ADផ្ទាំងផ្សព្វផ្សាយពាណិជ្ជកម្ម

Picture

ជំនន់​ទឹកភ្លៀង! ជន់​លិច​ខ្នង​ទំនប់​បង្ហៀរ​បឹង​ស្នេហ៍ ​ពលរដ្ឋ​នាំ​គ្នា​ទៅ​លេង​កកកុញ​រាល់ថ្ងៃ

1 ខែ មុន
  • ព្រៃវែង

ខេត្ត​ព្រៃវែង ៖ មនុស្ស​រាប់រយ​នាក់ បាន​ផ្អើល​ទៅ​លេង​នៅ​លើ​ខ្នង​ទំនប់​បង្ហៀរ​បឹង​ស្នេហ៍ ដែល​ស្ថិត​នៅ​ក្នុង​ឃុំ​ធា​យ ស្រុក​បាភ្នំ ខេត្តព្រៃវែង ដោយសារ​តែ​មានទឹក​ហូរ​កាត់​ខ្នង​ទំនប់ បង្កើត​ជា​បរិយាកាស​គួរ​ឲ្យ​ចង់​ងូតទឹក​លេង​កម្សាន្ត​។

អាជ្ញាធរ​ឃុំ​ធា​យ​បាន​ឲ្យ​ដឹង​ថា ទឹក​ដែល​ហូរ​កាត់​ខ្នង​ទំនប់​បង្ហៀរ​បឹង​ស្នេហ៍​នេះ មិនមែន​ជា​ទឹកជំនន់​នោះ​ទេ ប៉ុន្តែ​ជា​ជំនន់​ទឹកភ្លៀង ដែល​ហូរ​ចេញពី​បឹង​ស្នេហ៍ ហូរ​កាត់​ទំនប់​បង្ហៀរ ហើយ​គួប​ផ្សំ​នៅ​សងខាង​ផ្លូវ មាន​គេ​លក់​ចំណីអាហារ​ជា​ច្រើន​ផង​នោះ ទើប​ធ្វើ​ឲ្យ​អ្នកស្រុក​ដែល​ធ្វើ​ដំណើរ​ឆ្លងកាត់​ទី​នេះ​ចាប់អារម្មណ៍ និង​នាំ​គ្នា​មក​លេង​​កម្សាន្ត​​យ៉ាង​កុះករ​បែប​នេះ​ទៅ​។

អាជ្ញាធរ​ឃុំ​ធា​យ​បាន​បញ្ជាក់​ថា ខ្នង​ទំនប់​បង្ហៀរ​បឹង​ស្នេហ៍​នេះ​ត្រូវ​បាន​ជំនន់​ទឹកភ្លៀង​ហូរ​កាត់​តាំងពី​ថ្ងៃ​ទី ១០ តុលា​មក​ម្ល៉េះ មក​ដល់​ពេល​នេះ​នៅ​មិន​ទាន់​ស្រក​អស់​នៅឡើយ​ទេ ហើយពី​មួយ ថ្ងៃ​ទៅ​មួយ​ថ្ងៃ ចំនួន​ប្រជាពលរដ្ឋ​ដែល​មក​លេង​​កម្សាន្ត​​នៅ​ទី​នេះ ក៏​កាន់តែ​ច្រើន​ផង​ដែរ ដោយ​អ្នកខ្លះ​នាំ​កូនចៅ​មក​មុជទឹក​លេង​កម្សាន្ត និង​ខ្លះ​ទៀត​នាំ​គ្នា​មក​ហូប​ចំណីចំណុក​ផ្សេង​ៗ​ទៅ​តាម​ចំណង់​ចំណូលចិត្ត​រៀង​ៗ​ខ្លួន​។

គួរ​បញ្ជាក់​ផង​ដែរ​ថា ដោយសារ​មាន​ប្រជាពលរដ្ឋ​មក​លេង​​កម្សាន្ត​​ច្រើន​បែប​នេះ អាជ្ញាធរ​ក៏​បាន​ដាក់​កម្លាំង​សមត្ថកិច្ច​ជា​ច្រើន​នាក់ នៅ​ប្រចាំការ​ក្នុង​តំបន់​នោះ ដើម្បី​ការពារ​កុំអោយ​មាន​បញ្ហា​អ្វី​កើតឡើង ជា​ពិសេស​គឺ​ជួយ​សម្រួល​នៅ​លើ​ដងផ្លូវ កុំអោយ​មានការ​កកស្ទះ​ចរាចរណ៍​ផង​ដែរ​ ៕​