រាជធានីភ្នំពេញ ៖ នៅក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី១៣ សីហា ឆ្នាំ២០១១ មានបើកកិច្ចប្រជុំដើម្បីផ្សព្វផ្សាយអំពីលទ្ធផលមហាសន្និបាត វិសាមញ្ញរបស់សមាគមនារីកម្ពុជាដើម្បីសន្តិភាពនិងអភិវឌ្ឍន៍ និងប្រកាសសមាសភាពគណៈកម្មការសាខា ក្រោមអធិបតីភាពលោកអ៊ុច បូររិទ្ធ រដ្ឋលេខាធិការ
រាជធានីភ្នំពេញ ៖ នៅក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី១៣ សីហា ឆ្នាំ២០១១ មានបើកកិច្ចប្រជុំដើម្បីផ្សព្វផ្សាយអំពីលទ្ធផលមហាសន្និបាតវិសាមញ្ញរបស់សមាគមនារីកម្ពុជាដើម្បីសន្តិភាពនិងអភិវឌ្ឍន៍ និងប្រកាសសមាសភាពគណៈកម្មការសាខា ក្រោមអធិបតីភាពលោកអ៊ុច បូររិទ្ធ រដ្ឋលេខាធិការ និងជាអនុប្រធានគណៈកម្មាធិការបក្សប្រជាជនកម្ពុជាក្រសួងការបរទេស និងសហប្រតិបត្តិការអន្តរជាតិ ។
ក្នុងបទឧទ្ទេសនាមរបស់លោកជំទាវស៊ុន សាភឿន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានលើកមកបញ្ជាក់អំពីចំណុចសំខាន់ៗ និងទិសដៅរបស់សមាគមនារីកម្ពុជាដើម្បីសន្តិភាពនិងអភិវឌ្ឍន៍ដែលជាទស្សនវិស័យគឺប្រាថ្នាឱ្យប្រជាជនកម្ពុជារស់នៅក្នុងសង្គមមួយប្រកបដោយសុភមង្គល យុត្តិធម៌ សន្តិភាព ការអភិវឌ្ឍ និងគោរពសិទ្ធិស្មើភាពរវាងបុរស និងស្ត្រី ។
ក្នុងសកម្មភាពសង្គមនិងមនុស្សធម៌ លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកិត្តិយសនៃសមាគមនារីកម្ពុជា ដើម្បីសន្តិភាព និងអភិវឌ្ឍន៍ ជាកុលធីតាដ៏ឆ្នើម ជានិច្ចកាលបាននិងកំពុងបំពេញការងារយ៉ាងមមាញឹកប្រកបដោយបញ្ញាញាណភ្លឺថ្លា គតិបណ្ឌិត និងប្រកបដោយទឹកចិត្តសប្បុរសធម៌បំផុតក្នុងការជួយសង្គ្រោះជនទីទ័លក្រ ជនរងគ្រោះ មានទុក្ខលំបាក ។ លោកជំទាវតែងយកចិត្តទុកដាក់គិតគូរពីសុខទុក្ខ និងជីវភាពរបស់គ្រួសារយុទ្ធជនពលីពិការ អ្នកផ្ទុកមេរោគអេដស៍និងក្រុមគ្រួសារដោយសាងសង់លំនៅឋាន និងឧបត្ថម្ភថវិកា ព្រមទាំងសម្ភារប្រើប្រាស់ដែលត្រូវចំណាយថវិកាយ៉ាងច្រើនសន្ធឹកសន្ធាប់ដើម្បីធ្វើឱ្យពួកគេរស់នៅក្នុងស្ថានភាពសមរម្យ ។
លោកជំទាវកិត្តិព្រឹទ្ធបណ្ឌិត បានចុះសាកសួរសុខទុក្ខយុទ្ធជនជួរមុខទាំងជើងគោក ទាំងជើងទឹក ដែលកំពុងការពារបូរណភាពទឹកដីយ៉ាងស្វិតស្វាញ ។ លោកជំទាវបានធ្វើជាគំរូក្នុងការលើកកម្ពស់សីលធម៌សង្គម ថែរក្សាទំនៀមទម្លាប់ ប្រពៃណីវប្បធម៌ សាសនារបស់ជាតិ និងជំរុញចលនាកែលំអសង្គមដើម្បីកាត់បន្ថយភាពអសកម្មដែលកំពុងតែកើតមានទាំងអំពើហិង្សាក្នុងគ្រួសារ ការជួញដូរស្ត្រី និងកុមារ ការសេពគ្រឿងញៀន និងពេស្យាចារ ដែលកំពុងតែជះឥទ្ធិពលមិនល្អដល់ការរីកចម្រើន សុវត្ថិភាព និងសេចក្តីថ្លៃថ្នូររបស់ស្ត្រី និងកុមារ ។
លោកជំទាវស៊ុន សាភឿន មានប្រសាសន៍ទៀតថា សមាគមនារីកម្ពុជាដើម្បីសន្តិភាពនិងអភិវឌ្ឍន៍មានមោទនភាព និងភ័ព្វសំណាងណាស់ ដោយមានសម្តេចទាំងបីជាប្រមុខដឹកនាំប្រកបដោយបញ្ញាញាណ គតិបណ្ឌិត គុណធម៌ ជាកម្លាំងចលករ ជាគំរូល្អសម្រាប់បងប្អូននារីគ្រប់រូប មានកម្មវិធីនយោបាយ និងការដឹកនាំដ៏ត្រឹមត្រូវរបស់គណបក្សប្រជាជនកម្ពុជាជាត្រីវិស័យ មានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីដ៏ឆ្នើមដែលតែងតែយកចិត្តទុកដាក់ លើកតម្កើងនារី លើកកម្ពស់តួនាទីជាងសម័យណាៗទាំងអស់ ។
លោកអ៊ុច បូររិទ្ធ បានសម្តែងនូវការកោតសរសើរតួនាទី និងសកម្មភាពរបស់សមាគមនារីកម្ពុជាដែលបានវិវត្តន៍ និងប្រែប្រួលទៅតាមសភាពការណ៍នយោបាយ ហើយជានិច្ចកាលរក្សាបានយ៉ាងខ្ជាប់ខ្ជួននូវទស្សនវិជ្ជា និងជំហររឹងមាំក្នុងការអនុវត្តតាមគោលនយោបាយរបស់រាជរដ្ឋាភិបាលកម្ពុជា និងក្នុងគោលបំណងសម្រេចឱ្យបាននូវទស្សនវិស័យបេសកកម្ម និងគោលដៅ ។ ទស្សនវិស័យ គឺប្រាថ្នាឱ្យប្រជាជនកម្ពុជា រស់នៅក្នុងសង្គមមួយប្រកបដោយសុភមង្គល សុខភាពល្អ យុត្តិធម៌ សន្តិភាព ការអភិវឌ្ឍ និងគោរពសិទ្ធិស្មើភាពរវាងបុរស និងស្ត្រី ។ លើកកម្ពស់ស្ថានភាពស្ត្រីនៅកម្ពុជាដោយបង្កើនការជឿជាក់ទុកចិត្តលើខ្លួនឯង ដើម្បីក្លាយជាអ្នកដឹកនាំដែលមានភាពម្ចាស់ការ និងមានសិទ្ធិក្នុងការបែងចែក និងទទួលបានដោយសមធម៌ នូវធនធាននិងផលប្រយោជន៍គ្រប់ការចូលរួមយ៉ាងសកម្មក្នុងសកម្មភាពសង្គម វប្បធម៌សេដ្ឋកិច្ច និងនយោបាយចាប់តាំងពីថ្នាក់ជាតិដល់ក្រោមជាតិ និងអន្តរជាតិ ។ ជាមួយនេះ កាត់បន្ថយភាពងាយរងគ្រោះរបស់ស្ត្រី និងកុមារដើម្បីលើកកម្ពស់ស្ថានភាពសុខភាព និងជីវភាពឱ្យកាន់តែប្រសើរឡើង ។
លោករដ្ឋលេខាធិការគូសបញ្ជាក់ថា ចលនានារីបានក្លាយទៅជាកម្លាំងដ៏ស្រួចស្រាល់ និងមានសក្តានុពលដ៏ធំធេងក្នុងការតស៊ូនយោបាយ និងការធ្វើចលនាកៀងគរកម្លាំងគាំទ្រ ធនធាន ថវិកា និងសម្ភារ ដើម្បីសកម្មភាពបម្រើផលប្រយោជន៍ស្ត្រី និងកុមារឱ្យបានល្អ និងដើម្បីរួមចំណែកការពារសមិទ្ធផលដ៏ធំធេងមិនអាចកាត់ថ្លៃបាន ខិតខំពង្រឹងសមត្ថភាពឱ្យមានការប្រែប្រួលរីកចម្រើនគ្រប់វិស័យ ។ ចូលរួមធ្វើសកម្មភាពនយោបាយសង្គម និងអភិវឌ្ឍន៍ ចុះជាប់មូលដ្ឋាន ជួបប្រជាជន និងនារី ព្រមទាំងជួយដោះស្រាយការលំបាករបស់ពួកគាត់តាមមុខសញ្ញារៀងៗខ្លួន ៕
ចែករំលែកព័តមាននេះ