អាសូរណាស់! និស្សិតពេទ្យ១រូប ជួបគ្រោះអកុសល តាមបណ្តោយផ្លូវសហព័ន្ធរុស្ស៊ី
- ភ្នំពេញ
រាជធានីភ្នំពេញ ៖ និស្សិតពេទ្យម្នាក់បានស្លាប់ភ្លាមៗនៅនិងកន្លែងកើតហេតុ ខណៈពេលជិះម៉ូតូមួយគ្រឿងត្រូវរថយន្តដឹកជញ្ជូនសម្ភាររបស់ក្រុមហ៊ុន វិរៈប៊ុនថាំ បុកពីក្រោយយ៉ាងពេញទំហឹង កៀបជាប់ពីមុខអូសជាច្រើនម៉ែត្រ ភ្លាមៗនោះត្រូវបានប្រជាពលរដ្ឋនាំគ្នាដេញតាមចាប់បានអ្នកបើកបររត់គេចខ្លួនបាត់ស្រមោល។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោ៤ទៀបភ្លឺឈានចូលថ្ងៃទី ១៨ ខែតុលា ឆ្នាំ២០២៦ ស្ថិតតាមបណ្តោយមហាវិថីសហព័ន្ធរុស្សី ត្រង់ចំណុចមុខសាលាសង្កាត់កាកាបទី១ ភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
សពរងគ្រោះឈ្មោះ កា ប៊ីឡា ភេទប្រុស អាយុ ២៥ ឆ្នាំជានិស្សិតពេទ្យផ្នែកវេជ្ជបណ្ឌិតទូទៅ ជំនាន់ទី១២ឆ្នាំទី៦ ស្រុកកំណើតភូមិបារាជ ឃុំកំពង់លាវ ស្រុកកំពង់លាវ ខេត្តព្រៃវែង ។ ជនរងគ្រោះជិះម៉ូតូមួយគ្រឿងម៉ាកហុងដា PCX ពណ៍ខ្មៅ។
តាមប្រភពព័ត៌មានបានអោយដឹងថា នៅមុនពេលកើតហេតុ គេបានឃើញជនរងគ្រោះជិះម៉ូតូមួយគ្រឿងម៉ាកហុងដាPCXពណ៍ខ្មៅ ធ្វើដំណើរតាមបណ្តោយផ្លូវមហាវិថីសហព័ន្ធរុស្សី ក្នុងទិសដៅពីលិចទៅកើត លុះទៅដល់ត្រង់ចំណុចកើតហេតុ ស្រាប់តែមានរថយន្តមួយគ្រឿង ពណ៍ទឹកក្រូច ពាក់ស្លាកលេខ ភ្នំពេញ 3J-5552 ជារថយន្តរបស់ក្រុមហ៊ុនវិរៈប៊ុនថាំ ធ្វើដំណើស្របគ្នាមកពីក្រោយក្នុងល្បឿនយ៉ាងលឿនក៏ជ្រុលទៅបុកម៉ូតូជនរងគ្រោះពីក្រោយយ៉ាងពេញទំហឹង បណ្តាលអោយខ្ទាតជនរងគ្រោះបោកទៅលើផ្ទាំងកញ្ចក់ខាងមុខរថយន្តហើយជនរងគ្រោះធ្លាក់បោកទៅនិងថ្នល់ស្លាប់ភ្លាមៗនៅនឹងកន្លែងកើតហេតុ។
ប្រភពបានបន្តទៀតថា បន្ទាប់មកម៉ូតូកៀបជាប់ពីមុខរថយន្ត ហើយអ្នកបើកបរមិនព្រមឈប់រថយន្តនោះទេ ថែមទាំងបន្ថែមល្បឿនទៅមុខអូសម៉ូតូកៀបជាប់ទៅមុខប្រហែល៥០០ម៉ែត្រ ត្រូវបានប្រជាពលរដ្ឋនាំគ្នាដេញចាប់បាន ក្រោយមកអ្នកបើកបរបើកទ្វាររត់គេចខ្លួនបាត់ស្រមោល។
ក្រោយពេលកើតហេតុ កម្លាំងការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ។ បានចុះធ្វើការវាស់វែង រួចនាំយករថយន្តនិងម៉ូតូ ទៅរក្សាទុក រង់ចាំធ្វើការដោះស្រាយនៅពេលក្រោយទៀត ។ ចំណែកសពជនរងគ្រោះត្រូវបានសមត្ថកិច្ចប្រគល់ទៅអោយក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ