ឆ្នាំនេះ បុណ្យកឋិនទានចាប់ផ្តើមប្រព្រឹត្តទៅនៅថ្ងៃអង្គារ៍ ១រោច ខែអស្សុជ ដល់ថ្ងៃអង្គារ៍ ១៥កើត ខែកត្តិក ឆ្នាំមមី ឆស័ក ព.ស.២៥៧០ ត្រូវនឹងថ្ងៃទី២៧ ខែតុលា ដល់ថ្ងៃទី២៤ ខែវិច្ឆិកា ឆ្នាំ២០២៦ ។
មកដល់ពេលនេះ សំបុត្របុណ្យនេះ បានកំពុងតែបោះពុម្ភ និងចែកចាយជាបន្តបន្ទាប់ហើយ សូមត្រៀមបច្ច័យ និងទេយ្យវត្ថុផ្សេងៗ ដើម្បីដង្ហែរទៅវេរប្រគេនព្រះសង្ឃ ដែលកំពុងគង់ចាំព្រះវស្សា នៅតាមវត្តអារាមនានានៅទូទាំងប្រទេស ។
កឋិនទាន គឺជាបុណ្យប្រពៃណីព្រះពុទ្ធសាសនាដែលមានសម្តែងទុកក្នុងព្រះវិន័យបិដក មហាវគ្គ កឋិនក្ខន្ធកៈ ជាបុណ្យដែលមានលក្ខណៈប្លែកពីបុណ្យដទៃ ។ បុណ្យនេះ ត្រូវបានប្រារព្ធឡើងក្នុងគោលបំណងបង្កើនសាមគ្គីភាពរវាងបុគ្គល គ្រួសារ និងសង្គម, ទ្រទ្រង់ព្រះពុទ្ធសាសនាឱ្យបានចំរើនរុងរឿងគង់វង្សស្ថិតស្ថេរនៅយូរអង្វែង,ផ្តល់កម្លាំងកាយ ចិត្តដល់ព្រះភិក្ខុសង្ឃ បុគ្គលជាសាសនទាយាទបន្តអាយុព្រះពុទ្ធសាសនាតទៅ,ដើម្បីបានថ្វាយឧបការៈ ទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ និងដើម្បីកុំឱ្យកើតសេចក្តីប្រមាថចំពោះមហាកុសលរបស់ខ្លួន ។
នៅកម្ពុជាព្រះពុទ្ធសាសនានាជាសាសនារបស់រដ្ឋ ហើយកម្ពុជាមានវត្តសរុបជាង៥ពាន់ ជាមួយនឹងព្រះសង្ឃជាង៧ម៉ឺនអង្គ ៕
ចែករំលែកព័តមាននេះ