បុណ្យកាន់បិណ្ឌទី១៣និងទី១៤ មានការកកស្ទះចរាចរណ៍ ខណៈដែលប្រជាពលរដ្ឋសម្រុកឆ្លងដទៅស្រុកកំណើត និងខ្លះទៀតឆ្លងពីខេត្តកំពង់ឆ្នាំង ទៅខេត្តកំពង់ធំ
- កំពង់ឆ្នាំង
ខេត្តកំពង់ឆ្នាំង ៖ ចរាចរណ៍ចាប់ផ្ដើមស្ទះតាំងពីព្រលឹមស្រាងៗ ចាប់ពីចំណុចទំនប់បារាំង រហូតដល់កំពង់ផែផ្សារក្រោម មានចម្ងាយប្រមាណជិត១គីឡូម៉ែត្រ ក្នុងសង្កាត់ផ្សារឆ្នាំងក្រុងកំពង់ឆ្នាំង គ្រាដែលបងប្អូនប្រជាពលរដ្ឋនាំគ្នាសម្រុកឆ្លងដទទឹងទៅស្រុកកំណើត ឯស្រុកកំពង់លែង ។
ចរាចរណ៍កកស្ទះនេះ បានចាប់ផ្ដើមតាំងពីថ្ងៃទី៩ ដល់ថ្ងៃទី១០ ខែតុលា ឆ្នាំ២០២៦ គឺក្នុងថ្ងៃកាន់បិណ្ឌទី១៣ និងទី១៤ ដែលនៅសល់មួយថ្ងៃទៀតនឹងចូលដល់ថ្ងៃភ្ជុំធំ ។
ចរាចរណ៍កកស្ទះនេះ ដោយសារតែបងប្អូនត្រូវឆ្លងដទទឹង ទៅស្រុកកំពង់លែង ប៉ុន្តែមានខ្លះ ក៏ត្រូវធ្វើដំណើរគេចពីផ្លូវជាតិលេខ៦ ដែលមានការកកស្ទះដែរនោះ ដោយប៉ងថា នឹងមកផ្លូវជាតិលេខ៥ ហើយឆ្លងដទទឹងទៅស្រុកកំពង់លែង និងបន្តទៅខេត្តកំពង់ធំ ហើយក៏ត្រូវកកស្ទះដូចគ្នានេះដែរ ។
បើទោះបីសាឡាងដែលត្រូវចម្លងមានចំនួនច្រើន ប្រហែល៦គ្រឿងយ៉ាងណាក្តី ក៏ការធ្វើដំណើរនៅតែកកស្ទះដដែល ។ សមត្ថកិច្ចមានការមមារញឹកក្នុងការសម្រួលចរាចរណ៍ ដែលគេសង្កេតឃើញថា ចរាចរណ៍បានកកស្ទះតែមួយចំហៀងផ្លូវ គឺផ្លូវដែលត្រូវទៅកំពង់ផែឆ្លងទៅស្រុកកំពង់លែង ។ ចំណែកឯផ្លូវឡើងពីដទទឹងមកក្នុងក្រុងកំពង់ឆ្នាំងវិញ មិនមានការកកស្ទះទេ ។
ប្រជាពលរដ្ឋជាអ្នកធ្វើដំណើរដែលកំពុងកកស្ទះបាននិយាយថា ប្រសិនបើមានស្ពានឆ្លងពីខេត្តកំពង់ឆ្នាំង ទៅស្រុកកំពង់លែង និងទៅខេត្តកំពង់ធំ មិនដឹងជាស្រួលយ៉ាងណាទេ មិនពិបាករង់ចាំឆ្លងដបែបនេះ ។
ចែករំលែកព័តមាននេះ