តុបថ្នល់ទទឹង)
២- ករណីយានយន្តមកពីផ្លូវខេត្តលេខ១៣០ សូមប្តូរទៅផ្លូវជាតិលេខ៤១ (វត្តអង្គមេត្រី)។
អាស្រ័យដូចបានគោរពជម្រាបជូនខាងលើ សូម ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា និងបងប្អូនប្រជាពលរដ្ឋ ទាំងអស់ជ្រាបជាព័ត៌មាន មេត្តាយោគយល់ អធ្យាស្រ័យ និង ចូលរួមសហការដោយក្ដីអនុគ្រោះ៕
ចែករំលែកព័តមាននេះ