ខេត្តកំពង់ស្ពឺ ប្រកាសរៀបចំពិធីប្រណាំងទូកថ្នាក់ខេត្ត រយៈពេល ១ថ្ងៃ នៅតាមបណ្តោយដងស្ទឹងព្រែកត្នោត
- កំពង់ស្ពឺ
ខេត្តកំពង់ស្ពឺ៖ រដ្ឋបាលខេត្តកំពង់ស្ពឺ បានចេញសេចក្តីប្រកាសជូនដំណឹងដល់ ប្រជាពលរដ្ឋ ស្តីពីការការប្រណាំងទូកមាន រយៈពេល១ថ្ងៃ គឺនៅថ្ងៃទី២៤ ខែវិច្ឆិកា ឆ្នាំ២០២៦ ខាងមុខនេះ យោងតាមសេចក្តីប្រកាសជូនដំណឹង របស់រដ្ឋបាលខេត្តកំពង់ស្ពឺកាលពីថ្ងៃទី៨ ខែតុលា ឆ្នាំ២០២៦។
យោងតាមសេចក្តីជូនដំណឹងស្តីពីការរៀបចំពិធីប្រណាំងទូកថ្នាក់ខេត្ត ឆ្នាំ២០២៦ នៅខេត្តកំពង់ស្ពឺ អធិកអធម ដើម្បីចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឱ្យបានមហោឡារិកអធិកអធម ស្របតាមប្រពៃណីជាតិ ជាពិសេសស្ថានភាពសេដ្ឋកិច្ចរបស់ប្រជាពលរដ្ឋមានការរីកចម្រើន រដ្ឋបាលខេត្តកំពង់ស្ពឺ នឹងរៀបចំឱ្យមានការប្រណាំងទូកនៅខេត្តកំពង់ស្ពឺ តាមបណ្តោយដងស្ទឹងព្រែកត្នោត ដើម្បីបើកឱកាសជូនប្រជាពលរដ្ឋ បានចូលរួមទស្សនាកម្សាន្តសប្បាយរីករាយ ដោយមានការសម្តែងសិល្បៈ ទស្សនីយភាពផ្សេងៗ។ ដោយកម្មវិធីនេះមាន រយៈពេល ១ថ្ងៃ គឺនៅថ្ងៃទី២៤ ខែវិច្ឆិកា ឆ្នាំ២០២៦ ខាងមុខនេះ។ ផ្អែកតាមខ្លឹមសារខាងលើនេះ តាមខ្លឹមសារខាងលើនេះ រដ្ឋបាលខេត្តកំពង់ស្ពឺ សូមធ្វើការជូនដំណឹងដូចតទៅ៖
១-គ្រប់ក្រុង ស្រុក គ្រប់មន្ទីរ អង្គភាពជុំវិញខេត្ត ក៏ដូចជាវិស័យឯកជន អង្គការ សមាគម ដែលមានបំណងក្នុង ការចូលរួមប្រណាំងទូក ត្រូវមកដាក់ពាក្យចូលរួមប្រកួតនៅគណៈកម្មការខេត្តកំពង់ស្ពឺ (មន្ទីរអប់រំ យុវជន និងកីឡា ខេត្តកំពង់ស្ពឺ) ឱ្យបានមុនថ្ងៃទី១៨ ខែវិច្ឆិកា ឆ្នាំ២០២៦ ជាកំណត់ ដើម្បីងាយស្រួលដល់គណៈមេប្រយោគផ្គូផ្គងរវាង ទូកនីមួយៗ។
២-មន្ទីរវប្បធម៌ និងវិចិត្រសិល្បៈខេត្តកំពង់ស្ពឺ សហការជាមួយមន្ទីរ អង្គភាពពាក់ព័ន្ធចាត់តាំងកម្មវិធីសិល្បៈ សម្តែងជូនបងប្អូនប្រជាពលរដ្ឋកម្សាន្តសប្បាយនៅមុខសួនច្បារសម្តេចព្រះសង្ឃរាជ ជួន ណាត ស្របតាមកម្មវិធី កំណត់ជាក់ស្តែង។
៣-មន្ទីរព័ត៌មានខេត្តកំពង់ស្ពឺ ត្រូវចាត់តាំងបណ្តាញវិទ្យុ ទូរទស្សន៍ជាតិ និងឯកជនចុះធ្វើសកម្មភាពផ្តិតយក ព័ត៌មាននូវរាល់សកម្មភាពជាក់ស្តែង ហើយផ្សព្វផ្សាយឱ្យបានទូលំទូលាយ។
៤-ស្នងការដ្ឋាននគរបាលខេត្តកំពង់ស្ពឺ បញ្ជាការដ្ឋានកងរាជអាវុធហត្ថខេត្តកំពង់ស្ពឺ ត្រូវណែនាំដល់អង្គភាព ក្រោម ឱវាទ ឱ្យសហការការពាររក្សាសន្តិសុខ របៀបរៀបរយ សណ្តាប់ធ្នាប់សង្គម សម្រួលចរាចរណ៍ បង្កលក្ខណៈ និង ធានាសុវត្ថិភាពសប្បាយរីករាយជូនបងប្អូនប្រជាពលរដ្ឋ។
បញ្ជាក់៖ សូមឯកឧត្តម លោកជំទាវ លោក លោកស្រី ជាថ្នាក់ដឹកនាំ មន្ទីរ អង្គភាព និងក្រុង ស្រុក ត្រូវ រៀបចំទូកយ៉ាងហោចណាស់ចំនួន ១ក្នុង ១អង្គភាព។
រដ្ឋបាលខេត្តកំពង់ស្ពឺ មានក្តីសង្ឃឹម និងជឿជាក់យ៉ាងមុតមាំថា គ្រប់មន្ទីរ អង្គភាពជុំវិញខេត្ត ក្រុង ស្រុក ឃុំ សង្កាត់ និងកងកម្លាំងប្រដាប់អាវុធទាំងបីប្រភេទ នឹងចូលរួមយ៉ាងសកម្ម ដើម្បីធ្វើឱ្យកម្មវិធីនេះប្រព្រឹត្តទៅ ប្រកបដោយបរិយាកាសសប្បាយរីករាយ និងសុវត្ថិភាពល្អប្រសើរ៕
ចែករំលែកព័តមាននេះ