រាជធានីភ្នំពេញ ៖ ជនជាតិចិនម្នាក់ បានលោតសម្លាប់ខ្លួនពីបន្ទប់ជាន់ទី៩ នៃអាគារខុនដូរ ស្តារ ស៊ីធី (Star City) បណ្ដាលឲ្យបោកក្បាលស្លាប់នៅនឹងកន្លែងបន្ទាប់ពីមិត្តភក្តិមកលេងហើយចាកចេញទៅ ។
ការធ្វើអត្តឃាតនេះ បានកើតឡើងនៅវេលាម៉ោង០៦ព្រឹកថ្ងៃទី២១ ខែតុលា ឆ្នាំ២០២៦ នៅចំណុចបន្ទប់លេខ៩៦៥ ជាន់ទី៩ អាគារខុនដូរ Star City តាមផ្លូវសហព័ន្ធរុស្ស៊ី ក្បែរស្ថានអាកាស់ផ្សារដីហុយ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
ជនរងគ្រោះ ដែលបានស្លាប់បាត់បង់ជីវិត ឈ្មោះ He Dechang ភេទប្រុសអាយុ២៦ឆ្នាំ ជាជនជាតិចិន កាន់លិខិតឆ្លងដែន ស្នាក់នៅបន្ទប់កើតហេតុខាងលើ ។
តាមសន្តិសុខបានឱ្យសមត្ថកិច្ចដឹងថា នៅព្រឹកនោះ គាត់បានឮសូរសំឡេងលាន់ឌឹប ក៏ដើររកមើល ស្រាប់តែឃើញសាកសពជនរងគ្រោះ ធ្លាក់ពីលើមកស្លាប់បាត់បង់ជីវិត រួចក៏រាយការណ៍ប្រាប់សមត្ថកិច្ចមូលដ្ឋាន បង្កឲ្យមានការភ្ញាក់ផ្អើលតែម្ដង ។
តាមបុគ្គលិកខុនដូរ បានឲ្យសមត្ថកិច្ចដឹងថា ជនជាតិចិនរូបនោះ បានមកជួលបន្ទប់ស្នាក់នៅតាំងពីខែមីនា ឆ្នាំ២០២៦ មិនដឹងមូលហេតុអ្វីនោះទេ ស្រាប់តែជនជាតិចិនរូបនោះ បានលោតសម្លាប់ខ្លួនពីបន្ទប់របស់ខ្លួន ហើយស្លាប់បាត់បង់ជីវិត។ បន្ទាប់ពីភ្ញាក់ផ្អើល នគរបាលជំនាញ និងនគរបាលមូលដ្ឋាន ក៏បានចុះទៅត្រួតពិនិត្យកន្លែងកើតហេតុ និងសាកសព ។
តាមកាមេរ៉ាសុវត្ថិភាព នៅវេលាម៉ោង០៥ និង០៩នាទី ថ្ងៃទី២១ ខែតុលា ឆ្នាំ២០២៦ គេជនរងគ្រោះបានធ្វើដំណើរត្រឡប់មកពីខាងក្រៅ ជាមួយមិត្តភក្កិប្រុសម្នាក់ ហើយបានដើរចូលទៅក្នុងជណ្ដើរយន្តឡើងទៅជាន់ទី៩ ចូលទៅក្នុងបន្ទប់របស់ខ្លួន។ នៅវេលាម៉ោង០៥និង២៥នាទី គឺប៉ុន្មាននាទីក្រោយមកមិត្តភក្តិ ធ្វើដំណើរត្រឡប់ទៅវិញ តែម្នាក់ឯង ស្រាប់តែនៅវេលាម៉ោង០៦ និង០២នាទីព្រឹក ជនរងគ្រោះបានធ្លាក់ពីលើអគារមកក្រោម បណ្ដាលឲ្យបោកក្បាលស្លាប់បាត់បង់ជីវិត ។
នៅក្នុងបន្ទប់ជនរងគ្រោះ សមត្ថកិច្ចរកឃើញម្សៅស ព្រមទាំងសម្ភារៈមួយចំនួន ដែលសង្ស័យថា ជនរងគ្រោះបានប្រើប្រាស់គ្រឿងញៀន ។
តាមការពិនិត្យទឹកនោម សាកសពវិជ្ជមានសារធាតុញៀន ប្រភេទមេតំហ្វេតាមីន ផងដែរ។ បន្ទាប់ពីមានការត្រួតពិនិត្យ កន្លែងកើតហេតុ សាកសព លោកវេជ្ជបណ្ឌិត ជាង រ៉េន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា ជនជាតិចិនរូបនោះ ស្លាប់ដោយប៉ះទង្គិចក្បាល និងខ្លួនប្រាណធ្ងន់ធ្ងរ គឺធ្វើអត្តឃាតលោតចេញពីបន្ទប់ជាន់ទី៩។ សព ត្រូវបានសមត្ថកិច្ចបញ្ជូនទៅតម្កល់ទុកនៅវត្តស្ទឹងមានជ័យ ដើម្បីរង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ