អភិបាលខេត្តតាកែវ ជំរុញការដ្ឋានស្ថាបនាផ្លូវខេត្តលេខ ១TK៨ ឱ្យស្របតាមស្តង់ដាបច្ចេកទេស
- តាកែវ
ខេត្តតាកែវ ៖ នៅថ្ងៃទី១៩ ខែតុលា ឆ្នាំ២០២៦នេះ លោក វី សំណាង អភិបាល នៃគណៈអភិបាល ខេត្តតាកែវ បានអញ្ជើញចុះត្រួតពិនិត្យផ្ទាល់លើកិច្ចដំណើរការស្ថាបនា និងជួសជុល ផ្លូវខេត្តលេខ ១TK៨ ដែលស្ថិតនៅភូមិសាស្ត្រ ឃុំគោកធ្លក ស្រុកអង្គរបូរី ខេត្តតាកែវ ដើម្បីធានាឱ្យការដ្ឋានអនុវត្តបានត្រឹមត្រូវតាមស្ដង់ដារបច្ចេកទេស និងឆាប់រួចរាល់ ឆ្លើយតបទៅនឹងតម្រូវការធ្វើដំណើររបស់បងប្អូនប្រជាពលរដ្ឋ ។
ដោយមានការចូលរួមពីលោកណុប នី ប្រធានមន្ទីរសាធារណ:ការនិងដឹកជញ្ជូនខេត្តតាកែវ ក្នុងការចុះពិនិត្យការដ្ឋាននេះ លោកអភិបាលខេត្ត បានចុះពិនិត្យមើលស្ថានភាពជាក់ស្តែងតាមដងផ្លូវ និងបានសំណេះសំណាលសាកសួរទុក្ខព្រមទាំងស្វែងយល់ពីបញ្ហាប្រឈមនានា ជាមួយក្រុមការងារបច្ចេកទេស ក៏ដូចជាប្រជាពលរដ្ឋមូលដ្ឋាន ដែលរស់នៅអមសងខាងផ្លូវផងដែរ ។
លោក វី សំណាង បានអោយដឹងថា រដ្ឋបាលខេត្តតាកែវ បានយកចិត្តទុកដាក់ខ្ពស់ជានិច្ចចំពោះសុខទុក្ខ និងជីវភាពរស់នៅរបស់ប្រជាពលរដ្ឋ គឺតែងតែខិតខំជំរុញ និងអភិវឌ្ឍន៍ហេដ្ឋារចនាសម្ព័ន្ធរូបវន្តនានា ដូចជាផ្លូវថ្នល់ ស្ពាន និងប្រព័ន្ធប្រហស្តសាស្ត្រជាដើម ព្រោះហេដ្ឋា រចនាសម្ព័ន្ធទាំងនេះ គឺជាសរសៃឈាមសេដ្ឋកិច្ចយ៉ាងសំខាន់ ក្នុងការជួយសម្រួលដល់ការធ្វើដំណើរ ការដឹកជញ្ជូនកសិផល និងទំនិញផ្សេងៗរបស់ប្រជា ពលរដ្ឋឱ្យកាន់តែមានភាពរលូន និងឆាប់រហ័សទាន់ពេលវេលា ។
លោកអភិបាលខេត្ត ក៏បានក្រើនរំលឹកដល់ក្រុមការងារបច្ចេកទេសទាំងអស់ ត្រូវយកចិត្តទុកដាក់ខ្ពស់លើកត្តាគុណភាព ដោយត្រូវអនុវត្តឱ្យបានត្រឹមត្រូវតាមបទដ្ឋានបច្ចេកទេស ដែលបានកំណត់ ដើម្បីធានាឱ្យផ្លូវមួយខ្សែនេះមានភាពធន់រឹងមាំ និងអាចប្រើប្រាស់បានយូរអង្វែង។
លោក អភិបាលខេត្ត ក៏បានស្នើសុំការយោគយល់ និងអធ្យាស្រ័យពីសំណាក់បងប្អូនប្រជាពលរដ្ឋដែលរស់នៅតាមបណ្តោយផ្លូវនេះ ចំពោះការរំខានបន្តិចបន្តួចក្នុងអំឡុងពេលនៃការដ្ឋានកំពុងដំណើរការសាងសង់នាពេលនេះ ៕
ចែករំលែកព័តមាននេះ