ទីក្រុងកៀវ៖ យោធាអ៊ុយក្រែនប្រកាសថាខ្លួនទើបតែបើកការវាយប្រហារកាលពីយប់មិញទៅលើមូលដ្ឋានទ័ពអាកាសរបស់រុស្ស៊ីនៅតំបន់វ៉ូរ៉ូនេស (Voronezh) បណ្ដាលឱ្យខូចខាតយន្តហោះចម្បាំងម៉ាក Su-34M ចំនួន៦គ្រឿង។ តាមរយៈសេចក្ដីថ្លែងការណ៍ដែលបង្ហោះនៅលើបណ្ដាញតេឡេក្រាម អគ្គសេនាធិការដ្ឋានកងទ័ពអ៊ុយក្រែនបញ្ជាក់ថាយន្តហោះទាំងនោះរងការខូចខាតនៅក្នុងកម្រិតផ្សេងៗគ្នា។
តាមរយៈរូបភាពពីផ្កាយរណបដែលថតបាននៅថ្ងៃនេះ និងដែលផ្ទៀងផ្ទាត់ថាពិតជាត្រឹមត្រូវដោយទីភ្នាក់ងារព័ត៌មានរ៉យទ័រ គេឃើញថាមូលដ្ឋានទ័ពអាកាសនោះរងការខូចខាតពិតប្រាកដមែន។ យន្តហោះចម្បាំងម៉ាក Su-34M ជាប្រភេទយន្តហោះទម្លាក់គ្រាប់បែកខ្នាតធំដែលមួយគ្រឿងៗមានតម្លៃរាប់សិបលានដុល្លារអាមេរិក។ រុស្ស៊ីច្រើនប្រើប្រាស់យន្តហោះប្រភេទនេះដើម្បីទម្លាក់គ្រាប់បែកមានប្រព័ន្ធបញ្ជាពីចម្ងាយទៅលើទីក្រុងតូចធំរបស់អ៊ុយក្រែនដែលស្ថិតនៅកៀកនឹងខ្សែត្រៀមមុខ។
អ៊ុយក្រែនប្រកាសថាខ្លួនប្រើប្រាស់មីស៊ីលណឹបទូន (Neptune) នៅក្នុងការវាយប្រហារនោះ។ រហូតមកដល់ពេលនេះ អាជ្ញាធររុស្ស៊ីមិនទាន់ធ្វើអត្ថាធិប្បាយទៅលើរឿងនេះនៅឡើយទេ។ អភិបាលនៃគណៈអភិបាលតំបន់វ៉ូរ៉ូនេសថ្លែងថាប្រព័ន្ធការពារដែនអាកាសរបស់រុស្ស៊ីស្ទាក់ចាប់ដ្រូន៣៣គ្រឿង និងដ្រូនដែលប្រើប្រាស់ម៉ាស៊ីនកម្លាំងខ្លាំងមួយចំនួនទៀត។ លោកថ្លែងថាបំណែកនៃដ្រូនដែលបាញ់ឆេះទាំងនោះបានធ្លាក់ត្រូវចំអគារ, ផ្ទះរបស់ប្រជាជន និងរថយន្តមួយគ្រឿង។
អ្នកស្រុករស់នៅម្ដុំកើតហេតុប្រាប់ថាពួកគេស្ដាប់ឮសំឡេងផ្ទុះ, ឃើញភ្លើងឆេះយ៉ាងសន្ធោសន្ធៅ និងឃើញផ្សែងខ្មៅងងឹតហោះហើរចេញពីទីតាំងខ្លះនៃទីក្រុងនេះ។ មូលដ្ឋានទ័ពអាកាសនោះស្ថិតនៅចម្ងាយ៦គីឡូម៉ែត្រភាគខាងកើតទីក្រុងបូរីសូក្លេប (Borisoglebsk)។ កាលពីខែកញ្ញា យោធាអ៊ុយក្រែនអះអាងថាខ្លួនបាញ់កម្ទេចយន្តហោះមីក២៩ (MiC-29) មួយគ្រឿងរបស់រុស្ស៊ីក្បែរមូលដ្ឋានទ័ពអាកាសមីឡេរ៉ូវ៉ូ (Millerovo) នៃតំបន់រូស្តូហ្វ (Rostov) និងបំផ្លាញឧទ្ធម្ភាគចក្រម៉ាក Ka-27 មួយគ្រឿងក្បែរមូលដ្ឋានទ័ពអាកាសយេ (Yeysk) នៃតំបន់ក្រាស់ណូដា (Krasnodar)៕ ប្រភព៖ Reuters, The Moscow Times
ចែករំលែកព័តមាននេះ