ទីក្រុងវ៉ាស៊ីនតោន៖ លោកដូណាល់ត្រាំលុបចោលគម្រោងផ្សាយបន្តផ្ទាល់នូវព្រឹត្តិការណ៍ប្រហារជីវិតទណ្ឌិតម្នាក់ដែលជាអតីតមន្ត្រីយោធាអាមេរិក និងដែលបានបាញ់សម្លាប់មនុស្ស១៣នាក់នៅមូលដ្ឋានយោធាហ្វតហ៊ូត (Fort Hood)។ គម្រោងនេះមុនដំបូងត្រូវបានជំរុញដោយរដ្ឋមន្ត្រីក្រសួងសង្គ្រាម លោកភីតហេកសិត។ ប៉ុន្តែក្រោយមកដោយសារមានមតិប្រឆាំងជំទាស់ខ្លាំងពេកពីក្រុមអ្នកសាធារណរដ្ឋនិយម ពីមេសាសនា និងពីសាធារណជន លោកត្រាំក៏សម្រេចចិត្តលុបចោលវិញ។ ការប្រហារជីវិតទណ្ឌិតឈ្មោះណាយដាល់ ហាសាន (Nidal Hassan) គ្រោងធ្វើឡើងនាថ្ងៃទី៣ ខែធ្នូខាងមុខនេះ។
ការលុបចោលគម្រោងផ្សាយផ្ទាល់នេះបង្ហាញនូវការខ្វែងគំនិតគ្នាដ៏កម្រជាចំហរវាងលោកត្រាំ និងមនុស្សជិតស្និទ្ធបំផុតរបស់លោក។ ប៉ុន្តែមន្ទីរបញ្ចកោណបញ្ជាក់ថាលោកទាំង២បានឯកភាពគ្នាទាំងស្រុងទៅលើការសម្រេចចិត្តលុបចោលនេះ។ លោកហេកសិតបានប្រកាសអំពីគម្រោងផ្សាយបន្តផ្ទាល់នូវការប្រហារជីវិតដែលនឹងប្រព្រឹត្តទៅនៅមូលដ្ឋានយោធានៃរដ្ឋតិចសាសន៍ ជាទីកន្លែងដែលណាយដាល់ ហាសាន បើកការបាញ់ប្រហារកាលពីឆ្នាំ២០០៩។ នៅលើសាកលលោកនេះ គ្មានប្រទេសណាប្រហារជីវិតអ្នកទោសផ្សាយបន្តផ្ទាល់ជាសាធារណៈនោះទេ លើកលែងតែសម័យមុនៗកាលពីអំឡុងសតវត្សទី១៩ថយក្រោយវិញដែលគេប្រហារជីវិតជាចំហឱ្យមហាជនបានទស្សនា ប៉ុន្តែក៏មិនមែនផ្សាយតាមទូរទស្សន៍ ឬអ៊ីនធឺណិតនោះដែរ។
សព្វថ្ងៃនេះមានដែរការប្រហារជីវិតនៅទីសាធារណៈ ប៉ុន្តែធ្វើឡើងនៅក្នុងប្រទេសមួយចំនួនតូចតែប៉ុណ្ណោះ។ ប៉ុន្តែបើដល់ថ្នាក់ផ្សាយតាមទូរទស្សន៍ ឬអ៊ីនធឺណិតហាក់ដូចជាគ្មានទេព្រោះទិដ្ឋភាពបែបនេះគួរឱ្យស្លុតរន្ធត់ណាស់។ បុគ្គលិកបម្រើការនៅសេតវិមានម្នាក់ដែលស្នើសុំមិនបញ្ចេញឈ្មោះប្រាប់ថាមែនទែនទៅ លោកត្រាំពុំបានដឹងទាល់តែសោះថាមានគម្រោងប្រហារជីវិតផ្សាយបន្តផ្ទាល់បែបនេះ។ បើលោកដឹងតាំងពីដំបូងដៃ លោកមិនឱ្យធ្វើបែបនេះឡើយ។
លោកត្រាំបង្ហាញទស្សនៈតាមរយៈការបង្ហោះនៅលើបណ្ដាញសង្គមថា «ការផ្សាយព្រឹត្តិការណ៍ប្រហារជីវិតដើម្បីឱ្យមនុស្សគ្រប់គ្នាបានឃើញអាចក្លាយជាគំរូឱ្យរាងចាលសម្រាប់អ្នកដទៃទៀតនៅពេលពិភពលោកមើលឃើញថាតើអាមេរិកចាត់ការបែបណាចំពោះភេរវជន ឬជនគម្រក់ដូចជាហាសានជាដើម។ ប៉ុន្តែមនុស្សល្អៗជាច្រើនមិនចង់មើលឃើញគាត់ស្លាប់ស្ដែងៗនឹងភ្នែករបស់ពួកគេនោះទេទោះបីតាមរយៈការផ្សាយបន្តផ្ទាល់ ឬតាមរយៈឧបករណ៍សោត-ទស្សន៍ដទៃក៏ដោយ។ គាត់នឹងស្លាប់ទៅតាមកាលកំណត់ដោយការប្រហារជីវិតបាញ់នឹងកាំភ្លើង។ ប៉ុន្តែព្រឹត្តិការណ៍នេះនឹងមិនផ្សាយផ្ទាល់នោះទេ»។
ក្រុមគ្រួសាររបស់ជនរងគ្រោះដែលស្លាប់ក្រោមស្នាដៃរបស់ទណ្ឌិតរូបនេះអាចមានឱកាសទស្សនាការប្រហារជីវិតនេះដោយផ្ទាល់នៅនឹងកន្លែងប្រហារជីវិតតែម្ដង ប្រសិនបើពួកគេចង់ទស្សនាដូចដែលអាមេរិកធ្លាប់អនុវត្តនីតិវិធីបែបនេះកន្លងមក។ ក្រុមអ្នកសាធារណរដ្ឋនិយមដែលជាមនុស្សជិតស្និទ្ធរបស់លោកត្រាំរួមទាំងអនុប្រធានាធិបតីអាមេរិក លោកជេឌីវេន និងមេៗសាសនាធំៗជាច្រើនបានបង្ហាញអារម្មណ៍ចម្រុះពាក់ព័ន្ធនឹងបញ្ហានេះ។ អ្នកខ្លះមិនអស់ចិត្តនឹងគម្រោងប្រហារជីវិតនេះទេ ខណៈដែលអ្នកខ្លះទៀតថ្កោលទោសគម្រោងនេះ៕ ប្រភព៖ Reuters
ចែករំលែកព័តមាននេះ