ទីក្រុងកៀវ៖ អ៊ុយក្រែនចាប់ផ្ដើមបើកការវាយប្រហារទីតាំងថាមពលរបស់រុស្ស៊ីជាថ្មីបន្ទាប់ពីសង្កេតឃើញថាសេចក្ដីអំពាវនាវរបស់លោកដូណាល់ត្រាំដែលស្នើសុំឱ្យភាគីទាំង២ផ្អាកវាយប្រហារទីតាំងថាមពលគ្នាទៅវិញទៅមកហាក់ដូចជាមិនមានប្រសិទ្ធភាព។ ថ្ងៃនេះអ៊ុយក្រែនបញ្ជូនដ្រូនរយៈចម្ងាយឆ្ងាយទៅវាយប្រហាររោងចក្រចម្រាញ់ប្រេងមួយកន្លែងនៅតំបន់រីយ៉ាហ្សាន (Ryazan)។ ការវាយប្រហារនេះធ្វើឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីលោកហ្សេឡិនស្គីប្រកាសថាបទឈប់បាញ់មួយចម្អិនកំពឹសជាមួយទីក្រុងម៉ូស្គូនោះបានឈានដល់ទីបញ្ចប់ហើយ។ ម៉្យាងទៀត ការវាយប្រហារនេះក៏កើតឡើងស្របពេលដែលទំនាក់ទំនងរវាងទីក្រុងកៀវ និងវ៉ាស៊ីនសោនចាប់ផ្ដើមរយាលដៃ។
មិនតែប៉ុណ្ណោះ ទំនាក់ទំនងនេះប្រឈមនឹងភាពតានតឹងកាន់តែខ្លាំងបន្ទាប់ពីលោកត្រាំអំពាវនាវឱ្យប្រជាជនអ៊ុយក្រែនដកមេដឹកនាំរបស់ខ្លួនសព្វថ្ងៃនេះចេញ ហើយដាក់អ្នកផ្សេងជំនួសវិញ។ ការវាយប្រហារដោយដ្រូនរបស់អ៊ុយក្រែននោះបណ្ដាលឱ្យមានអគ្គិភ័យឆាបឆេះរោងចក្រប្រេងដែលស្ថិតនៅចម្ងាយ៣០០គីឡូម៉ែត្រភាគអាគ្នេយ៍នៃរដ្ឋធានីម៉ូស្គូ។ នេះបើយោងតាមការប្រកាសរបស់ក្រសួងការពារជាតិរុស្ស៊ី និងអភិបាលនៃគណៈអភិបាលតំបន់រីយ៉ាហ្សាន លោកផាវែល ម៉ាល់កូហ្វ (Pavel Malkov)។ សារព័ត៌មានអនឡាញរបស់រុស្ស៊ី Astra បានចេញផ្សាយនូវរូបភាពដែលខ្លួនពិពណ៌នាថាជាអគ្គិភ័យឆេះរោងចក្រ។
មន្ត្រីជាន់ខ្ពស់អ៊ុយក្រែនម្នាក់ដែលស្នើសុំមិនបញ្ចេញឈ្មោះបញ្ជាក់ថាអ៊ុយក្រែនពិតជាបានវាយប្រហាររោងចក្រនោះមែន។ ការវាយប្រហារនេះមិនមែនជាសញ្ញាល្អប៉ុន្មានទេព្រោះអាចនឹងបង្កបញ្ហាកាន់តែខ្លាំងសម្រាប់ទំនាក់ទំនងរវាងលោកហ្សេឡិនស្គី និងលោកដូណាល់ត្រាំ។ ហ្សេឡិនស្គីផ្ទុះកំហឹងយ៉ាងខ្លាំងនៅពេលរុស្ស៊ីបន្តវាយប្រហារទីតាំងថាមពលរបស់អ៊ុយក្រែន។ រុស្ស៊ីធ្វើដូច្នេះប្រៀបដូចជាការធ្វើផ្គើនទៅនឹងការអំពាវនាវយ៉ាងទទូចរបស់លោកត្រាំដែលកំពុងបារម្ភអំពីការបរាជ័យនៅក្នុងការបោះឆ្នោតសភានាខែវិច្ឆិកាដោយសារប្រេងឡើងថ្លៃ។ រដ្ឋាភិបាលអ៊ុយក្រែនប្រកាសថាខ្លួនមិនជំទាស់នឹងការអំពាវនាវឱ្យផ្អាកវាយប្រហារទីតាំងថាមពលនោះទេ។ ប៉ុន្តែអ្នកនាំពាក្យវិមានក្រឹមឡាំងថ្លែងនៅថ្ងៃនេះថាអ៊ុយក្រែនមិនបានផ្អាកវាយប្រហាររោងចក្រចម្រាញ់ប្រេងរបស់រុស្ស៊ីម្ដងណាឡើយ។
ទោះជាយ៉ាងណាក្ដី សម្រាប់ពេលនេះ គេមិនអាចផ្ទៀងផ្ទាត់បានឡើយថាតើការពិតជាក់ស្ដែងបែបណា។ លោកហ្សេឡិនស្គីអះអាងថាទោះបីអ៊ុយក្រែនខិតខំធ្វើតាមការអំពាវនាវរបស់លោកត្រាំឱ្យផ្អាកវាយប្រហារទីតាំងថាមពលគ្នាទៅវិញទៅមក ប៉ុន្តែប៉ុន្មានថ្ងៃចុងក្រោយនេះ ក្រុមបស្ចិមប្រទេសមិនបានផ្ដល់ព័ត៌មានសម្ងាត់ពាក់ព័ន្ធនឹងការវាយប្រហារដោយគ្រាប់មីស៊ីលផ្លោងរបស់រុស្ស៊ីទេ ហើយម៉្យាងទៀតអ៊ុយក្រែនប្រើប្រាស់សេវាអ៊ីនធឺណិតតាមផ្កាយរណបស្តាលីង (Starlink) មានដែនកំណត់ផងដែរ។ របស់ទាំង២នេះ (ព័ត៌មានសម្ងាត់ និងស្តាលីង) មានសារៈសំខាន់ក្រៃលែងសម្រាប់វិស័យការពារជាតិរបស់អ៊ុយក្រែន និងប្រតិបត្តិការវាយប្រហាររបស់ខ្លួន។
ហ្សេឡិនស្គីថ្លែងថាលោកអស់ការអត់ធ្មត់តទៅទៀតហើយ។ លោកថ្លែងនៅក្នុងបទសម្ភាសជាមួយសារព័ត៌មានហ្វាយណាន់សល ថាមស៍ (Financial Times) ថាអ៊ុយក្រែននឹងបន្តវាយប្រហាររោងចក្រចម្រាញ់ប្រេងរបស់រុស្ស៊ី។ ហ្សេឡិនស្គីធ្លាប់មានកំហឹងម្ដងហើយនៅក្នុងករណីដែលអាមេរិក និងរុស្ស៊ីសម្រេចបានកិច្ចព្រមព្រៀងទិញ-លក់ប្រេងម៉ាស៊ូតដើម្បីដោះស្រាយបញ្ហាប្រេងឡើងថ្លៃនៅមុនការបោះឆ្នោតសភានៅអាមេរិក។ លោកយល់ថារុស្ស៊ីមិនគួរទទួលបានការបន្ធូរបន្ថយទណ្ឌកម្មនោះទេ ប៉ុន្តែគួរណាស់ទទួលរងទណ្ឌកម្មកាន់តែខ្លាំងដើម្បីបង្ខំឱ្យចូលតុចរចា។ លោកហ្សេឡិនស្គីថ្លែងនៅក្នុងបទសម្ភាសដាច់ដោយឡែកមួយទៀតថាលោកទទួលអារម្មណ៍ថាហាក់ដូចជាត្រូវគេក្បត់ពីក្រោយខ្នងដោយសារកិច្ចព្រមព្រៀងនោះ៕ ប្រភព៖ AP
ចែករំលែកព័តមាននេះ