ខេត្តព្រះវិហារ ៖ នៅព្រឹកថ្ងៃទី១៣ សីហា លោកអ៊ុំ ម៉ារ៉ា អភិបាលខេត្ត បានដឹកនាំមន្ត្រីរាជការគ្រប់លំដាប់ថ្នាក់ និងស្ថាប័នជុំវិញខេត្ត កងកម្លាំង ប្រដាប់អាវុធទាំងបីប្រភេទ សរុប២៦៤នាក់ ចុះជួយស្ទូងស្រូវប្រជាកសិករជាស្ត្រីមេម៉ាយគ្មានទីពឹងម្នាក់ឈ្មោះស៊ឹម សឿង អាយុ៦៥ឆ្នាំ ដែលជួបការលំបាករស់នៅភូមិដាន ឃុំថ្មី ស្រុកគូលែន ។ ការចុះជួយដកស្ទូងប្រជាកសិករដែលជួបការលំបាកនាព្រឹកនោះ រៀបចំឡើងដោយលោកពឹង ទ្រីដា ប្រធានមន្ទីរកសិកម្មខេត្ត នៅលើផ្ទៃដីប្រមាណ១,៨០ហិកតា និងជ្រើសរើសយកពូជស្រូវផ្ការំដួលមកស្ទូង។
លោកអភិបាលខេត្ដបានមានប្រសាសន៍ថា ការចុះជួយដកស្ទូងប្រជាកសិករដែលជួបការលំបាកនេះ គឺជាការអនុវត្ដតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំនៃរាជរដ្ឋាភិបាលកម្ពុជា ដែលជានិច្ចកាលសម្ដេចតែងតែទទូចសុំឱ្យមន្ដ្រីរាជការ កងកម្លាំងប្រដាប់អាវុធទាំងអស់ឆ្លៀតពេលថ្ងៃសម្រាកពីការងារក្នុងរដូវវស្សា ត្រូវតែចុះជួយដកស្ទូងនិងច្រូតកាត់ជូនដល់ប្រជាកសិករដែលជួបការលំបាកខ្វះកម្លាំងពលកម្មឱ្យទាន់រដូវ ដើម្បីឱ្យពួកគាត់មានលទ្ធភាពក្នុងការទទួលផលសម្រាប់ផ្គត់ផ្គង់ជីវភាពក្នុងគ្រួសារ ដូចគេឯងដទៃទៀតដែរ។ លោកអភិបាលខេត្ដបានបញ្ជាក់់ថា ការចុះជួយដកស្ទូងនិងច្រូតកាត់ជូនដល់ប្រជាកសិករនាពេលនេះ គឺជាទម្លាប់របស់អាជ្ញាធរខេត្ដ ក៏ដូចជាគណបក្សប្រជាជនដែលជារៀងរាល់ឆ្នាំ តែងតែចុះជួយប្រជាពលរដ្ឋជួបការលំបាកជាច្រើនកន្លែង។
នៅក្នុងឱកាសចុះជួយដកស្ទូងប្រជាកសិករនាព្រឹកនោះ អាជ្ញាធរខេត្ដបាននាំយកអំណោយសម្ដេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ទៅចែកជូនប្រជាកសិករក្នុងភូមិដានចំនួន៥០គ្រួសារ ក្នុងមួយគ្រួសារៗទទួលបានអាវយឺត១ មួក១ និងសារុង១។ ដោយឡែកមន្ទីរកសិកម្មខេត្ដក៏បាននាំយកពូជបន្លែទៅផ្ដល់ជូនប្រជាកសិករចំនួន៥០គ្រួសារដែរ ដែលមួយគ្រួសារៗទទួលបានពូជបន្លែចំនួន៥មុខ ៕
ចែករំលែកព័តមាននេះ