ប្រជាពលរដ្ឋនៅខេត្តសៀមរាបឡើងឡានក្រុងឥតគិតថ្លៃរបស់រាជរដ្ឋាភិបាល ដើម្បីវិលត្រឡប់ទៅរាជធានីភ្នំពេញវិញ
- សៀមរាប
ខេត្តសៀមរាប ៖ នៅថ្ងៃទី១៣ ខែតុលា ឆ្នាំ២០២៦ នេះ នៅឯមណ្ឌលរដ្ឋបាលមន្ទីរខេត្តសៀមរាប មានប្រជាពលរដ្ឋយ៉ាងច្រើនកុះករបានមកប្រមូលផ្តុំគ្នា ដើម្បីធ្វើដំណើរត្រឡប់ទៅកាន់រាជធានីភ្នំពេញវិញ តាមរយៈរថយន្តក្រុងឥតគិតថ្លៃ ដែលផ្តល់ជូនដោយរាជរដ្ឋាភិបាល ក្រោយពីពួកគាត់បានអញ្ជើញមកលេងស្រុកកំណើត ជួបជុំក្រុមគ្រួសារ និងដើរកម្សាន្តក្នុងឱកាសពិធីបុណ្យភ្ជុំបិណ្ឌ។
ចំពោះការយកចិត្តទុកដាក់នេះ ប្រជាពលរដ្ឋដែលបានធ្វើដំណើរតាមរថយន្តក្រុងឥតគិតថ្លៃ បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅបំផុត ចំពោះសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលតែងតែគិតគូរពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋ ពិសេស ការជួយសម្រួលដល់ការធ្វើដំណើរត្រឡប់ទៅបំពេញការងារនៅរាជធានីភ្នំពេញវិញដោយសុវត្ថិភាព និងមិនអស់ប្រាក់កាស។
ប្រជាពលរដ្ឋបានបញ្ជាក់បន្ថែមថា សេវាកម្មដឹកជញ្ជូនតាមរថយន្តក្រុងឥតគិតថ្លៃនេះ ពិតជាមានអត្ថប្រយោជន៍ខ្លាំងណាស់ ព្រោះវាបានជួយកាត់បន្ថយការចំណាយក្នុងគ្រួសារបានមួយកម្រិត មានសុវត្ថិភាពខ្ពស់ក្នុងការធ្វើដំណើរ ព្រមទាំងបង្ហាញពីការយកចិត្តទុកដាក់ និងភាពកក់ក្តៅពីរាជរដ្ឋាភិបាលមកលើប្រជាពលរដ្ឋគ្រប់ពេលវេលា ។
ចែករំលែកព័តមាននេះ