រាជធានីភ្នំពេញ ៖ គណៈកម្មការផ្សះផ្សា នៃអនុសញ្ញាអង្គការសហប្រជាជាតិ ស្ដីពីនីតិសមុទ (UNCLOS) នឹងបើកកិច្ចប្រជុំលើកទី២ ជាមួយកម្ពុជា និងថៃ នៅទីក្រុងឡាអេ ចាប់ពីថ្ងៃទី១៤ ដល់ថ្ងៃទី១៨ ខែតុលា ២០២៦ នេះបើយោងតាមសេចក្ដីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ ។
តុលាការមជ្ឈត្តការអចិន្ត្រៃយ៍ បានប្រកាសនៅថ្ងៃនេះថា ចាប់ពីថ្ងៃទី១៤ ដល់ថ្ងៃទី១៨ ខែតុលា ឆ្នាំ២០២៦ គណៈកម្មការផ្សះផ្សា ដែលត្រូវបានបង្កើតឡើងក្រោមឧបសម្ព័ន្ធ៥ នៃអនុសញ្ញាអង្គការសហប្រជាជាតិស្តីពី នីតិសមុទ្រ (UNCLOS) នឹងបើកកិច្ចប្រជុំលើកទី២ ជាមួយកម្ពុជា និងថៃ នៅទីក្រុងឡាអេ ប្រទេសហូឡង់។ កិច្ចប្រជុំនេះ គឺជាជំហានដ៏សំខាន់មួយទៀត នៅក្នុងដំណើរការដោយសន្តិវិធី ដែលផ្តួចផ្តើមឡើងដោយកម្ពុជា ដើម្បីដោះស្រាយការខ្វែងគំនិតគ្នាលើបញ្ហាដែនសមុទ្រ នៃប្រទេសទាំងពីរ។ ផ្អែកលើមូលដ្ឋាននៃការពិភាក្សាប្រកបដោយស្ថាបនានៅក្នុងកិច្ចប្រជុំលើកទី១ នៅប្រទេសសិង្ហបុរី កិច្ចប្រជុំលើកនេះ នឹងផ្ដល់ឱកាសដល់ភាគីទាំងពីរស្វែងរកមធ្យោបាយ ដើម្បីសម្រេចបាន នូវវឌ្ឍនភាពបន្ថែមទៀត និងរកឃើញចំណុចដែល ឯកភាពគ្នា ពាក់ព័ន្ធនឹងការកំណត់ព្រំដែនសមុទ្រ ។
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ក្នុងនាម ជាភ្នាក់ងាររបស់រាជរដ្ឋាភិបាលកម្ពុជា អមដោយ ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ច ការព្រំដែន ជាភ្នាក់ងាររង នឹងដឹកនាំគណៈប្រតិភូមន្ត្រីជំនាញច្បាប់ ចូលរួមកិច្ចប្រជុំគណៈកម្មការផ្សះផ្សា នៅទីក្រុងឡាអេ ។
ដូចដែលបានគូសបញ្ជាក់ដោយ ឯកឧត្ដមឧបនាយករដ្ឋមន្ត្រី ប្រាក់ សុខុន នៅក្នុងសុន្ទរកថាបើករបស់ឯកឧត្តមនៅចំពោះមុខគណៈកម្មការផ្សះផ្សា គោលបំណងចម្បងរបស់កម្ពុជា គឺសម្រេចដំណោះស្រាយមួយ ដែលបម្រើផលប្រយោជន៍របស់ប្រជាជន នៃប្រទេសទាំងពីរ ហើយរួមចំណែកផងដែរដល់សន្តិភាព កិច្ចសហ-ប្រតិបត្តិការ និងវិបុលភាពរួមក្នុងតំបន់ ។
តាមរយៈដំណើរការនេះ កម្ពុជាមានចេតនាចុះសន្ធិសញ្ញាជាមួយថៃ កំណត់ព្រំដែនសមុទ្រតែមួយដែលខ្លួន គ្របដណ្ដប់លើគ្រប់គោលបំណងរវាងរដ្ឋទាំងពីរ ឬកិច្ចព្រមព្រៀងស្ដីពីការអភិវឌ្ឍរួម និងការថ្លែងចែកធនធាន ប្រកបដោយសមធម៌ ក្នុងអំឡុងពេលរង់ចាំការឈានដល់កិច្ចព្រមព្រៀងជាស្ថាពរស្តីពីព្រំដែនសមុទ្ររបស់ប្រទេសទាំងពីរ។ ប្រសិនបើមិនអាចសម្រេចបាននូវជម្រើសណាមួយក្នុងចំណោមជម្រើសទាំងពីរ កម្ពុជា នឹងស្នើសុំគណៈកម្មការផ្សះផ្សារៀបចំអនុសាសន៍ ដែលអាចប្រើជាមូលដ្ឋានសម្រាប់ការចរចានាពេលអនាគត ស្របតាមកាតព្វកិច្ចរបស់ប្រទេសទាំងពីរ ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ ។
កម្ពុជាសូមថ្លែងអំណរគុណជាថ្មីម្តងទៀតចំពោះប្រធាន និងសមាជិកទាំងអស់ នៃគណៈកម្មការផ្សះផ្សា ដែលបានបំពេញការងារប្រកបដោយការយកចិត្តទុកដាក់ និងពិចារណាយ៉ាងហ្មត់ចត់ និងសូមបញ្ជាក់ជាថ្មីនូវជំនឿទុកចិត្ត និងការគាំទ្រយ៉ាងពេញទំហឹងចំពោះដំណើរការផ្សះផ្សានេះ ។
កម្ពុជាមានជំនឿយ៉ាងមុតមាំថា ច្បាប់អន្តរជាតិផ្ដល់មូលដ្ឋានគ្រឹះសម្រាប់ដោះស្រាយវិវាទរវាងរដ្ឋនានា ដោយសន្តិវិធី។ កម្ពុជានឹងចូលរួមក្នុងកិច្ចប្រជុំនៅទីក្រុងឡាអេ ក្នុងស្មារតីស្មោះត្រង់ សហការ និងគោរពគ្នាទៅ វិញទៅមក ហើយត្រៀមធ្វើការជាមួយគណៈកម្មការផ្សះផ្សា និងព្រះរាជាណាចក្រថៃ ដើម្បីឈានទៅសម្រេចបាន នូវលទ្ធផលមួយប្រកបដោយយុត្តិធម៌ និងយូរអង្វែង ៕
ចែករំលែកព័តមាននេះ