ជនជាតិថៃជិត២០០នាក់ ដែលសម្រេចទោសរួច ត្រូវបានបញ្ជូនចេញតាមច្រកទ្វារព្រំដែនអន្តរជាតិប៉ោយប៉ែត
- បន្ទាយមានជ័យ
ខេត្តបន្ទាយមានជ័យ ៖ អាជ្ញាធរកម្ពុជាបណ្តេញជនជាតិថៃជិត២០០នាក់ដែលសម្រេចទោសរួចពីខេត្តសៀមរាប ត្រូវបានបញ្ជូនចេញតាមច្រកទ្វារព្រំដែនអន្តរជាតិប៉ោយប៉ែត នៅថ្ងៃទី៨ ខែតុលា ឆ្នាំ២០២៦។
ក្នុងពេលត្រូវបញ្ជូនជនជាតិថៃចេញ គេសង្កេតឃើញវត្តមានឯកឧត្តម ប៉ាន់ខែម ប៊ុនថន ក្រុមការងាររាជរដ្ឋាភិបាលចុះជួលមូលដ្ឋានក្រុងប៉ោយប៉ែត លោកឧត្តមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេតនិងអនុវត្តនីតិវិធី លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិប៉ោយប៉ែត លោក លៀម សុដា អភិបាលរងខេត្តបន្ទាយមានជ័យនិងមន្ត្រីស្ថាប័នពាក់ព័ន្ធ។
លោកឧត្តមសេនីយ៍ត្រី អ៊ី ចំរើន បានឱ្យដឹងថា ជនជាតិថៃដែលត្រូវបានអាជ្ញាធរកម្ពុជាបណ្តេញតាមច្រកទ្វារព្រំដែនអន្តរជាតិប៉ោយប៉ែតមានចំនួន១៩៧នាក់ ក្នុងនោះមានស្រីស្រី៧៣នាក់ ដែលត្រូវបានសម្រេចទោសនិងបញ្ជូនមកពីខេត្តសៀមរាបនិងត្រូវបានប្រគល់ជូនអាជ្ញាធរថៃនៅលើស្ពានច្រកទ្វារព្រំដែនអន្តរជាតិប៉ោយប៉ែតដែលឈមច្រកទ្វារខ្លងលឹក ប្រទេសថៃ។
លោកឧត្តមសេនីយ៍ទោ យឿម ម៉ាន់ បានបញ្ជាក់ថា ជនជាតិថៃចំនួន១៩៧នាក់ ដែលត្រូវបានអាជ្ញាធរកម្ពុជាបណ្តេញចេញតាមច្រកទ្វារព្រំដែនអន្តរជាតិប៉ោយប៉ែត ត្រូវបានសម្រេចទោសរួចដែលប្រព្រឹត្តិបទល្មើសនៅក្នុងខេត្តសៀមរាប ក្រោយបណ្តេញចេញកម្ពុជា បានបិទទិដ្ឋការមិនអោយចូលមកកម្ពុជាវិញមានរយៈពេល៣ទៅ៥ឆ្នាំ។
ឯកឧត្តម ប៉ាន់ខែម ប៊ុនថន បានបញ្ជាក់ថា ជនជាតិថៃដែលត្រូវបានអាជ្ញាធរកម្ពុជាបណ្តេញចេញពីកម្ពុជាតាមច្រកទ្វារព្រំដែនអន្តរជាតិប៉ោយប៉ែត ត្រូវបានអនុវត្តន៍ជាបន្តបន្ទាប់ដែលប្រព្រឹត្តបទល្មើសក្នុងកម្ពុជាមានដូចជាបទល្មើសអនឡាញស្គេមនិងបទល្មើសផ្សេងៗដែលបានសម្រេចទោសរួចនៅកម្ពុជា ហើយត្រូវបានអាជ្ញាធរបណ្តេញចេញពីកម្ពុជា៕
ចែករំលែកព័តមាននេះ