អាសូរណាស់! យុវជនម្នាក់ជិតដល់ថ្ងៃចូលរោងការ ស្រាប់តែជួបគ្រោះអកុសលតាមផ្លូវ
- ភ្នំពេញ
រាជធានីភ្នំពេញ ៖ យុវជនម្នាក់នឹងត្រូវចូលរោងការនៅខែ១២ខាងមុខនេះ ស្រាប់តែជួបគ្រោះអកុសលបានស្លាប់ភ្លាមៗនៅនឹងកន្លែងកើតហេតុ ខណៈពេលជិះម៉ូតូមួយគ្រឿងបុកជាមួយម៉ូតូមួយគ្រឿងទៀតក្នុងទិសដៅបញ្ច្រាសគ្នា ចំណែកភាគីម្ខាងទៀតរងរបួសធ្ងន់ ។
ហេតុការណ៍ខាងលើនេះបានកើតឡើងកាលពីវេលាម៉ោង៧ និង៤០នាទីយប់ថ្ងៃទី ១៧ ខែតុលា ឆ្នាំ២០២៦ ស្ថិតតាមបណ្តោយផ្លូវបេតុងក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលស្លាប់ឈ្មោះ ស៊ុន វិសាល ភេទប្រុស អាយុ២២ឆ្នាំ ស្នាក់នៅបន្ទប់ជួល សង្កាត់ស្ទឹងមាន១ ខណ្ឌមានជ័យ រាជធានីភ្នំពេញ មានស្រុកកំណើតនៅស្រុកមេសាង ខេត្តព្រៃវែង ទើបតែភ្ជាប់ពាក្យបាន៤ខែ និងត្រៀមចូលរោងការនៅខែ១២ខាងមុខនេះ។ ចំណែកឯភាគីម្ខាងទៀតដែលរងរបួសធ្ងន់ មិនបានស្គាល់អត្តសញ្ញាណនោះឡើយ ត្រូវបានដឹកទៅសង្គ្រោះនៅមន្ទីរពេទ្យ។
តាមប្រភពព័ត៌មានបានអោយដឹងថា នៅមុនពេលកើតហេតុ គេបានឃើញជនរងគ្រោះ (យុវជនដែលស្លាប់) ជិះម៉ូតូមួយគ្រឿងម៉ាកហុងដាឌ្រីម ពណ៍ក្រហម ពាក់ស្លាកលេខ ភ្នំពេញ 1IS-0856 ជិះតែម្នាក់ឯង ធ្វើដំណើរតាមបណ្តោយផ្លូវបេតុ ក្នុងទិសដៅពីលិចទៅកើត លុះទៅដល់ត្រង់ចំណុចកើតហេតុ បានវ៉ាជែងខាងឆ្វេងម៉ូតូមួយគ្រឿង ដែលកំពុងធ្វើដំណើតស្របទិសដៅគ្នា ក៏បានជ្រុលទៅបុកជាមួយម៉ូតូមួយគ្រឿងទៀតម៉ាកហុងដាឌ្រីម ពណ៍ខ្មៅ ពាក់ស្លាកលេខ ភ្នំពេញ 1CC-9599 ជិះតែម្នាក់ឯង កំពុងធ្វើដំណើរតាមបណ្តោយផ្លូវបេតុង ក្នុងទិសដៅបញ្ច្រាសគ្នាយ៉ាងពេញទំហឹង បណ្តាលអោយភាគីខាងយុវជនជិះម៉ូតូហុងដាឌ្រីម ពណ៌ក្រហម ស្លាប់ភ្លាមៗនៅកន្លែងកើតហេតុ និងភាគីម្ខាងទៀតជិះម៉ូតូហុងដាឌ្រីម ពណ៌ខ្មៅ រងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីពេទ្យភ្លាមផងដែរ។
បន្ទាប់ពីកើតហេតុ នារីជាគូដណ្តឹងព្រមទាំងសាច់ញាតិរបស់ជនរងគ្រោះបានចុះមកដល់កន្លែងកើតហេតុ និងស្រែកទ្រហោយំសោកស្តាយជាពន់ពេក មិនគួរឲ្យជឿថាជនរងគ្រោះបាត់បង់ជីវិតលឿនបែបនេះសោះ បែកគ្នាទាំងអាល័យ ។
ក្រោយកើតហេតុ កម្លាំងការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បានចុះធ្វើការវាស់វែង នាំយកម៉ូតូទាំងពីរគ្រឿង ទៅរក្សាទុករង់ចាំការដោះស្រាយនៅពេលក្រោយ ។ ចំណែកស.ពជនរងគ្រោះត្រូវបានប្រគល់ទៅអោយក្រុមគ្រួសារដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ