រយៈពេល២៧ម៉ោងហើយ ក្រុមអ្នករុករកសាកសពលោកមេភូមិនៅក្នុងទឹក នៅតែគ្មានតម្រុយ
- បាត់ដំបង
ខេត្តបាត់ដំបង ៖ គិតត្រឹមម៉ោង១០ព្រឹកថ្ងៃទី០៨ តុលា នេះ គឺមានរយៈពេល២៧ម៉ោងហើយ ដែលក្រុមអ្នកស្វែងរកសាកសពលោកមេភូមិត្រាង ដែលលិចទូកស្មាច់នៅកណ្ដាលទឹកអូរកំពុងជន់ខ្លាំង នៅតែមិនទាន់មានតម្រុយនៅឡើយ បើទៅជាលោកមេឃអូរតាគី បានប្រឹងប្រែងដឹកនាំកម្លាំងមូលដ្ឋានចុះរុករកតាមដងអូរគ្រប់ទិសទីនៅតំបន់កើតហេតុជាប្រចាំក្ដី ។
លោក សឿង គឹមសួ នាយប៉ុស្ដ៍នគរបាលស្ដីទី ឃុំអូរតាគីបានប្រាប់ថា រហូតមកទល់នឹងម៉ោងនេះទៅហើយ សាកសពលោក ញ៉ូង រឿន មេភូមិត្រាង ដែលលិចបាត់ទៅក្នុងទឹកអូរដោយសារក្រឡាប់ទូកស្មាច់នោះ នៅតែរកមិនទាន់ឃើញទេ ។ លោកថា ពេលនេះអ្នកភូមិជាច្រើននាក់ ក្រោមការដឹកនាំដោយលោកមេឃុំអូរតាគី បាននិងកំពុងចុះស្វែងរកគ្រប់ទីកន្លែងនៅឡើយនៅតាមដងអូរ ។
លោក ញ៉ូង រឿន អាយុ៧៥ឆ្នាំ មានតួនាទីមេភូមិត្រាង ឃុំអូរតាគី ។ គាត់បានជួបឧប្បត្តិក្រឡាប់ទូកស្មាច់ ហើយបាត់ខ្លួនទៅក្នុងទឹកអូរនៅក្បែរវត្តត្រាស់ នៅម៉ោង៨ព្រឹកថ្ងៃទី០៧ តុលា ពេលដែលគាត់ជាមួយសហការីរបស់គាត់ចំនួន០៤នាក់ទៀត ជិះទូកស្មាច់ជាមួយគ្នាទៅជួបក្រុមការងារថ្នាក់ជាតិនៅក្នុងវត្តត្រាស់ ដើម្បីពិនិត្យស្ថានភាពទឹកជំនន់ និងសួរសុខទុក្ខពលរដ្ឋដែលរងគ្រោះដោយទឹកជំនន់ ។
នៅពេលជួបគ្រោះថ្នាក់ ក្រឡាប់ទូកលិចទៅក្នុងទឹកដែលកំពុងហូរកួចខ្លាំង ក្រុមអ្នកភូមិបានចេញទូកទៅជួយសង្គ្រោះភ្លាមៗ ប៉ុន្តែគ្រាហ៍នោះ គេជួយបានមនុស្ស០៤នាក់ដែលពួកគាត់ស្រវ៉ាតោងទូកជាប់ តែបាត់ខ្លួនលោកមេភូមិដែលត្រូវកម្លាំងទឹកហូរកួចពន្លិចបាត់ភ្លាមតែម្ដង ធ្វើឲ្យអ្នកជួយសង្គ្រោះតាមរុករកមិនឃើញ ។
រហូតមកដល់ពេលនេះ ក្រុមអ្នកស្វែងរកសាកសពលោកមេភូមិ ដែលដឹកនាំដោយលោកមេឃុំអូរតាគី បាននិងកំពុងប្រឹងប្រែងស្វែងរុករកស្ទើរគ្រប់កន្លែងនៅតាមដងអូរ តែពុំទាន់មានតម្រុយនៅឡើយទេ ៕
ចែករំលែកព័តមាននេះ