ទុស្សេចរន្តអគ្គិសនី ក្លាយជាអណ្តាតភ្លើង ឆេះផ្ទះលោកមេភូមិរលួសអស់១ខ្នងនៅក្នុងស្រុកភ្នំស្រួច
- កំពង់ស្ពឺ
ខេត្តកំពង់ស្ពឺ ៖ ផ្ទះលោកមេភូមិរលួសមួយខ្នង ត្រូវបានអគ្គិភ័យលេបត្របាក់អស់គ្មានសល់ ដោយសារតែទុស្សេចរន្តអគ្គិសនី ក្លាយជាអណ្ដាតភ្លើងឆាបឆេះសន្ធោសន្ធៅអស់គ្មានសល់ បើទោះបីជាមានកិច្ចអន្តរាគមន៍ពីសមត្ថកិច្ចជួយពន្លត់ក៏ដោយ ។
ករណីអគ្គិភ័យឆាបឆេះផ្ទះលោកមេភូមិអស់មួយខ្នង បានបង្កឱ្យមានការភ្ញាក់ផ្អើល កាលពីវេលាម៉ោង៩ និង២៨នាទីព្រឹកថ្ងៃទី១៦ ខែតុលា ឆ្នាំ២០២៦ ស្ថិតនៅក្នុងភូមិរលួស ឃុំអូរ ស្រុកភ្នំស្រួច ខេត្តកំពង់ស្ពឺ ។
សមត្ថកិច្ចស្រុកភ្នំស្រួចបាននិយាយឲ្យដឹងថា ផ្ទះលោកមេភូមិដែលត្រូវអគ្គិភ័យឆាបឆេះអស់មួយខ្នងនេះ ធ្វើអំពីឈើលើថ្មក្រោម ដំបូលប្រក់ក្បឿង (ស៊ីបប្រូ) ទំហំ៦ម៉ែត្រ គុណនិង៩ម៉ែត្រ ឆេះអស់ទាំងស្រុង ជាកម្មសិទ្ធិរបស់ឈ្មោះ ប៉ិច ហ៊ីម ភេទប្រុស អាយុ៥៨ឆ្នាំ(ជាមេភូមិ) រស់នៅក្នុងភូមិរលួស ឃុំអូរ ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបានបន្តឲ្យដឹងទៀតថា ករណីខាងលើនេះ បង្កការខូចខាតមាន៖
-សំបុត្រកំណើតចំនួន១៥សន្លឹក
-សៀវភៅស្នាក់នៅ សៀវភៅគ្រួសារ
-អត្តសញ្ញាណប័ណ្ណ១០សន្លឹក
-ឯកសារប្លង់ដីចំនួន១០សន្លឹក
-លុយដុល្លារចំនួន១,០០០$
-លុយខ្មែរចំនួន១លានរៀល
-ឧបករណ៍ភ្លេងខ្មែរ១ឈុត
-ឆៃយាំ១ឈុត
-ប័ណ្ណសម្គាល់យានយន្ដចំនួន៦សន្លឹក(ក្នុងនោះមានម៉ូតូចំនួន៥ រថយន្ដចំនួន១ សន្លឹក)
-ធុងបាសចំនួន២គូ អាំភ្លីចំនួន៣។ ចំពោះករណីនេះមិនបណ្ដាលឲ្យគ្រោះថ្នាក់ដល់មនុស្ស និងសត្វឡើយ។
នគរបាលស្រុកភ្នំស្រួចបានបន្តឲ្យដឹងទៀតថា មូលហេតុដែលបណ្ដាលឲ្យឆាបឆេះផ្ទះអស់ទាំងស្រុងបណ្ដាលមកពីទុស្សេចរន្តអគ្គិសនី។ កិច្ចអន្តរាគមន៍ប្រើប្រាស់រថយន្តពន្លត់អគ្គិភ័យរបស់អធិការដ្ឋាននគរបាលស្រុកភ្នំស្រួចចំនួន២គ្រឿង ប្រើប្រាស់អស់ទឹកចំនួន៤រថយន្តផងដែរ ទើបរលត់ទាំងស្រុង ៕
ចែករំលែកព័តមាននេះ