សម្តេចតេជោ៖ ប្រជាជនប្រមាណ៣ម៉ឺននាក់បានចេញដំណើរទៅ-មកស្រុកកំណើតតាមរយៈឡានក្រុងសាធារណៈឥតគិតថ្លៃ
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភាបានឱ្យដឹងថា ប្រជាជនប្រមាណ៣ម៉ឺននាក់បានចេញដំណើរទៅ-មកស្រុកកំណើត តាមរយៈរថយន្តក្រុងសាធារណៈឥតគិតថ្លៃដែលរៀបចំដោយរដ្ឋបាលរាជធានីភ្នំពេញ ។
សម្តេចតេជោ ហ៊ុន សែន បានសរសេរលើបណ្តាញសង្គម នៅរសៀលថ្ងៃទី៩ ខែតុលា ឆ្នាំ២០២៦ ថា រថយន្តក្រុងសាធារណៈទាំងអស់នឹងបន្តដឹកជញ្ជូនសាធារណៈជនដោយឥតគិតថ្លៃរហូតដល់ថ្ងៃទី១៣ តុលា ឆ្នាំ២០២៧ ។
ឯកឧត្តម ឃួង ស្រេង អភិបាលរាជធានីភ្នំពេញបានលើកឡើងថា ជារៀងរាល់ឆ្នាំ រដ្ឋបាលរាជធានីទទួលនូវការណែនាំ និងអនុសាសន៍ ដឹកនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ក្នុងការបម្រើប្រជាពលរដ្ឋក្នុងរដូវបុណ្យទាន ។ បន្ទាប់មកទៀត នៅក្នុងនីតិកាលទី៧នេះ សម្តេចធិបតី ហ៊ុន ម៉ាណែត ក៏បន្តនូវប្រពៃណីនេះ តាមគោលការណ៍របស់សម្តេចតេជោ ដោយបានឲ្យរដ្ឋបាលរាជធានីភ្នំពេញ រៀបចំរថយន្តក្រុងចំនួន៦០០គ្រឿង ដើម្បីជូនដំណើរពួកគាត់ ទៅបុណ្យភ្ជុំបិណ្ឌតាមប្រពៃណីជាតិ នៅតាមបណ្តាខេត្ត ។
ប៉ុន្តែឆ្នាំនេះចម្លែក ដោយឃើញបងប្អូនពលករ ក៏ដូចជាបងប្អូនប្រជាពលរដ្ឋ ដែលមកធ្វើកិច្ចការងារ ប្រកបមុខរបរ អាជីវកម្ម នៅរាជធានីភ្នំពេញ បានធ្វើដំណើរទៅខេត្តទាំង២៤នេះ មានចំនួនច្រើនជាងមុន ដោយសារគាត់បានឃើញអំពីអត្ថប្រយោជន៍ ដែលសម្តេចធិបតីបានផ្តល់ជូនគាត់ ក៏ដូចជា អ្នកបម្រើសេវាដឹកជញ្ជូន មានភាសាផ្អែមល្ហែម ក្នុងនាមជាជាតិតែមួយ ក្រោមដំបូលរាជរដ្ឋាភិបាលតែមួយក្រោមការដឹកនាំរបស់សម្តេចធិបតី។
ឯកឧត្តមបន្ថែមថា ភាពជិតស្និទ្ធិនេះ បានធ្វើឲ្យគាត់ងាកមកប្រើប្រាស់សេវាដឹកជញ្ជូនសាធារណៈរបស់រថយន្តក្រុង ដោយមិនគិតតថ្លៃនេះថែមទៀត ។ ជានេះទៀត គាត់អាចសន្សំថវិកាបានម្នាក់យ៉ាងហោចណាស់១៥ដុល្លារ ក្នុងពេលទៅ និងពេលត្រឡប់មកវិញ ១៥ទៀត ។ ដូច្នេះហើយ ទើបពួកគាត់ងាកមកប្រើប្រាស់សេវានេះ ច្រើនឡើងពីមួយឆ្នាំទៅមួយឆ្នាំ។
ឯកឧត្ដម ឃួង ស្រេង បានបន្តថា កម្មករម្នាក់យ៉ាងតិចត្រូវចំណាយ១៥ដុល្លារធ្វើដំណើរទៅតាមបណ្តាខេត្តឆ្ងាយៗ ហើយជារៀងរាល់ឆ្នាំពលរដ្ឋបានមកទទួលសេវាជិះរថយន្តក្រុងនេះប្រមាណ៥ម៉ឺននាក់ ទៅ៦ម៉ឺននាក់ ដែលអាចកាត់បន្ថយការចំណាយប្រជាពលរដ្ឋបានច្រើន។នេះ ជាគោលការណ៍ដ៏ឈ្លាសវៃ របស់សម្តេចធិបតី បន្តវេនពីសម្តេចតេជោ ហ៊ុន សែន។
តាមអនុសាសន៍ណែនាំរបស់សម្តេចធិបតីថាទោះបីជាអត់ទាន់ដល់ពេលបើកប្រាក់ខែក៏ដោយ ប៉ុន្តែក្រសួងបានណែនាំទៅដល់ម្ចាស់រោងចក្រ កាលពីម្សិលមិញឃើញថា បានបើកប្រាក់ខែជូនបងប្អូនយើងហើយ បងប្អូនយើង ត្រឡប់ទៅផ្ទះជាមួយនឹងរថយន្ត ដែលមិនគិតថ្លៃហើយ មានប្រាក់ហោប៉ៅ សម្រាប់ទៅធ្វើបុណ្យធ្វើទានផងដែរ នេះជាការរួមចំណែក មួយដើម្បីធ្វើម៉េចឲ្យពិធីបុណ្យភ្ជុំបិណ្ឌនេះ ជាពិធីដែលយើងជួបជុំគ្នា សប្បាយចិត្តទាំងអស់គ្នាបាន។
យោងតាមសេចក្តីជូនដំណឹងរបស់រដ្ឋបាលរាជធានីបានឱ្យដឹងថា៖ អនុវត្តតាមប្រសាសន៍ដឹកនាំដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងកិច្ចប្រជុំពេញអង្គគណៈរដ្ឋមន្ត្រី នៅទីស្តីការគណៈរដ្ឋមន្ត្រី (វិមានសន្តិភាព) កាលពីព្រឹកថ្ងៃទី២៥ ខែកញ្ញា ឆ្នាំ២០២៦ រដ្ឋបាលរាជធានីភ្នំពេញ នឹងរៀបចំរថយន្តក្រុងចំនួន ៦០០គ្រឿង សម្រាប់បម្រើសេវាដឹកជញ្ជូនសាធារណៈ ដោយមិនបង់ប្រាក់ រយៈពេល០៥ថ្ងៃ ចាប់ពីថ្ងៃទី០៩ ដល់ថ្ងៃទី១៣ ខែតុលា ឆ្នាំ២០២៦ ដើម្បីជួយសម្រួលដល់ការចំណាយរបស់បងប្អូនប្រជាពលរដ្ឋទាំងអស់ក្នុងការធ្វើដំ ណើរ ទៅលេងស្រុកកំណើត ជួបជុំបងប្អូនក្រុមគ្រួសារក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ៕
ចែករំលែកព័តមាននេះ