រាជធានីភ្នំពេញ ៖ នៅសាលប្រជុំសាលាខណ្ឌដូនពេញមានធ្វើពិធីប្រកាសទទួលស្គាល់ សមាសភាពគណៈកម្មាធិការសមាគមយុវជនសង្កាត់ទាំង១១ ក្នុងខណ្ឌដូនពេញកាលពីរសៀលថ្ងៃទី១២ សីហា ឆ្នាំ២០១១ក្រោមអធិបតីភាពលោកជីវ កេង ប្រធានសាលាដំបូងរាជធានីភ្នំពេញ និងជាអនុប្រធានក្រុមការងារជួយខណ្ឌដូន
រាជធានីភ្នំពេញ ៖ នៅសាលប្រជុំសាលាខណ្ឌដូនពេញមានធ្វើពិធីប្រកាសទទួលស្គាល់ សមាសភាពគណៈកម្មាធិការសមាគមយុវជនសង្កាត់ទាំង១១ ក្នុងខណ្ឌដូនពេញកាលពីរសៀលថ្ងៃទី១២ សីហា ឆ្នាំ២០១១ក្រោមអធិបតីភាពលោកជីវ កេង ប្រធានសាលាដំបូងរាជធានីភ្នំពេញ និងជាអនុប្រធានក្រុមការងារជួយខណ្ឌដូនពេញ លោកផន សូគីម ប្រធានសមាគមយុវជនកម្ពុជារាជធានីភ្នំពេញ លោកសុខ សម្បត្តិប្រធានគណៈកម្មាធិការបក្សខណ្ឌដូនពេញលោកហែម អាន ប្រធានក្រុមប្រឹក្សាខណ្ឌនិងមានការចូលរួមពីសមាជិក សមាជិការគណៈកម្មាធិការសមាគមយុវជនខណ្ឌ និងសង្កាត់ទាំង១១។
លោកសុខ ពេញវុធ ប្រធានគណៈកម្មាធិការសមាគមយុវជនខណ្ឌដូនពេញបានថ្លែងថា ដោយមើលឃើញអំពីសក្តានុពលដែលមិនអាចខ្វះបានចំពោះយុវជននៅក្នុងសកម្មភាពនយោបាយនិងសកម្មភាពអភិវឌ្ឍន៍ប្រទេសជាតិក៏ដូចជាការរួមចំណែកពង្រឹងពង្រីកឥទ្ធិពលប្រជាប្រិយភាពរបស់គណបក្សពិសេសលើកកម្ពស់តួនាទីរបស់យុវជនឱ្យក្លាយទៅជាកម្លាំងស្នូល និងយកចិត្តទុកដាក់ចំពោះការអប់រំចំណេះដឹង ចំណេះធ្វើ និងសីលធម៌ដល់យុវជននោះសមាគមយុវជនកម្ពុជាបានសំរេចរៀបចំបង្កើតគណៈកម្មាធិការសមាគមយុវជនរាជធានី ខណ្ឌ សង្កាត់ ភូមិបន្ថែមទៀត។
ការកសាងនិងពង្រីកកម្លាំងយុវជនដែលជាសសរទ្រូងរបស់ប្រទេសជាតិ ជាសមាសភាពមួយដ៏សំខាន់ដែលនាំឱ្យគណបក្សប្រជាជនកម្ពុជាទទួលបានជោគជ័យក្នុងការបោះឆ្នោតជ្រើសរើសតំណាងរាស្រ្ត និងបោះឆ្នោតជ្រើសរើសក្រុមប្រឹក្សាសង្កាត់នាពេលកន្លងមក។ ដោយឡែកសមាគមយុវជនកម្ពុជាខណ្ឌដូនពេញ ត្រូវបានបង្កើតឡើងដោយអនុលោមតាមលិខិតលេខ០២សរសយកធភ ចុះថ្ងៃទី២៦ មករាឆ្នាំ២០១០ របស់សមាគមយុវជនកម្ពុជារាជធានីភ្នំពេញ។ សមាគមយុវជនកម្ពុជាខណ្ឌដូនពេញមានសមាសភាពចំនួន១១រូប ដែលដឹកនាំដោយប្រធាន១រូប អនុប្រធាន១រូប សមាជិកអចិន្ត្រៃយ៍១រូប និងសមាជិក សមាជិកា ចំនួន៧រូប ក្នុងនោះមានស្រី១រូប។ ទិសដៅអនុវត្តរបស់គណៈកម្មាធិការសមាគមយុវជនកម្ពុជាខណ្ឌដូនពេញ គឺត្រៀមចេញសេចក្តីសម្រេចនិងធ្វើពិធីប្រកាសទទួលស្គាល់សមាសភាពសមាគមយុវជនភូមិទាំង១២៤ភូមិ លើ១៣៤ភូមិ ដែលបានកសាងរួច។
បន្តលើកទឹកចិត្តយុវជនដើម្បីឱ្យចូលរួមប្រកួតប្រជែងជ្រើសរើសវាគ្មិនថ្នាក់ខណ្ឌថ្នាក់រាជធានីក៏ដូចជាថ្នាក់ជាតិ។ បន្តការបណ្តុះបណ្តាលអំពីលក្ខន្តិកៈ គោលនយោបាយគណបក្ស និងសមាគមយុវជនកម្ពុជា ដល់សមាសភាពគណៈកម្មាធិការសមាគមយុវជនសង្កាត់ភូមិ ដែលបានប្រកាសទទួលស្គាល់រួច។ បន្តជំរុញសមាគមយុវជនសង្កាត់ ឱ្យរៀបចំកិច្ចប្រជុំប្រចាំខែធ្វើផែនការការងារប្រចាំខែនិងទិសដៅរបស់ខ្លួនឱ្យបានទៀងទាត់។ បន្តពង្រីកសមាជិកយុវជននៅក្នុងមូលដ្ឋានឱ្យចូលជាសមាជិកនៃសមាគមយុវជនភូមិ-សង្កាត់ ដើម្បីកសាងកម្លាំងយុវជនទាំងនេះចូលជាសមាជិកគណបក្សប្រជាជនកម្ពុជា។ ជំរុញឱ្យទៅចុះឈ្មោះបោះឆ្នោត និងបោះឆ្នោតជូនគណបក្សប្រជាជនកម្ពុជាឱ្យបានគ្រប់គ្នា។ បន្តបំផុសយុវជនឱ្យចូលរួមក្នុងសកម្មភាពសំខាន់ៗក្នុងសង្គម។
តំណាងគណៈកម្មាធិការសមាគមយុវជនកម្ពុជាសង្កាត់ទាំង១១បានឡើងប្តេជ្ញាចិត្តដឹងគុណគណបក្សប្រជាជនកម្ពុជាជារៀងរហូត និងគាំទ្រឥតងាករេចំពោះបេក្ខភាពសម្តេចអគ្គមហាសេនាបតីតេជោហ៊ុន សែន ជានាយករដ្ឋមន្រ្តីសម្រាប់អាណត្តិក្រោយទៀត។ នៅក្នុងឱកាសនោះគណៈអធិបតីបានកោតសរសើរដល់គណៈកម្មាធិការសមាគមយុវជនកម្ពុជាសង្កាត់ទាំង១១ និងសុំឱ្យមានជំនឿជឿជាក់ក្នុងការរួមចំណែកអនុវត្តកម្មវិធីនយោបាយរបស់គណបក្សប្រជាជនកម្ពុជាក៏ដូចជាសមាគមយុវជនកម្ពុជា។
លោកជីវ កេង ប្រធានសាលាដំបូងរាជធានីភ្នំពេញនិងជាអនុប្រធានក្រុមការងារចុះជួយខណ្ឌដូនពេញ បានឧបត្ថម្ភថវិកាចំនួន១.២៥០ដុល្លារ ដល់សមាគមយុវជន ខណ្ឌដូនពេញក្នុងការរៀបចំកម្មវិធីខាងលើ៕
ចែករំលែកព័តមាននេះ