សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃ១៥ ខែតុលា បានលើកឡើងថា ទីក្រុងវ៉ាស៊ីនតោនកំពុងតែបន្តកិច្ចពិភាក្សាជាមួយនឹងទីក្រុងមូស្គូ និងទីក្រុងប៉េកាំង ក្នុងគោលបំណងរំសាយអាវុធនុយក្លេអ៊ែរ នៅក្នុងបណ្តាប្រទេសដែលមានស្តុកអាវុធនុយក្លេអ៊ែរច្រើនជាងគេបំផុតលើពិភពលោក។ នេះបើតាមការចេញផ្សាយពី Reuters ។
យោងតាមវិទ្យាស្ថានស្រាវជ្រាវសន្តិភាពអន្តរជាតិស្តុកខុម ហៅកាត់ថា (SIPRI) បានឱ្យដឹងថា ប្រទេសរុស្ស៊ីមានក្បាលគ្រាប់នុយក្លេអ៊ែរក្នុងស្តុកច្រើនជាងគេ បន្ទាប់មកសហរដ្ឋអាមេរិក និងប្រទេសចិន។ ទោះយ៉ាងណាក៏ដោយ សហរដ្ឋអាមេរិកត្រូវបានដឹងថាមានចំនួនក្បាលគ្រាប់នុយក្លេអ៊ែរដែលបានដាក់ពង្រាយហើយ ច្រើនជាងរុស្ស៊ីទៅទៀត។
ថ្លែងក្នុងកិច្ចសម្ភាសន៍ជាមួយសារព័ត៌មាន Newsmax លោក ត្រាំ បានឱ្យដឹងថា លោករំពឹងថា ចិននឹងតាមទាន់សហរដ្ឋអាមេរិកក្នុងរយៈពេល៥ឆ្នាំខាងមុខ។ លោកថា «យើងកំពុងពិភាក្សាជាមួយរុស្ស៊ីអំពីបញ្ហានោះ ហើយយើងក៏កំពុងពិភាក្សាជាមួយចិនអំពីការរំសាយអាវុធនុយក្លេអ៊ែរនោះដែរ»។ ជាមួយគ្នានោះ Newsmax បានរាយការណ៍ដែរថា លោក ត្រាំ ពិតជាបានពិភាក្សាជាមួយប្រធានាធិបតីចិន លោក ស៊ី ជីនភីង អំពីការរំសាយអាវុធនុយក្លេអ៊ែរ។
ការលើកឡើងរបស់លោក ត្រាំ ធ្វើឡើងប៉ុន្មានខែ បន្ទាប់ពីសន្ធិសញ្ញាកាត់បន្ថយអាវុធយុទ្ធសាស្ត្រសហរដ្ឋអាមេរិក-រុស្ស៉ី New START (Strategic Arms Reduction Treaty) បានផុតកំណត់កាលពីដើមឆ្នាំនេះ។
សន្ធិសញ្ញាដែលបានចុះហត្ថលេខា កាលពីឆ្នាំ២០១០ អនុញ្ញាតឱ្យមានការបន្តសុពលភាពត្រឹមតែដងគត់ ដែលកាលណោះ ត្រូវបានព្រមព្រៀងដោយអតីតប្រធានាធិបតី លោក ចូ បៃដិន និងប្រធានាធិបតីរុស្ស៊ី លោក វ្ល៉ាដឺមៀ ពូទីន សម្រាប់រយៈពេល ៥ ឆ្នាំ។ ការបន្តសុពលភាពថ្មីណាមួយ នឹងតម្រូវឱ្យមានការសម្រេចចិត្តលក្ខណៈប្រតិបត្តិរវាងប្រទេសទាំងពីរ ដើម្បីពន្យារសពុលភាពនៃសន្ធិសញ្ញានេះ ដោយស្ម័គ្រចិត្ត៕
ចែករំលែកព័តមាននេះ