ទីក្រុងវ៉ាស៊ីនតោន៖ លោកដូណាល់ត្រាំមានប្រសាសន៍ថារដ្ឋាភិបាលរបស់លោកកំពុងពិគ្រោះគ្នាជាមួយរុស្ស៊ី និងចិនដើម្បីកាត់បន្ថយចំនួនអាវុធនុយក្លេអ៊ែរដែលមាននៅក្នុងឃ្លាំង។ ការលើកឡើងដូចខាងលើនេះកើតមានឡើងស្របពេលដែលប្រទេសចិនកំពុងសម្រុកផលិតអាវុធនុយក្លេអ៊ែរយ៉ាងសម្បើម។ គេប៉ាន់ស្មានថាចិនមានក្បាលគ្រាប់នុយក្លេអ៊ែរចូលដល់ខ្ទង់ពាន់គ្រាប់ហើយសម្រាប់ពេលបច្ចុប្បន្ន។
សព្វថ្ងៃនេះ ប្រទេសរុស្ស៊ីមានក្បាលគ្រាប់នុយក្លេអ៊ែរច្រើនដាច់គេនៅលើសាកលលោក។ ឈរលំដាប់ទី២គឺអាមេរិក និងឈរលំដាប់ទី៣គឺចិន។ នេះបើយោងតាមរបាយការណ៍ស្រាវជ្រាវរបស់វិទ្យាស្ថានស្រាវជ្រាវដើម្បីសន្តិភាពជាអន្តរជាតិដែលមានទីស្នាក់ការធំនៅទីក្រុងស្តុកហូម ប្រទេសស៊ុយអែត។ ថ្វីដ្បិតរុស្ស៊ីមានក្បាលគ្រាប់នុយក្លេអ៊ែរនាំមុខគេមែន ប៉ុន្តែអាមេរិកនាំមុខរុស្ស៊ីខាងចំនួនក្បាលគ្រាប់ដែលដាក់ពង្រាយនៅលើទីតាំងយុទ្ធសាស្ត្រសំខាន់ៗ។
នៅក្នុងបទសម្ភាសជាមួយទូរទស្សន៍ Newsmax លោកត្រាំរំពឹងថាប្រទេសចិននឹងតាមទាន់អាមេរិកនារយៈពេល៥ឆ្នាំខាងមុខនេះ។ លោកថ្លែងថាអ្វីៗគ្រប់យ៉ាងពោរពេញដោយភាពអាម៉ាស់ណាស់។ លោកចង់កាត់បន្ថយចំនួនអាវុធនុយក្លេអ៊ែរ ប្រសិនបើអាចធ្វើទៅបាន។ យើងកំពុងពិភាក្សាជាមួយរុស្ស៊ីអំពីបញ្ហានេះ ហើយក៏ពិភាក្សាជាមួយចិនផងដែរ។ ទូរទស្សន៍ដដែលនេះផ្សាយថាលោកត្រាំទើបតែសន្ទនាគ្នាជាមួយប្រធានាធិបតីចិន លោកស៊ីជីនពីង អំពីការកាត់បន្ថយអាវុធនុយក្លេអ៊ែរ។
បទអត្ថាធិប្បាយរបស់លោកត្រាំកើតមានឡើងបន្ទាប់ពីសន្ធិសញ្ញាស្ដីពីការកាត់រំសាយអាវុធជាយុទ្ធសាស្ត្របានផុតសុពលភាពជាច្រើនខែមកហើយតាំងពីដើមឆ្នាំនេះមកម៉្លេះ។ សន្ធិសញ្ញាញូស្តាត (New START) ដែលចុះហត្ថលេខាកាលពីឆ្នាំ២០១០នោះអនុញ្ញាតឱ្យបន្តសុពលភាពបានតែម្ដងប៉ុណ្ណោះ។ សន្ធិសញ្ញានេះចុះហត្ថលេខាកាលពីជំនាន់លោកបៃដិន និងលោកពូទីនកាលពី៥ឆ្នាំមុន។ ប្រសិនបើចង់បន្តសុពលភាពសន្ធិសញ្ញានេះទៀតលុះត្រាតែមានការសម្រេចចិត្តជាសហមតិតាមគោលការណ៍ស្ម័គ្រចិត្ត៕ ប្រភព៖ Reuters
ចែករំលែកព័តមាននេះ