រដ្ឋបាលខេត្តស្ទឹងត្រែង ជំរុញការប្រមូលសំរាម និងពង្រឹងអនាម័យទីក្រុងក្នុងឱកាសបុណ្យភ្ជុំបិណ្ឌ
- ស្ទឹងត្រែង
ខេត្តស្ទឹងត្រែង៖ រដ្ឋបាលខេត្តស្ទឹងត្រែងបានជំរុញឱ្យមន្ត្រី និងបុគ្គលិកបម្រើការងារផ្នែកអនាម័យ និងគ្រប់គ្រងសំណល់រឹង បន្តបង្កើនប្រសិទ្ធភាពការងារប្រមូលសំរាម និងថែរក្សាបរិស្ថាន ដើម្បីលើកកម្ពស់សោភ័ណភាពទីក្រុង ជាពិសេសក្នុងអំឡុងពេលពិធីបុណ្យកាន់បិណ្ឌ និងភ្ជុំបិណ្ឌ ព្រមទាំងបន្តរក្សាអនាម័យឱ្យបានល្អជាប្រចាំ។
ក្នុងជំនួបសំណេះសំណាលជាមួយបុគ្គលិកអនាម័យ និងបរិស្ថាន នៃអង្គភាពគ្រប់គ្រងសំណល់រឹង និងអង្គភាពគ្រប់គ្រងទីលានចាក់សំរាមក្រុងស្ទឹងត្រែង កាលពីថ្ងៃទី៧ ខែតុលា ឆ្នាំ២០២៦ ល៩ក សរ សុពុត្រា អភិបាលខេត្តស្ទឹងត្រែង បានលើកឡើងថា កម្លាំងពលកម្មផ្នែកអនាម័យមានតួនាទីសំខាន់ក្នុងការជួយឱ្យការអនុវត្តផែនការសម្អាតបរិស្ថានសម្រេចបានលទ្ធផលល្អ និងធ្វើឱ្យទីក្រុងស្ទឹងត្រែងកាន់តែមានភាពស្រស់ស្អាត មានសណ្តាប់ធ្នាប់ និងបរិស្ថានរស់នៅល្អប្រសើរ។
លោកអភិបាលខេត្តក៏បានណែនាំដល់បុគ្គលិកទាំងអស់ឱ្យបំពេញភារកិច្ចដោយការទទួលខុសត្រូវ យកចិត្តទុកដាក់លើសុវត្ថិភាពការងារ និងអនុវត្តវិធានការការពារសុខភាពឱ្យបានត្រឹមត្រូវ។ ជាពិសេស បុគ្គលិកត្រូវសម្អាតខ្លួនប្រាណឱ្យបានស្អាតក្រោយបញ្ចប់ការងារ ដើម្បីកាត់បន្ថយហានិភ័យដែលអាចប៉ះពាល់ដល់សុខភាព។
ជាមួយគ្នានេះ លោក លី មីណា អភិបាលក្រុងស្ទឹងត្រែង បានឱ្យដឹងថា ក្រុមការងារប្រមូលសំរាមបានខិតខំបំពេញភារកិច្ចតាមទីតាំងដែលបានកំណត់ ដោយការប្រមូល និងដឹកជញ្ជូនសំរាមប្រព្រឹត្តទៅដោយរលូន មិនមានការកកស្ទះគួរឱ្យកត់សម្គាល់ឡើយ ទោះបីជាអង្គភាពកំពុងជួបប្រទះការខ្វះខាតរថយន្តសម្រាប់បម្រើការងារក៏ដោយ។
លោកអភិបាលក្រុងបានអំពាវនាវដល់ប្រជាពលរដ្ឋដែលនៅមិនទាន់អនុវត្តការទុកដាក់សំរាមបានត្រឹមត្រូវ ឱ្យចូលរួមផ្លាស់ប្តូរទម្លាប់ និងបោះចោលសំរាមតាមទីតាំងដែលបានកំណត់។ លោកបានសង្កត់ធ្ងន់ថា ការរក្សាអនាម័យទីក្រុងមិនមែនជាកាតព្វកិច្ចរបស់អ្នកប្រមូលសំរាមតែមួយក្រុមនោះទេ ប៉ុន្តែជាការទទួលខុសត្រូវរួមរបស់ប្រជាពលរដ្ឋគ្រប់រូប។
ដោយឡែក លោក ភឿន ចារ៉ាន់ ប្រធានក្រុមប្រមូលសំរាម បានទទួលស្គាល់ថា ការបោះចោលសំរាមមិនតាមទីតាំងកំណត់នៅតែជាបញ្ហាប្រឈមមួយ។ លោកបានបញ្ជាក់ថា ប្រជាពលរដ្ឋមួយចំនួននៅមិនទាន់យល់ច្បាស់ពីសារៈសំខាន់នៃការគ្រប់គ្រងសំណល់ ខណៈគ្រួសារខ្លះមិនបានបង់ថ្លៃសេវាប្រមូលសំរាម ហើយជ្រើសរើសយកសំរាមទៅបោះចោលនៅកន្លែងមិនសមស្រប។
លោកបានបន្ថែមថា ការចូលរួមពីសាធារណជននៅមានកម្រិត ដោយមនុស្សមួយចំនួននៅតែយល់ថា ការសម្អាតបរិស្ថានជាភារកិច្ចរបស់ក្រុមប្រមូលសំរាមតែប៉ុណ្ណោះ។ ដូច្នេះ ការបង្កើនការយល់ដឹង និងការចូលរួមរបស់ប្រជាពលរដ្ឋ គឺជាកត្តាចាំបាច់ក្នុងការដោះស្រាយបញ្ហាសំរាម និងរក្សាអនាម័យសាធារណៈឱ្យមានប្រសិទ្ធភាពយូរអង្វែង។
ក្នុងឱកាសនោះ ក៏មានការផ្តល់ជូនអំណោយជាគ្រឿងឧបភោគបរិភោគ និងថវិកា ដើម្បីលើកទឹកចិត្តដល់ក្រុមការងារប្រមូលសំរាម ដែលមានសមាជិកសរុបចំនួន២៤នាក់ ក្នុងនោះស្ត្រីចំនួន១១នាក់ ជាការទទួលស្គាល់ចំពោះការខិតខំបំពេញភារកិច្ចក្នុងការថែរក្សាអនាម័យ និងបរិស្ថានក្នុងក្រុងស្ទឹងត្រែង។
ការរក្សាទីក្រុងឱ្យស្អាត និងមានសណ្តាប់ធ្នាប់ ទាមទារឱ្យមានកិច្ចសហការរវាងអាជ្ញាធរ ក្រុមការងារអនាម័យ និងប្រជាពលរដ្ឋ ដោយត្រូវអនុវត្តការទុកដាក់សំរាមឱ្យបានត្រឹមត្រូវ និងចូលរួមថែរក្សាបរិស្ថានជាទម្លាប់ប្រចាំថ្ងៃ៕
ចែករំលែកព័តមាននេះ