ព្រះអង្គចន្ទមុនី បង្ហាញប្លង់ គម្រោងសាងសង់សំណង់អគារដ៍ធំស្កឹមស្កៃ សម្រាប់សមណសិស្ស-និស្សិត សិក្សាដោយឥតគិតថ្លៃ
- កំពង់ឆ្នាំង
ខេត្តកំពង់ឆ្នាំង ៖ ព្រះអង្គ ចន្ទ មុនី ព្រះចៅអធិការវត្ត ចន្ទប្បជោត្តនារាម ហៅវត្តតាសុត បានមានថេរដីកា និង បង្ហាញនូវគម្រោងប្លង់ស្ថាបត្យកម្មដ៏ធំមួយ រួមមាន សាកលវិទ្យាល័យ, វិទ្យាល័យ, អនុវិទ្យាល័យ, សាលប្រជុំ ព្រមទាំងអគារស្នាក់នៅ (កុដិ) សម្រាប់ព្រះសង្ឃជាសមណសិស្ស-និស្សិត ដោយឥតគិតថ្លៃ។
ព្រះអង្គមានថេរដីកា និងបង្ហាញគម្រោង ប្លង់ស្ថាបត្យកម្មដ៍ធំនេះ ធ្វើឡើងនៅព្រឹកថ្ងៃទី៧ ខែតុលា ឆ្នាំ២០២៦ ក្នុងឱកាសដែល ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង លោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង និងឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង និងលោកជំទាវ ព្រមទាំងមន្ត្រីរាជការ ប្រតិភូអមដំណើរជាច្រើនរូប បានអញ្ជើញចូលរួមក្នុងពិធីបុណ្យកាន់បិណ្ឌវេនទី១១ នៅវត្តចន្ទប្បជោត្តនារាម ហៅវត្តតាសុត ស្ថិតក្នុងភូមិប៉ាតឡាង ឃុំក្រាំងលាវ ខេត្តកំពង់ឆ្នាំង ។
ព្រះអង្គចន្ទមុនី មានថេរដីកាបញ្ជាក់ថា អគារសិក្សាដែលនឹងត្រូវរៀបចំសាងសង់ឡើងនេះ គឺជាប្រភេទ អគារភ្លោះ ដ៏ទំនើប ដែលជាស្តង់ដាអន្តរជាតិ ដោយក្នុងបានបែងចែកតាមជាន់ថ្នាក់ ថ្នាក់សកលវិទ្យាល័យ វិទ្យាល័យ និងអនុវិទ្យាល័យ ។ អ្វីដែលកាន់តែពិសេសនេះ មានសាលប្រជុំយ៉ាងធំ និងមានកន្លែងស្នាក់នៅ ផ្តល់ជូនសម្រាប់ព្រះសង្ឃជាសមណសិស្ស និងសិស្សានុសិស្ស ស្នាក់នៅនិងរៀនសូត្រ ដោយឥតគិតថ្លៃ ព្រមទាំងមានការឧបត្ថម្ភលើការហូបចុកប្រចាំថ្ងៃបន្ថែមទៀត ដើម្បីសម្រួលដល់ការសិក្សាអប់រំពេញលេញ។ គម្រោងអភិវឌ្ឍន៍វិស័យអប់រំដ៏ធំមួយនេះ នឹងចាប់ផ្តើមដំណើរការបុកគ្រឹះសាងសង់នៅដើមឆ្នាំ២០២៧ ពោលគឺ បន្ទាប់ពីពិធីបុណ្យកឋិនទានត្រូវបានបញ្ចប់ជាស្ថាពរ។
សូមបញ្ជាក់ថា ក្រោយពីអញ្ជើញពិនិត្យ នូវប្លង់គម្រោង ស្ថាបត្យកម្ម ដ៏ស្កឹមស្កៃដែលបង្ហាញដោយ ព្រះអង្គ ចន្ទ មុនី រួចមក ឯកឧត្តមបណ្ឌិតសភាចារ្យ អ៊ុក រ៉ាប៊ុន និងលោក ជំទាវ កែ ចន្ទមុនី ឯកឧត្តម ស៊ុន សុវណ្ណារិទ្ឋិ អភិបាលអភិបាលខេត្តកំពង់ឆ្នាំងនិងលោកជំទាវ ព្រមទាំង មន្ត្រីរាជការក៏បានអញ្ជើញជិៈរថយន្តអគ្គីសនី ពិនិត្យ ពីការរីកចំរើន ជុំវិញបរិវេណវត្ត និងបន្ទាប់ទើបអញ្ញើញស្រង់ព្រះ និងឡើងសាលាឆាន់ដើម្បីធ្វើពិធីរាប់បាត្រ បង្សុកូល ទៅតាមទំនៀមទម្លាប់ ប្រពៃណីព្រះពុទ្ធសាសនា ដោយមានពុទ្ធបរិស័ទចូលរួមយ៉ាងច្រើនកុះករ ៕
ចែករំលែកព័តមាននេះ