ប្រជាពលរដ្ឋរងគ្រោះដោយទឹកជំនន់នៅតាមទីទួលសុវត្ថិភាព ត្រូវបានអនុញ្ញាតឱ្យវិលត្រឡប់ទៅលំនៅឋានវិញ ក្រោយទឹកស្រក
- បន្ទាយមានជ័យ
ខេត្តបន្ទាយមានជ័យ ៖ អាជ្ញាធរខេត្តបានអនុញ្ញាតឱ្យប្រជាពលរដ្ឋ ដែលស្នាក់នៅតាមទីទួលសុវត្ថិភាពត្រឡប់ទៅលំនៅឋានវិញ ក្រោយពេលទឹកជំនន់ស្រកពីលំនៅឋាន ។ ការអនុញ្ញាតនេះ គឺនៅពេលឯកឧត្តមអភិបាលខេត្តទៅពិនិត្យកាលពីថ្ងៃទី១២ ខែតុលា ឆ្នាំ២០២៦ នៅតាមភូមិសាស្គ្រក្នុងខេត្តបន្ទាយមានជ័យ ។
ក្រោយពេលប្រារព្ធពិធីបុណ្យភ្ជុំបិណ្ឌរួច ឯកឧត្តម អ៊ុំ រាត្រី អភិបាលខេត្ត បានដឹកនាំក្រុមការងារចុះពិនិត្យមើលស្ថានភាពទឹកនិងទីទួលសុវត្ថិភាព ដែលប្រជាពលរដ្ឋរងគ្រោះដោយទឹកជំនន់ទៅស្នាក់នៅ ហើយពេលនេះបានអនុញ្ញាតឱ្យត្រឡប់ទៅលំនៅឋានវិញហើយ ក្រោយពេលទឹកជំនន់បានស្រកពីលំនៅឋាន ។
ឯកឧត្តម អ៊ុំ រាត្រី មានប្រសាសន៍ថា តាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តនៅថ្ងៃទី១២ ខែតុលា ឆ្នាំ២០២៦ ខេត្តបន្ទាយមានជ័យដែលមាន៩ស្រុក-ក្រុង មានឃុំ-សង្កាត់ចំនួន៤៥ ស្មើនឹង ៣១៧ភូមិ ដែលរងគ្រោះដោយទឹកជំនន់ ប៉ះពាល់ដល់ប្រជាពលរដ្ឋចំនួន ១៧ ៩៣៤គ្រួសារ គិតជាមនុស្សរាយចំនួន ៧២ ០៥៩នាក់ ។
ឯកឧត្តមបញ្ជាក់ថា ប្រជាពលរដ្ឋដែលរងគ្រោះដោយទឹកជំនន់ះធ្ងន់ធ្ងរ ត្រូវបានជម្លៀសទៅកាន់ទីទួលសុវត្ថិភាពចំនួន ២ ៣៨៦គ្រួសារ គិតជាមនុស្សរាយចំនួន ១១ ០៦១នាក់ ។ ប៉ះពាល់ដំណាំស្រូវ ៣៧ ៥១០ហិកតា ដំឡូងមី ១៦២ហិកតា ដំណាំរួមផ្សំ៤៩ហិកតា សត្វពាហនៈ៤២៩ក្បាល ។ ស្រូវដែលខូចខាតដោយទឹកជំនន់លិច ១២ ១៤៩ហិកតា លិចសាលារៀនចំនួន ៧២កន្លែង មណ្ឌលសុខភាពចំនួន៨កន្លែង ផ្លូវចំនួន ៩៥៥ខ្សែ មានប្រវែង ៥៥៨០៣៩ម៉ែត្រ ៕
ចែករំលែកព័តមាននេះ