មន្ត្រីជលផលខេត្តព្រៃវែង ចុះបង្ក្រាបបទល្មើសនេសាទនៅស្រុកពាមរក៍ រុះរើលូស្បៃមុង ១៩ មាត់ និងលែងកូនត្រីចំរុះជាង ៤០ គីឡូចូលបឹងធម្មជាតិវិញ
- ព្រៃវែង
ខេត្តព្រៃវែង ៖ មន្ត្រីខណ្ឌរដ្ឋបាលជលផលខេត្តព្រៃវែង សហការជាមួយសហគមន៍នេសាទ និងរដ្ឋបាលស្រុកពាមរក៍ បានចុះស្រាវជ្រាវ ត្រួតពិនិត្យ ទប់ស្កាត់ និងបង្ក្រាបបទល្មើសជលផលខុសច្បាប់ ក្នុងភូមិសាស្ត្រឃុំបាបោង ស្រុកពាមរក៍ ដោយរុះរើឧបករណ៍នេសាទស្បៃមុងខុសច្បាប់ជាច្រើនខ្សែ និងចាក់លែងកូនត្រីចម្រុះទម្ងន់ជាង ៤០ គីឡូក្រាម ចូលទៅក្នុងដែនទឹកធម្មជាតិវិញ។
ប្រតិបត្តិការនេះធ្វើឡើងនៅថ្ងៃទី១៧ តុលា ក្រោមការដឹកនាំរបស់លោក ហ៊ុន សាវី នាយរងផ្នែករដ្ឋបាលជលផលស្ទឹងស្លូត ដោយមានការចូលរួមពីមន្ត្រីក្រោមឱវាទ និងសហគមន៍នេសាទបាបោង សរុបចំនួន ១០ នាក់ ប្រើប្រាស់កាណូតចំនួន ២ គ្រឿង។
ការចុះប្រតិបត្តិការនេះ មានគោលបំណងទប់ស្កាត់ និងបង្ក្រាបសកម្មភាពនេសាទខុសច្បាប់ ព្រមទាំងចូលរួមការពារ និងអភិរក្សធនធានជលផលក្នុងតំបន់ឱ្យមាននិរន្តរភាព ជាពិសេសការពារកូនត្រី និងធនធានជលផលសម្រាប់ការបន្តពូជ និងការរីកលូតលាស់តាមបែបធម្មជាតិ។
ជាលទ្ធផល កម្លាំងចម្រុះបានរកឃើញ និងបង្ក្រាបបទល្មើសនេសាទចំនួន ១ ករណី ពាក់ព័ន្ធនឹងការប្រើប្រាស់ឧបករណ៍នេសាទស្បៃមុងខុសច្បាប់ ដោយបានរុះរើ និងបំផ្លាញចោលនៅនឹងកន្លែង រួមមាន លូស្បៃមុងចំនួន ១៩ មាត់ របាំងព្រួលស្បៃមុងប្រវែង ១.២០០ ម៉ែត្រ និងបង្គោលចម្រឹងចំនួន ៧៨០ ដើម។ ជាមួយគ្នានេះ កម្លាំងជំនាញបានចាក់លែងកូនត្រីចម្រុះទម្ងន់ជាង ៤០ គីឡូក្រាម ចូលទៅក្នុងដែនទឹកធម្មជាតិវិញ ដើម្បីបន្តការលូតលាស់ និងបង្កើនធនធានត្រីក្នុងតំបន់។
ខណ្ឌរដ្ឋបាលជលផលខេត្តព្រៃវែង បានបញ្ជាក់ពីការប្តេជ្ញាចិត្តបន្តចុះល្បាត ត្រួតពិនិត្យ និងបង្ក្រាបបទល្មើសជលផលខុសច្បាប់ជាប្រចាំក្នុងដែនសមត្ថកិច្ចរបស់ខ្លួន ដោយអនុវត្តតាមច្បាប់ និងវិធានការជំនាញយ៉ាងម៉ឺងម៉ាត់ ដើម្បីទប់ស្កាត់ការបំផ្លាញធនធានធម្មជាតិ និងធានានូវនិរន្តរភាពធនធានជលផលសម្រាប់ប្រជាពលរដ្ឋ និងកូនចៅជំនាន់ក្រោយ៕
ចែករំលែកព័តមាននេះ