ផ្អាកការងារបណ្តោះអាសន្នមន្ត្រីម្នាក់នៅសាលាខេត្តស្ទឹងត្រែង
- ស្ទឹងត្រែង
ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានសម្រេចផ្អាកការងារជាបណ្ដោះអាសន្នចំពោះលោក អ៊ុំ សុភឿន ដែលជាមន្ត្រីបម្រើការនៅការិយាល័យបុគ្គលិកនៃទីចាត់ការគ្រប់គ្រងធនធានមនុស្សសាលាខេត្តស្ទឹងត្រែង បន្ទាប់ពីមន្ត្រីរូបនេះបានជាប់ពាក់ព័ន្ធនឹងវិវាទដីធ្លីជា មួយប្រជាពលរដ្ឋនៅខេត្តព្រះវិហារ ។
យោងតាមសេចក្តីប្រកាសព័ត៌មានរបស់មន្ត្រីអ្នកនាំពាក្យរដ្ឋបាលខេត្តស្ទឹងត្រែងបានឱ្យដឹងថា លោក អ៊ុំ សុភឿន (ជាមន្ត្រីផ្ទេរភារកិច្ចមកពីសាលាខេត្តព្រះវិហារក្នុងឆ្នាំ២០២៥) នាពេលបច្ចុប្បន្ន បានជាប់ពាក់ព័ន្ធនឹងការចុះផ្សាយរបស់សារព័ត៌មានមួយចំនួនលើបញ្ហាវិវាទនៃការគ្រប់គ្រង កាន់កាប់ និងលក់ដីធ្លី ។
ទីតាំងដីធ្លីដែលមានទំនាស់នោះ ស្ថិតនៅក្នុងឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ដោយបានប្រឈមមុខដាក់គ្នាជាមួយលោកស្រី អៀវ វុទ្ធី រស់នៅភូមិដំណាក់ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ។ បន្ទាប់ពីទទួលបានព័ត៌មាននេះ មន្ត្រីជំនាញ និងផ្នែកពាក់ព័ន្ធ បានចុះធ្វើការពិនិត្យស្រាវជ្រាវជុំវិញករណីនេះ ដល់ទីតាំងជាក់ស្តែង ព្រមទាំងប្រមូលព័ត៌មាន និងពិនិត្យឯកសាររបស់សាម៉ីខ្លួន ជាលទ្ធផលអាជ្ញាធរបានយល់ឃើញថា ករណីនេះ តម្រូវឱ្យលោក អ៊ុំ សុភឿន ត្រូវធ្វើការដោះស្រាយបញ្ហាវិវាទដីធ្លីជាមួយភាគីទំនាស់ឱ្យបានរួចរាល់ទៅតាមគោលការណ៍ច្បាប់ ។
រដ្ឋបាលខេត្តស្ទឹងត្រែងបានគូសបញ្ជាក់បន្ថែមថា ដោយហេតុថាបច្ចុប្បន្ន ករណីវិវាទខាងលើ កំពុងស្ថិតក្នុងនីតិវិធីនៅសាលាដំបូងខេត្តស្ទឹងត្រែង និងដើម្បីធានាដល់ការអនុវត្តនីតិវិធី ក្នុងការគ្រប់គ្រងបុគ្គលិក រដ្ឋបាលខេត្តបានសម្រេច៖ ១-ផ្អាកការងារជាបណ្ដោះអាសន្ន ចំពោះលោក អ៊ុំ សុភឿន ២-ដាក់ឱ្យស្ថិតក្រោមការតាមដាន ត្រួតពិនិត្យ ពីក្រុមប្រឹក្សាវិន័យនៃរដ្ឋបាលខេត្តស្ទឹងត្រែង ។
រដ្ឋបាលខេត្តបានបញ្ជាក់ថា លុះត្រាតែមានការពិនិត្យវាយតម្លៃថា គ្មានកំហុសខាងវិន័យ ទើបសាម៉ីខ្លួនត្រូវបានអនុញ្ញាតឱ្យចូលបម្រើការងារវិញ ។ គួរបញ្ជាក់ថា សេចក្តីប្រកាសព័ត៌មាននេះ ត្រូវបានចុះហត្ថលេខា និងបោះត្រាជាផ្លូវការដោយរដ្ឋបាលខេត្តស្ទឹងត្រែង កាលពីថ្ងៃពុធ ៣កើត ខែអស្សុជ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី១៤ ខែសីហា ឆ្នាំ២០២៦ ៕
ចែករំលែកព័តមាននេះ