ទីក្រុងតេអេរ៉ង់៖ ក្រុមឧទ្ទាមហ៊ូទីវាយប្រហារទីស្នាក់ការរបស់ក្រុមហ៊ុនប្រេងអារ៉ាប៊ីសាអូឌីតឈ្មោះអារ៉ាមកូ (Aramco) កាលពីយប់មិញបណ្ដាលឱ្យខូចខាតការិយាល័យរបស់មន្ត្រីថ្នាក់ដឹកនាំក្រុមហ៊ុន និងមន្ត្រីរដ្ឋាភិបាលកំពូលៗរបស់រដ្ឋាភិបាលអារ៉ាប៊ីសាអូឌីត។ នេះជាក្រុមហ៊ុនរបស់រដ្ឋ។ ការវាយប្រហារទៅលើទីក្រុងដារ៉ាន (Dhahrah) នៅអារ៉ាប៊ីសាអូឌីតភាគខាងកើតនោះជាការបង្ហាញថាក្រុមនេះមានសមត្ថភាពវាយប្រហារទីតាំងសំខាន់ៗ។ សំណាងល្អ គ្មាននរណាម្នាក់រងរបួស ឬស្លាប់ដោយសារការវាយប្រហារនោះទេ ប៉ុន្តែបានធ្វើឱ្យខូចខាតអគារបីជាន់។
ក្រុមហ៊ូទីព្រមានតាំងពីមុននោះថាពួកគេនឹងវាយប្រហារទីក្រុងដារ៉ានដោយមីស៊ីលផ្លោង។ កាលពីក្បាលព្រលប់ថ្ងៃពុធ វិទ្យុរបស់ក្រុមនេះផ្សាយថាមានការវាយប្រហាររដ្ឋធានីសាណា (Sanaa) ប្រទេសយេម៉េន។ ក្រុមសម្ព័ន្ធមិត្តដែលគាំទ្រដោយអារ៉ាប៊ីសាអូឌីតមិនទាន់ធ្វើអត្ថាធិប្បាយលើរឿងនេះដើម្បីបញ្ជាក់ថានេះជាស្នាដៃរបស់ខ្លួន ឬយ៉ាងណាទេ។ គេមើលឃើញផ្សែងដ៏ខ្មៅងងឹតហោះហើរចេញពីទីតាំងសំខាន់ៗនៅអារ៉ាប៊ីសាអូឌីតនារយៈពេលប៉ុន្មានថ្ងៃចុងក្រោយនេះ។
ក្រុមហ៊ូទីធ្វើសកម្មភាពកាន់តែខ្លាំងក្លាបែបនេះនាំឱ្យគេគិតថាលោកត្រាំអាចនឹងចូលធ្វើអន្តរាគមន៍នៅក្នុងរឿងនេះព្រោះលោកទើបតែនិយាយថ្មីៗនេះថាលោកអាចនឹងចូលរួមជាមួយអារ៉ាប៊ីសាអូឌីតដើម្បីចាត់ការក្រុមហ៊ូទី។ ក្រសួងថាមពលរបស់អារ៉ាប៊ីសាអូឌីតរាយការណ៍ថាមានភ្លើងឆេះនៅអគារនៃក្រុមហ៊ុនអារ៉ាមកូកាលពីយប់ថ្ងៃអង្គារ។ កាលពីថ្ងៃពុធ អាជ្ញាធរធ្វើការខាងប្រជាការពារនៅទីក្រុងរីយ៉ាតថ្លែងថាអំបែងគ្រាប់ដែលធ្លាក់ពីលើមេឃដោយសារការប៉ះទង្គិចគ្នារវាងមីស៊ីល និងមីស៊ីលបណ្ដាលឱ្យមនុស្សម្នាក់រងរបួស។
ទីភ្នាក់ងារព័ត៌មាន SPA ចេញផ្សាយរូបភាពជាច្រើនសន្លឹកបង្ហាញអគារបាក់បែក និងយានជំនិះមួយគ្រឿងដែលខូចខាត។ ក្រុមសម្ព័ន្ធមិត្តដែលដឹកនាំដោយអារ៉ាប៊ីសាអូឌីតថ្លែងថាខ្លួនបានបាញ់ទម្លាក់ដ្រូន២គ្រឿងរបស់ហ៊ូទី បាញ់ទម្លាក់មីស៊ីលគ្រូស៤គ្រាប់ និងមីស៊ីលផ្លោងមួយគ្រាប់។ អាវុធទាំងនោះប្រុងហោះទៅវាយប្រហារទីក្រុងរីយ៉ាត។ មីស៊ីលផ្លោងមួយគ្រាប់ហោះតម្រង់ទៅទីក្រុងដារ៉ាន និងមីស៊ីលគ្រូសមួយគ្រាប់ហោះតម្រង់ទៅអាល់ខារ៉ាច (Al-Kharj) ដែលជាទីក្រុងឧស្សាហកម្ម និងជាកន្លែងផលិតគ្រឿងបរិក្ខារយោធាដ៏ធំមួយ។ គេស្ដាប់ឮសំឡេងស៊ីរ៉ែនប្រកាសអាសន្នដែលព្រមានថាមានមីស៊ីលហោះតម្រង់ទៅរកទីក្រុងរីយ៉ាត។
ក្រុមឧទ្ទាមហ៊ូទីប្រកាសថាការវាយប្រហាររបស់ខ្លួននោះគឺដើម្បីសងសឹកទៅនឹងទង្វើគឃ្លើនរបស់អារ៉ាប៊ីសាអូឌីតប្រឆាំងនឹងរដ្ឋធានីសាណា នៃប្រទេសយេម៉េន ដែលជាទីក្រុងស្ថិតនៅក្រោមការកាន់កាប់របស់ហ៊ូទី។ អារ៉ាប៊ីសាអូឌីតគាំទ្រកងទ័ព និងរដ្ឋាភិបាលយេម៉េនដែលប្រឆាំងនឹងហ៊ូទី ហើយដែលត្រូវបានទទួលស្គាល់ដោយសហគមន៍អន្តរជាតិ។ ចំណែកហ៊ូទីត្រូវបានឧបត្ថម្ភគាំទ្រដោយប្រទេសអុីរ៉ង់។ ហ៊ូទីថ្វីដ្បិតមានឈ្មោះជាក្រុមឧទ្ទាមក្រៅច្បាប់ក៏ពិតមែន ប៉ុន្តែពួកគេមានកម្លាំងយោធាខ្លាំងក្លា និងកំពុងកាន់កាប់ទឹកដីមួយផ្នែកធំនៅយេម៉េន៕ ប្រភព៖ Reuters
ចែករំលែកព័តមាននេះ