ទឹកជន់លិចផ្ទះអស់ហើយ ត្រូវលោកចោរលួចយកម៉ូតូទៀត ប្ដឹងទៅសមត្ថកិច្ច៣ថ្ងៃហើយស្ងាត់ជ្រៀប
- បាត់ដំបង
ខេត្តបាត់ដំបង ៖ រយៈពេល០៣ថ្ងៃហើយ ដែលលោកចោរចិត្តខ្មៅបានឆក់ឱកាស«លួចយកម៉ូតូ» របស់ប្រជាពលរដ្ឋមួយគ្រឿង នៅភូមិវាលទ្រា ឃុំអូរតាគី ស្រុកថ្មគោល ក្នុងអំឡុងពេលជនរងគ្រោះកំពុងជាប់ដៃជញ្ជូនទ្រព្យសម្បតិ្ត និងសម្ភារៈចេញពីផ្ទះយកទៅទុកនៅទីទួលមានសុវត្ថិភាព ប៉ុន្តែមកទល់នឹងថ្ងៃទី០៨ តុលា នេះ សមត្ថកិច្ចហាក់មិនទាន់មានតម្រុយពីមុខសញ្ញាជនដៃដល់នៅឡើយទេ សូម្បីប៉ុនក្រចក ។
អ្នកស្រី ធឿង លាង អាយុ៤៨ឆ្នាំ ដែលជាម្ចាស់ម៉ូតូ បាននិយាយ កាលពីថ្ងៃទី០៧ តុលាថា ម៉ូតូកញ្ចាស់របស់គាត់មួយគ្រឿងម៉ាកវ៉េវ ត្រូវបានលោកចោរចិត្តខ្មៅលួចយកទៅបាត់កាលពីវេលាម៉ោងប្រហែល៥ល្ងាចថ្ងៃទី០៥ តុលា ខណៈពេលអ្នកស្រី និងកូនចៅកំពុងមមារញឹកជញ្ជូនអីវ៉ាន់ និងសម្ភារនានាចេញពីផ្ទះដែលលិចលង់ដោយទឹកជំនន់យកទៅគរទុកនៅមាត់ថ្នល់ជាតិលេខ៥ ។
អ្នកស្រីប្រាប់ថា ទឹកជំនន់ស្ទើរត្រឹម.ក លិចលង់ផ្ទះសម្បែងរបស់គាត់អស់គ្មានសល់ ។ គ្រែ ចានឆ្នាំង និងសម្ភារនានា បានជញ្ជូនយកទៅគរទុកនៅមាត់ថ្នល់ជាតិ ជាមួយនឹងម៉ូតូកញ្ចាស់មួយគ្រឿងផង ប៉ុន្តែពេលគាត់និងកូនៗកំពុងនាំគ្នាដើរឆ្លងទឹកទៅជញ្ជូនអីវ៉ាន់ លុះត្រឡប់មកដល់ថ្នល់វិញ ក៏បាត់ម៉ូតូបង្កឲ្យមានការភ្ញាក់ផ្អើលតែម្ដង ។កូនប្រុសអ្នកស្រី ធឿង លាង ឈ្មោះ វ៉ាន សំបាន អាយុ១៩ឆ្នាំ បាននិយាយដែរថា ម៉ូតូនោះ ត្រូវចោរលួចនៅពេលខ្លួនទុកនៅមាត់ថ្នល់ ហើយដើរឆ្លងទឹកទៅយកបាយ លុះដើរត្រឡប់មកវិញ ក៏ត្រូវចោរលួចម៉ូតូបាត់ ។
សំបានបានបញ្ជាក់ថា ទឹកជំនន់កំពុងលិចលង់ខ្លាំង ហើយកូនរបស់ខ្លួនស្រាប់តែគ្រុនឈាមសម្រាកនៅពេទ្យ ។ គ្រាហ៍នោះ ខ្លួនបានជិះម៉ូតូពីពេទ្យ ដើម្បីមកយកបាយនៅផ្ទះ ខណៈបងប្អូន និងម្ដាយខ្លួនកំពុងឆ្លងទឹកទៅមកជញ្ជូនអីវ៉ាន់ចេញពីផ្ទះ យកទៅទុកនៅមាត់ថ្នល់ដែលគោក រីឯម៉ូតូខ្លួនក៏ទុកមាត់ថ្នល់ដែរ ព្រោះគ្មានកន្លែងណាទុកទេ ។ ប៉ុន្តែនៅពេលខ្លួនចុះដើរឆ្លងទឹកទៅយកបាយ ត្រឡប់មកវិញ ក៏ត្រូវចោរលួចយកម៉ូតូទៅបាត់។ ក្រោយបាត់ម៉ូតូ ខ្លួនបានទៅដាក់ពាក្យបណ្ដឹងនៅប៉ុស្ដិ៍នគរបាលអូរតាគីភ្លាមៗដែរ ប៉ុន្តែរហូតមកទល់នឹងថ្ងៃទី០៨ តុលា នេះ សមត្ថកិច្ចមិនទាន់មានដំណឹងពីចោរ និងម៉ូតូនៅឡើយទេ ។
នាយប៉ុស្ដិ៍នគរបាលស្ដីទីរដ្ឋបាលអូរតាគី លោក សឿង គឹមសួ បានប្រាប់ថា ករណីចោរលួចម៉ូតូខាងលើនេះ សមត្ថកិច្ចរបស់លោកមិនទាន់មានតម្រុយនៅឡើយទេ ។ ប៉ុន្តែមុខសញ្ញាជនសង្ស័យរូបនេះ បានបន្សល់ទុកតែរូបភាពនៅក្នុងកាមេរ៉ាសុវត្ថិភាព ដែលគេបំពាក់តាមដងផ្លូវ ។
លោកនាយប៉ុស្ដិ៍ស្ដីទីរូបនេះបានបញ្ជាក់ថា មុខសញ្ញាជនសង្ស័យបានលួចយកម៉ូតូនោះ ជិះទៅទិសខាងត្បូង ។ នេះបើយោងលើរូបភាពក្នុងកាមេរ៉ាសុវត្ថិភាព ។ ហើយរូបភាព ដែលបង្ហាញមុខជនសង្ស័យកំពុងជិះម៉ូតូនោះ លោកបានប្រគល់ឲ្យជំនាញហើយ ដើម្បីធ្វើការស្រាវជ្រាវបន្ត ប៉ុន្តែលទ្ធផលយ៉ាងណានោះ លោកមិនទាន់ដឹងទេ ៕
ចែករំលែកព័តមាននេះ