រាជធានីភ្នំពេញ ៖ កូនឈើចម្រុះមុខជាច្រើនប្រភេទ ប្រមាណ ១ពាន់ដើម ត្រូវបានចែកសម្រាប់ធ្វើការដាំដុះក្នុងសង្កាត់ចំនួន១០ ក្នុងខណ្ឌទួលគោក រាជធានីភ្នំពេញ នេះបើតាមលោក យ៉ិន ទៀងពុទ្ធិរិទ្ធ អនុប្រធានក្រុមការងាររាជរដ្ឋាភិបាលចុះមូលដ្ឋានខណ្ឌទួលគោក និងជាប្រធានក្រុមការងារសហភាពសហព័ន្ធយុវជនកម្ពុជា គ៧៨ ។
លើកឡើងក្នុងពិធីដាំដើមឈើ និងចែកកូនឈើ ក្រោមប្រធានបទ «រួមគ្នាដាំដើមឈើ រួមគ្នាការពារបរិស្ថាន» ក្នុងបរិវេណវិទ្យាល័យ ជា ស៊ីម សាមគ្គី រាជធានីភ្នំពេញ នាថ្ងៃទី០៧ ខែតុលា ឆ្នាំ២០២៦ លោកបានថ្លែងថា លោកពិតជាមានសេចក្តីសោមនស្សយ៉ាងក្រៃលែង ដែលទទួលបានការអនុញ្ញាតពីបណ្ឌិត ឱម យ៉ិនទៀង ទេសរដ្ឋមន្ត្រី ប្រធានក្រុមការងាររាជរដ្ឋាភិបាល ចុះមូលដ្ឋានខណ្ឌទួលគោក ដើម្បីមកចូលរួមជាអធិបតីក្នុងពិធីដាំដើមឈើ និងចែកកូនឈើ ក្រោមប្រធានបទ «រួមគ្នាដាំដើមឈើ រួមគ្នាការពារបរិស្ថាន» ដើម្បីរក្សាស្មារតី «រុក្ខទិវា ៩ កក្កដា» នៅក្នុងបរិវេណវិទ្យាល័យ ជា ស៊ីម សាមគ្គី ស្ថិតក្នុងភូមិ១ សង្កាត់បឹងសាឡាង នាពេលនេះ ។
លោកលើកឡើងថា ចំពោះការរៀបចំពិធីដ៏មានសារៈសំខាន់នេះឡើង លោកសូមថ្លែងអំណរគុណជាអនេកចំពោះវត្តមានរបស់លោក លោកស្រី អស់លោក លោកស្រី អ្នកនាងកញ្ញា លោកគ្រូ អ្នកគ្រូ ក្មួយៗសិស្សានុសិស្ស បងប្អូនប្រជាពលរដ្ឋ និងអាជ្ញាធរមូលដ្ឋាន ដែលបានចំណាយពេលវេលាដ៏មានតម្លៃ អញ្ជើញចូលរួមយ៉ាងច្រើនកុះករក្នុងពិធីដ៏មានអត្ថន័យយ៉ាងជ្រាលជ្រៅនេះ ។
លោកបានលើកឡើងទៀតថា ៖ «ពិធីដាំដើមឈើ និងចែកកូនឈើ ដែលត្រូវបានប្រារព្ធធ្វើឡើងពេលនេះ គឺមានអត្ថន័យដ៏ជ្រាលជ្រៅ និងមានសារៈសំខាន់បំផុត សម្រាប់សង្គមជាតិ ដោយយើងទាំងអស់គ្នា បាននិងកំពុងបំពេញកាតព្វកិច្ចជូនជាតិមាតុភូមិ ស្របទៅនឹងគោលនយោបាយវិស័យព្រៃឈើជាតិរបស់រាជរដ្ឋាភិបាលកម្ពុជា ដែលមានបញ្ញត្តិក្នុងច្បាប់ ស្តីពីព្រៃឈើឆ្នាំ២០០២ ថា “ប្រជាពលរដ្ឋ កងកម្លាំងប្រដាប់អាវុធ និងអាជ្ញាធរដែនដីគ្រប់ថ្នាក់មានករណីយកិច្ចចូលរួមដាំដើមឈើ” ដែលជាការរួមចំណែកដ៏ប្រពៃក្នុងការបង្កើនគម្របបៃតង ជួយធ្វើឱ្យប្រសើរឡើងនូវសោភ័ណភាព ទេសភាពធម្មជាតិ និងផលិតអុកស៊ីសែន រួមទាំងផ្តល់អត្ថប្រយោជន៍ផ្សេងៗជាច្រើនក្នុងជីវភាពរស់នៅប្រចាំថ្ងៃ។ ជាពិសេសព្រៃឈើចូលរួមចំណែកយ៉ាងសំខាន់ក្នុងវិស័យកសិកម្ម សេដ្ឋកិច្ច សង្គមកិច្ច ទេសចរណ៍ វប្បធម៌ និងជាកំផែងការពារគ្រោះធម្មជាតិដ៏រឹងមាំប្រកបដោយប្រសិទ្ធភាពផងដែរ» ។
លោក យ៉ិន ទៀងពុទ្ធិរិទ្ធ បានបន្ថែមថា តាមរយៈការចូលរួមក្នុងកម្មវិធីដាំដើមឈើក្នុងពេលនេះ មិនត្រឹមតែជាការចូលរួមស្តារឡើងវិញនូវគម្របព្រៃឈើ និងការពារបរិស្ថានប៉ុណ្ណោះទេ ប៉ុន្តែថែមទាំងជាការបណ្តុះស្មារតីស្រឡាញ់ជាតិ បន្តរក្សា និងដាំដុះនូវ «គ្រាប់ពូជនៃសន្តិភាព» សម្រាប់អនាគតកូនចៅជំនាន់ក្រោយ។ ដើមឈើដែលយើងដាំថ្ងៃនេះ នឹងលូតលាស់ធំធាត់ដូចគ្នាតៅនឹងសន្តិភាព និងការអភិវឌ្ឍនៅកម្ពុជាដែលត្រូវការថែទាំ និងការពារពីយើងទាំងអស់គ្នា។
លោកបានលើកឡើងទៀតថា ដោយមើលឃើញពីគុណតម្លៃដ៏ច្រើនឥតគណនា ដែលព្រៃឈើបានផ្តល់ឱ្យសង្គមជាតិដូចបានរៀបរាប់ជូនខាងលើ រាជរដ្ឋាភិបាលកម្ពុជាអាណត្តិមុនៗបានដាក់ឱ្យអនុវត្តយ៉ាងម៉ឺងម៉ាត់នូវច្បាប់ និងលិខិតបទដ្ឋានគតិយុត្តិនានា ជាពិសេសកម្មវិធីព្រៃឈើជាតិឆ្នាំ២០១០-២០២៩ ហើយកំពុងត្រូវបានបន្តអនុវត្តយ៉ាងមុតមាំមកដល់បច្ចុប្បន្ន ។
លោកបានបន្ថែមថា ដោយឡែកក្នុងការពង្រឹងការគ្រប់គ្រង អភិវឌ្ឍន៍ និងអភិរក្សធនធានធម្មជាតិ ជាពិសេសព្រៃឈើ ទឹក ដី និងសត្វព្រៃ គឺជាការងារអាទិភាពចម្បងមួយរបស់រាជរដ្ឋាភិបាលអាណត្តិថ្មី ដែលត្រូវបានដាក់បញ្ចូលក្នុងយុទ្ធសាស្ត្របញ្ចកោណ ដំណាក់កាលទី១។ កម្ពុជាគឺជាប្រទេសឈានមុខគេមួយនៅក្នុងតំបន់ និងពិភពលោក ដែលបានដាក់តំបន់ព្រៃឈើទំហំជាង ៤០% នៃផ្ទៃប្រទេស ជាតំបន់ការពារធម្មជាតិ និងបន្តជំរុញការដាំស្តារព្រៃឈើឡើងវិញ។
យោងតាមរបាយការណ៍របស់លោកអភិបាលរងខណ្ឌទួលគោក និងលោកប្រធានមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងជាអនុប្រធានក្រុមការងារ ស.ស.យ.ក វិស័យកសិកម្ម សម្រាប់ពិធីដាំដើមឈើ និងចែកកូនឈើ ក្នុងបរិវេណប្រារព្ធពិធីនាពេលនេះ គឺមានការដាំដើមឈើ ៣៨ដើម (នាងនួន ៣០ដើម, ធ្នង់ ៨ដើម) និងបានដាំដើមឈើចំនួន ៨៩៣ដើម ផ្សេងទៀតនៅក្រៅទីតាំងប្រារព្ធពិធី ដូចជា ឧទ្យាន គ្រឹះស្ថានសិក្សា វត្តអារាម និងទីតាំងសាធារណៈ ។
សូមជម្រាបថា កូនឈើចម្រុះប្រភេទចំនួន ៥០០ដើម បែងចែកជា ៨ប្រភេទ (រួមមាន៖ ព្រីង, គគីរ, ឈើទាល, ធ្នង់, ច្រេស, បេង, កណ្តឹងមាស និងអង្គាបុស្ស) បានត្រៀមទុកសម្រាប់ចែកជូនតំណាងរដ្ឋបាលខណ្ឌ លោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋ ដើម្បីយកទៅដាំនៅតាមទីវត្តអារាម ដងផ្លូវសាធារណៈ និងលំនៅឋានរៀងៗខ្លួនផងដែរ ៕
ចែករំលែកព័តមាននេះ