យេម៉ែន-អារ៉ាប៊ីសាអូឌីត ៖ ពួកឧទ្ទាមហ៊ូធីយេម៉ែន ស្និទ្ធអ៉ីរ៉ង់ កាលពីថ្ងៃទី១៥ តុលា បានវាយប្រហារវិមានប្រធានាធិបតីដែលពេលនេះ ប្រើជាទីស្នាក់ការរបស់រដ្ឋាភិបាលយេម៉ែន ទទួលស្គាល់ដោយអន្តរជាតិ ស្ថិតនៅក្រុងកំពង់ផែអាដេនភាគខាងត្បូងយេម៉ែន ។ ស្នូរផ្ទុះខ្លាំងៗយ៉ាងតិច៦លើកលាន់ឮនាថ្ងៃនោះ ជិតវិមានរដ្ឋាភិបាលនោះ។
អ្នកទទួលខុសត្រូវម្នាក់របស់រដ្ឋាភិបាលយេម៉ែនគូសបញ្ជាក់ថា មនុស្សយ៉ាងតិច៤នាក់ បានត្រូវស្លាប់ និង៦នាក់ទៀតរងរបួស។ ពួកឧទ្ទាមហ៊ូធីគាំទ្រដោយអ៉ីរ៉ង់បានប្រកាសភ្លាមៗថា នោះជាការវាយប្រហាររបស់ពួកគេ ។ ការវាយប្រហារលើតំបន់វិមានប្រធានាធិបតីនេះ កើតមាន ខណៈការប្រយុទ្ធគ្នាកំពុងតែមានការកើនឡើង រវាងពួកឧទ្ទាមនិងក្រុមចម្រុះនាំមុខដោយអារ៉ាប៊ីសាអូឌីត នៅលើរណសិរ្សចុងក្រោយនៃសង្គ្រាមប្រឆាំងអ៉ីរ៉ង់នោះ។
ស្នូរផ្ទុះខ្លាំងៗបណ្ដាលឲ្យប្រជាជនក្រុងអាដេនជ្រួលច្របល់ ហើយជម្លៀសខ្លួនចេញពីតំបន់វិមានប្រធានាធិបតី។ រដ្ឋាភិបាលយេម៉ែនគូសបញ្ជាក់ថា ពួកហ៊ូធីបានវាយប្រហារដោយមីស៊ីល និងដ្រូន។ ស្នូរផ្ទុះខ្លាំង២ កើតមាននៅកំពូលកូនភ្នំជិតវិមានប្រធានាធិបតី MAASHINQ ហើយការផ្ទុះ២ទៀតនៅជិតប៉ុស្តិ៍សន្តិសុខ ។ តាមអ្នកទទួលខុសត្រូវម្នាក់នៃរដ្ឋាភិបាលយេម៉ែនដែលមិនបញ្ចេញឈ្មោះថា មេដឹកនាំរដ្ឋាភិបាលយេម៉ែនច្រើននាក់រស់នៅនីរទេស ហើយបណ្ដាអ្នកស្ថិតនៅក្រុងអាដេនពុំមាននរណាម្នាក់រងគ្រោះឡើយ ។
ពួកហ៊ូធីអះអាងពីការវាយប្រហារលើទីបញ្ជាការដ្ឋានយោធារបស់សត្រូវ ស្របតាមយុទ្ធសាស្ត្ររបស់ពួកគេវាយប្រហារ ប្រឆាំងបណ្ដាគោលដៅអារ៉ាប៊ីសាអូឌីត។ យុទ្ធសាស្ត្រនោះបង្ហាញរួចហើយ តាមរយៈការវាយប្រហារផ្ទួនៗ លើព្រលានយន្តហោះក្រុងរីយ៉ាដនិងបណ្ដាទីតាំងប្រេងកាតរបស់ក្រុមហ៊ុនប្រេងយក្សប្រទេសនេះARAMCO ។
ការកើនឡើងនៃការប្រយុទ្ធគ្នានៅយេម៉ែននេះ កាន់តែធ្វើឲ្យស្មុគ្រស្មាញថែមទៀត ដល់ការខិតខំប្រឹងប្រែងបញ្ចប់សង្គ្រាមអ៉ីរ៉ង់ និងកាន់តែធ្វើឲ្យផុយស្រួយថែមទៀតដល់បណ្ដាទីផ្សារប្រេងពិភពលោក ។ ចរាចរណ៍តាមអាកាសក្នុងតំបន់ក៏រងការប៉ះពាល់ដែរ ដោយពួកហ៊ូធីបានព្រមានប្រាប់បណ្ដាក្រុមហ៊ុនអាកាសចរណ៍ ពីចេតនារបស់ពួកគេប្រើដែនអាកាសអារ៉ាប៊ីសាអូឌីត សម្រាប់ធ្វើការវាយប្រហារ ។ ការហោះហើរច្រើនពាន់ជើងរបស់យន្តហោះនៅអារ៉ាប៊ីសាឌីតបានត្រូវស្ទះ ។
រាជធានីអារ៉ាប៊ីសាអូឌីត ជាប្រទេសនាំចេញប្រេងឆៅធំទីមួយលើពិភពលោក ចាប់តាំងពីជាង១សប្ដាហ៍មកហើយ រងការវាយប្រហាររាល់ថ្ងៃ ពុំធ្លាប់មានពីមុនមក ដែលកំណត់ពីការកើនឡើងនៃសង្គ្រាម រវាងពួកហ៊ូធីយេម៉ែន និងអារ៉ាប៊ីសាអូឌីត ៕
ចែករំលែកព័តមាននេះ