ប្រជាពលរដ្ឋសម្រុកឆ្លងដទទឹងនៅស្រុកកំពង់លែងដើម្បីត្រឡប់ទៅបំពេញការងារវិញ បង្កឱ្យមានការកកស្ទះចរាចរណ៍បន្តិចបន្តួច
- កំពង់ឆ្នាំង
ខេត្តកំពង់ឆ្នាំង ៖ ក្រោយពិធីបុណ្យកាន់បិណ្ឌ និងភ្ជុំបិណ្ឌត្រូវបានបញ្ចប់២ថ្ងៃ ពោលគឺនៅថ្ងៃទី១៣ ខែតុលា ឆ្នាំ ២០២៦ នេះ ការធ្វើដំណើររបស់បងប្អូនប្រជាពលរដ្ឋដែលចាកចេញទៅធ្វើការងាររបស់ខ្លួនវិញ និងខ្លះទៀតបានវិលត្រឡប់ពីផ្លូវជាតិលេខ៦អា ខេត្តកំពង់ធំ ហើយឆ្លងកាត់មក ស្រុកកំពង់លែង ខេត្តកំពង់ឆ្នាំង នាំគ្នាសម្រុក ឆ្លងដទទឹងនៅមុខសាលាស្រុកកំពង់លែង ធ្វើឱ្យចរាចរណ៍ត្រូវបានកកស្ទះ ។ យ៉ាងនេះក្តី មិនស្ទះដូចមុនថ្ងៃភ្ជុំបិណ្ឌដែរ ។
លោក សៀង ប៊ុនសាន អធិការ នគរបាលស្រុកកំពង់លែង បានបញ្ជាក់ប្រាប់កោះសន្តិភាពតាមទូរសព្ទថា ដោយបានការយកចិត្តទុកដាក់ពីអភិបាលខេត្ត លោកស្នងការនគរបាលខេត្ត លើបញ្ហាបងប្អូនប្រជាពលរដ្ឋវិលត្រឡប់ទៅកន្លែងធ្វើការវិញ និងខ្លះទៀត ដែលអញ្ជើញធ្វើដំណើរពីខេត្តនានាតាមផ្លូវជាតិលេខ៦ ក៏ត្រឡប់មកឆ្លងដទទឹងនៅកំពង់លែងក្នុងគោលបំណងទៅខេត្តកំពង់ឆ្នាំង និងបន្តទៅគោលដៅការងាររាជធានីភ្នំពេញវិញ មានចំនួនច្រើនធ្វើឱ្យមានការកកស្ទះចរាចរណ៍ ដូចនេះហើយ កម្លាំងអធិការនគរបាលស្រុកកំពង់លែងទាំងអស់ បានចេញសម្រួលចរាចរណ៍តាមដងផ្លូវ ពិសេស នៅចំណុចចុះ
សាឡាងមុខសាលាស្រុកកំពង់លែង ។
បញ្ហាបែបនេះ មិនមែនទើបតែឆ្នាំនេះទេ គឺរៀងរាល់ឆ្នាំពេលក្រោយពិធីបុណ្យទានម្ដងៗ ដូចជាបុណ្យចូលឆ្នាំ និងបុណ្យភ្ជុំបិណ្ឌជាដើម។ប៉ុន្តែសម្រាប់ឆ្នាំ២០២៦នេះ ចំនួនប្រជាពលរដ្ឋមានចំនួនច្រើនបានសម្រុកឆ្លងដទទឹងទៅខេត្តកំពង់ឆ្នាំង និងរាជធានីភ្នំពេញ ។
គួរបញ្ជាក់ដែរថា ការកកស្ទះចរាចរណ៍នេះ កើតឡើងមុនពេលបុណ្យទាន ពេលដែលប្រជាពលរដ្ឋវិលត្រឡប់ទៅស្រុកកំណើត និងក្រោយពិធីបុណ្យទានពួកគាត់វិលត្រឡប់ទៅធ្វើការវិញជារៀងរាល់ឆ្នាំ ។
ចែករំលែកព័តមាននេះ