កម្មការិនី២នាក់ ជិះម៉ូតូពីស្រុកកំណើត ត្រៀមចូលធ្វើការស្អែក ស្រាប់តែជួបគ្រោះអកុសល ស្លា.ប់ម្នាក់ របួ.សធ្ងន់ម្នាក់
- ភ្នំពេញ
រាជធានីភ្នំពេញ៖ បុរសជាអ្នកបើកបររថយន្តសណ្ដោងកន្ទុយរ៉ឺម៉កម្នាក់ បានស្រវឹងស្រាទាំងថ្ងៃ ហើយបានបើកបោះពួយរថយន្តខាងលើក្នុងល្បឿនលឿន ជ្រុលទៅបុកកម្មការិនីរោងចក្រ២នាក់ដែលកំពុងជិះម៉ូតូឌុបគ្នាពីក្រោយពេញទំហឹង និងអូសជាច្រើនម៉ែត្រ បណ្ដាលឱ្យស្ត្រីរងគ្រោះម្នាក់បានស្លាប់ភ្លាមៗនៅនឹងកន្លែង រីឯម្នាក់ទៀតបានរបួសធ្ងន់ធ្ងរ ចំណែកបុរសអ្នកបើករថយន្តបង្កខាងលើត្រូវបានមហាជនឃាត់ខ្លួនបាន ទាំងនៅក្នុងដៃកាន់ស្រាបៀរ១កំប៉ុងផឹកធ្វើព្រងើយដូចអត់មានរឿងអ្វីកើតឡើងថែមទៀតផង ។
ឧប្បត្តិហេតុនេះបានកើតឡើង កាលពីវេលាម៉ោង១និង៣០នាទីរសៀលថ្ងៃទី១៤ ខែតុលា ឆ្នាំ២០២៦ នៅតាមមហាវិថីឈ្នះឈ្នះ ត្រង់ចំណុចកែងផ្លូវបេតុងចូលផ្សារសាមគ្គី ស្ថិតនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះដែលស្លាប់ឈ្មោះខេង សារ៉ូ អាយុ២៩ឆ្នាំ មុខរបរកម្មការិនីរោងចក្រ មានទីលំនៅភូមិបឹង ឃុំជើងដើង ស្រុកបារយណ៍ ខេត្តកំពង់ធំ ។ ចំណែកស្ត្រីអ្នករងរបួសធ្ងន់ឈ្មោះជួន សុខឡែន អាយុ២៧ឆ្នាំ មុខរបរបរកម្មការិនីរោងចក្រ មានទីលំនៅភូមិ ឃុំជាមួយអ្នកស្លាប់ដែរ ។ អ្នកទាំង២ស្នាក់នៅផ្ទះជួលនៅក្នុងភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ ជនរងគ្រោះទាំង២នាក់បានជិះម៉ូតូ១គ្រឿងម៉ាកហុងដាឌ្រីម ធុនសេ១២៥ ពណ៍ខ្មៅ ពាក់ស្លាកលេខ ភ្នំពេញ 1IN-7579 ។ ឌុបគ្នាធ្វើដំណើរតាមមហាវិថីឈ្នះឈ្នះ ក្នុងទិសដៅពីជើងទៅត្បូង ដោយឈ្មោះខេង សារ៉ូ ជាអ្នកបើកម៉ូតូ ។ លុះពេលទៅដល់ត្រង់ចំណុចកើតហតុ ស្រាប់តែមានរថយន្ត១គ្រឿងម៉ាកFUSO ពណ៍ខៀវ ឆ្នូតទឹកប្រាក់ ក្បាលពាក់ស្លាកលេខកំពង់ស្ពឺ3A-1742 ។ និងកន្ទុយពាក់ស្លាកលេខកំពង់ស្ពឺ4A-0281 បើកបរក្នុងទិសដៅស្របគ្នាទៅដល់បុកពីក្រោយទាំងកំរោលតែម្ដង ។
សមត្ថកិច្ចបានប្រាប់ឲ្យដឹងថា ខណៈនោះរថយន្តខាងលើមិនបានឈប់ភ្លាមភ្លាមៗនោះទេ បានបើកទៅមុខអូសទាំងមនុស្សនិងម៉ូតូ ជាច្រើនម៉ែត្រទើបឈប់ ។ បណ្ដាលឲ្យស្ត្រីអ្នកបើកម៉ូតូម្នាក់ស្លាប់ភ្លាមៗនៅនឹងកន្លែង រីឯម្នាក់ទៀតដែលជិះពីក្រោយរួមដំណើររងរបួសធ្ងន់ បន្ទាប់មករថយន្តនោះប្រុងបើករត់បន្តទៀត ប៉ុន្តែត្រូវបានមហាជននាំគ្នាឃាត់បានទាំងរថយន្តនិងអ្នកបើកបរ ។ ខណៈនោះអ្នកបើកបររថយន្តបង្កខាងលើស្រវឹងស្រាដើរទ្រេតទ្រោត និងកាន់ស្រាបៀរ១កំប៉ុងផឹកធ្វើព្រងើយដូចគ្មានរឿងអ្វីកើតឡើងសោះ ។
សាច់ញាតិជនរងគ្រោះបាននិយាយថា នៅមុនពេលកើតហេតុការណ៍គ្រោះថ្នាក់ចរាចរណ៍ខាងលើនោះ ក្រោយពេលទៅជួបជុំក្រុមគ្រួសារក្នុងឱកាសបុណ្យភ្ជុំបិណ្ឌ រួច ។ ជនរងគ្រោះទាំង២នាក់បានជិះម៉ូតូឌុបគ្នាចេញពីពីផ្ទះនៅខេត្តកំពង់ធំ ឆ្ពោះទៅកាន់ផ្ទះជួលភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ដើម្បីត្រៀមចូលធ្វើការនៅថ្ងៃស្អែកថ្ងៃទី១៥ ខែតុលា ។ ពេលនោះក្រុមគ្រួសារពុំនឹកគិតដល់ថា ពួកនាងទាំង២នាក់មានរឿងអកុសលនោះឡើយ រហូតដល់ពេលកើតហេតុ ស្រាប់តែមានគេថាពួកនាងបានជួបគ្រោះថ្នាក់ចរាចរណ៍នៅតាមផ្លូវ បណ្ដាលឲ្យស្លាប់ម្នាក់របួសម្នាក់បែបនេះបាត់ទៅហើយ ។
សមត្ថកិច្ចបានប្រាប់ឲ្យដឹងបន្ថែមថា ក្រោយពេលកើតហេតុ ក្រុមរុករកនិងសង្គ្រោះ៧១១ បានដឹកយកស្ត្រីដែលរងរបួសធ្ងន់ទៅកាន់មន្ទីរពេទ្យដើម្បីសង្គ្រោះបន្ទាន់ ។ ចំណែកកម្លាំងការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញបានធ្វើការវាស់វែង រួចនាំយករថយន្តនិងអ្នកបើកបរ ព្រមទាំងម៉ូតូរបស់ជនរងគ្រោះទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ