រាជធានីភ្នំពេញ ៖ ជនសង្ស័យម្នាក់ បានជិះកង់កញ្ចាស់ ១គ្រឿង ទៅធ្វើសកម្មភាពលួចយកកង់ថ្មី ១គ្រឿងទៀត តម្លៃជាង ១ពាន់ដុល្លារ ប៉ះចំម្ចាស់ជាមន្ត្រីនគរបាល ទុកនៅមុខផ្ទះ ត្រៀមជិះចេញហាត់ប្រាណ។ ក្រោយពេលលួចបានសម្រេច ក៏ទុកកង់កញ្ចាស់របស់ខ្លួនចោលនៅកន្លែងកើតហេតុ រួចជិះកង់ ដែលលួចបានគេចខ្លួន ប៉ុន្តែមិនអាចរត់រួចឡើយ ដោយត្រូវមន្ត្រីនគរបាល ដែលជាម្ចាស់កង់ខាងលើ តាមរកឃើញ ហើយក៏ឃាត់ខ្លួនតែម្ដង ។
ហេតុការណ៍នោះបានកើតឡើងនៅវេលាម៉ោង៤និង៣០នាទីល្ងាច ថ្ងៃទី២១ ខែតុលា ឆ្នាំ២០២៦ នៅក្នុងបុរីផុនស៊ុយ ស្ថិតនៅក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើឈ្មោះ គា សុធី ភេទប្រុស អាយុ២២ឆ្នាំ មានទីលំនៅភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ ដោយឡែកបុរស ដែលជាម្ចាស់កង់ឈ្មោះសុង សៅ អាយុ៣៦ឆ្នាំ មុខរបរជាមន្ត្រីនគរបាល មានទីលំនៅក្នុងភូមិកើតហេតុខាងលើ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ មន្ត្រីនគរបាលខាងលើ បានអូសកង់ ១គ្រឿង ដែលគាត់ទិញក្នុងតម្លៃជាង១ពាន់ដុល្លារ ចេញពីក្នុងផ្ទះទៅទុកនៅមុខផ្ទះ ដើម្បីជិះហាត់ប្រាណ។ បន្ទាប់មកគាត់ក៏បានអូសម៉ូតូ ១គ្រឿង ទៅទុកក្នុងផ្ទះសិន ក៏ស្រាប់តែជនសង្ស័យឈ្មោះ គា សុធី នោះបានជិះកង់កញ្ចាស់ ១គ្រឿង ទៅលួចយកកង់របស់គាត់ រួចជិះគេចខ្លួនបាត់ដោយបន្សល់ទុកកង់កញ្ចាស់របស់ខ្លួននៅចំណុចកើតហេតុនោះ ។
សមត្ថកិច្ច បានប្រាប់ឲ្យដឹងបន្តទៀតថា ក្រោយពេលទុកម៉ូតូនៅក្នុងផ្ទះរួចរាល់ មន្ត្រីនគរបាលរូបនោះ បានចេញមកយកកង់ ដើម្បីជិះហាត់ប្រាណ ស្រាប់តែបាត់មិនឃើញ គាត់ក៏ជិះម៉ូតូតាមស្វែងរកកង់។ លុះពេលទៅដល់មហាវិថីចោមចៅ (ផ្លូវវ៉េងស្រេង) ត្រង់ចំណុចមុខវត្តគោកបញ្ជាន់ ភូមិចោមចៅ សង្កាត់ចោមចៅទី២ ខណ្ឌពោធិ៍សែនជ័យ ស្រាប់តែប្រទះឃើញជនសង្ស័យកំពុងជិះកង់របស់គាត់ ក៏ឃាត់ខ្លួនតែម្ដង ។
សមត្ថកិច្ច បានបញ្ជាក់ប្រាប់ឲ្យដឹងបន្ថែមទៀតថា ខណៈនោះបានដកហូតកង់បានមកវិញ បន្ទាប់មកមន្ត្រីនគរបាល ដែលជាម្ចាស់កង់ខាងលើ បានប្រគល់ជនសង្ស័យរូបនេះ ទៅឲ្យនគរបាលប៉ុស្តិ៍ចោមចៅទី២ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីសួរនាំនិងចាត់ការតាមច្បាប់ ៕
ចែករំលែកព័តមាននេះ