អង្គការស្បៀងអាហារ និងកសិកម្មអង្គការសហប្រជាជាតិ (FAO) នៅកម្ពុជាបានពញាក់ទៀតហើយពាក់ព័ន្ធនឹងបាតុភូតអែលនីញ៉ូ ដោយលើកឡើងថា កម្ពុជាប្រឈមនឹងហានិភ័យនៃបាតុភូតនេះខ្ពស់ ។

អង្គការនេះបានចែករំលេកនៅលើបណ្តាញសង្គមរបស់ខ្លួននៅសប្តាហ៍នេះថា ដោយផ្អែកលើទិន្នន័យសង្កេតការណ៍តាមផ្កាយរណបក្នុងរយៈពេល៤១ឆ្នាំកន្លងមក ប្រព័ន្ធសន្ទស្សន៍ភាពតានតឹងផ្នែកកសិកម្ម របស់អង្គការ FAO បានកំណត់ថា ប្រទេសកម្ពុជាកំពុងប្រឈមនឹងហានិភ័យខ្ពស់នៃគ្រោះរាំងស្ងួតធ្ងន់ធ្ងរ ដែលបណ្តាលមកពីបាតុភូត El Niño ក្នុងឆ្នាំ២០២៦។

នេះ គឺជាការពញាក់ការចាប់អារម្មណ៍មួយ ស្របពេលដែលនាយករដ្ឋមន្ត្រីសម្តេចធិបតី ហ៊ុន ម៉ាណែត ក៏បានពញាក់អំពីការព្រួយបារម្ភនេះដែរ ហើយបានណែនាំស្ថាប័នពាក់ព័ន្ធឲ្យត្រៀមខ្លួនសម្រាប់បាតុភូតនេះ ខណៈដែលវាអាចមកដល់ហើយអូសបន្លាយ ពីចុងឆ្នាំ២០២៦ ដល់ដើមឆ្នាំ២០២៧ ។
បាតុភូតនេះ អាចនឹងបង្កឲ្យមានគ្រោះរាំងស្ងួត ហើយបើភ្លៀង គឺខ្លាំង អាចក្លាយជាទឹកជំនន់ ព្យុះ ឡើងកំដៅខ្លាំង ។ សម្រាប់កម្ពុជាអាចប៉ះពាល់ដល់ទឹកប្រើប្រាស់ កសិកម្ម បញ្ហាអគ្គិសនីជាដើម ៕
ចែករំលែកព័តមាននេះ