រាជធានីភ្នំពេញ ៖ ក្រសួងធនធានទឹក និងឧតុនិយម បានបញ្ជាក់ថា ព្យុះទី២៨ និងព្យុះទី២៩ បន្តមានឥទ្ធិពលលើកម្ពុជា ដែលអាចបង្កជាផលប៉ះពាល់ដល់ការធ្វើដំណើរ ការជួបជុំ នៅតាមទីវត្តអារាម និងសកម្មភាពផ្សេងៗរបស់បងប្អូនប្រជាពលរដ្ឋក្នុងឱកាស នៃពិធីបុណ្យភ្ជុំបិណ្ឌ ។
យោងតាមសេចក្តីជូនដំណឹង ស្តីពីស្ថានភាពធាតុអាកាស ក្នុងឱកាសនៃពិធីបុណ្យភ្ជុំបិណ្ឌ ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៦ របស់ក្រសួងធនធានទឹក និងឧតុនិយម បានលើកឡើងថា ព្យុះទី២៨ ឈ្មោះ ណូឡូ (Nolo) T2628 និងព្យុះទី២៩ ឈ្មោះ កូហ្គូម៉ា (Koguma) T2629 នៅតែបន្តមានឥទ្ធិពលលើរបបខ្យល់ មូសុងនិរតីដែលបក់លើឈូងសមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រ កម្ពុជា និងលើព្រះរាជាណាចក្រកម្ពុជា ។
ក្រសួង បានលើកឡើងទៀតថា ព្រះរាជាណាចក្រកម្ពុជា ពុំស្ថិតនៅក្នុងគន្លងផ្លូវដើររបស់ព្យុះទាំងពីរនេះទេ ។
ជាមួយគ្នានោះដែរ ក្រសួងក្រសួង បន្ថែមថា ស្ថានភាពបែបនេះ នឹងធ្វើឱ្យអាកាសធាតុនៅក្នុងព្រះរាជាណាចក្រកម្ពុជា ចាប់ពីថ្ងៃទី៩ ដល់ថ្ងៃទី១៥ ខែតុលា ឆ្នាំ២០២៦ មានពពកច្រើន និងមានភ្លៀងធ្លាក់រាយប៉ាយនៅក្នុងក្របខ័ណ្ឌទូទាំងប្រទេសដោយលាយឡំជាមួយ ផ្គររន្ទះ និងខ្យល់កន្ត្រាក់។ ចំណែករលកសមុទ្របោកបក់ខ្លាំងដែលមានកម្ពស់មធ្យមអប្បរមា ០,៥០ម៉ែត្រ និងមធ្យម អតិបរមា ១,៧៥ម៉ែត្រ ។
ក្រសួង បានបញ្ជាក់បន្ថែមថា ៖ “ស្ថានភាពអាកាសធាតុដូចខាងលើនឹងអាចបង្កជាផលប៉ះពាល់ដល់ការធ្វើដំណើរ ការជួបជុំ នៅតាមទីវត្តអារាម និងសកម្មភាពផ្សេងៗរបស់បងប្អូនប្រជាពលរដ្ឋក្នុងឱកាស នៃពិធីបុណ្យភ្ជុំបិណ្ឌនេះផងដែរ” ។
ក្រសួងបន្ថែមទៀតថា អាស្រ័យដូចបានជម្រាបជូនខាងលើ ក្រសួងធនធានទឹក និងឧតុនិយម សូមជូនដំណឹងដល់សាធារណជន និងអាជ្ញាធរដែនដី មេត្តាយកចិត្តទុកដាក់ និងប្រុងប្រយ័ត្នខ្ពស់ ជាពិសេសបងប្អូនដែលធ្វើដំណើរតាមផ្លូវគោក និងផ្លូវទឹក ដើម្បីជៀសវាងពីគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ។
ក្រសួងធនធានទឹក និងឧតុនិយម នឹងបន្តធ្វើការតាមដាន និងវិភាគអំពីស្ថានភាពធាតុអាកាសដើម្បីជម្រាបជូន ជាបន្តបន្ទាប់ក្នុងករណីមានការប្រែប្រួល ៕
ចែករំលែកព័តមាននេះ