ផ្លូវជាតិលេខ៦ឱ្យតែមានភ្លៀង គឺផ្លូវរអិលដូចខ្លាញ់
- សៀមរាប
ខេត្តសៀមរាប ៖ កាលពីវេលាម៉ោងប្រមាណ៦ព្រឹក ថ្ងៃទី៦ ខែតុលា ឆ្នាំ២០២៦ កន្លងទៅ មានរថយន្តសាំយ៉ុង១គ្រឿងដឹកត្រីពីឃុំកំពង់ឃ្លាំង ស្រុកសូទ្រនិគម ទៅលក់នៅខេត្តបន្ទាយមានជ័យ និងរថយន្តដឹកអ្នកដំណើរធុនធំ១គ្រឿង ដឹកភ្ញៀវជាង១០នាក់ បានក្រឡាប់ធ្លាក់ស្រែទាំង២គ្រឿង និងមានចម្ងាយពីគ្នាប្រហែល១០០ម៉ែត្រ តាមលើផ្លូវជាតិលេខ៦ ជិតសាលាឃុំស្រណាល ស្រុកក្រឡាញ់ ។ ប៉ុន្តែហេតុការណ៍នេះ មិនបណ្ដាលឲ្យអ្នកជិះនៅក្នុងរថយន្តទាំង២គ្រឿងមានគ្រោះថ្នាក់ដល់អាយុជីវិតទេ គ្រាន់តែខូចខាតរថយន្តទាំង២គ្រឿង ដោយសារអ្នកបើកបរមិនមានការប្រុងប្រយ័ត្ន ។
ក្រោយពីអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានបង្ហោះលើផេកផ្ទាល់ខ្លួនរបស់អ្នកឧកញ៉ា ពេលនោះ លោកវរសេនីយ៍ទោ សោម វីរៈ នាយការិយាល័យនគរបាលចរាចរណ៍ផ្លូវគោកខេត្តបានឱ្យដឹងបន្ថែមនៅថ្ងៃទី៦ ខែតុលា ឆ្នាំ២០២៦ថា ដោយសារស្ថានភាពផ្លូវជាតិលេខ៦ ពីខេត្តសៀមរាបទៅខេត្តបន្ទាយមានជ័យ មានការខូចខាតមួយកំណាត់ ។ ដូច្នេះ លោកស្នើសុំឱ្យជំនាញមន្ទីរសាធារណការ និងដឹកជញ្ជូនខេត្ត ចុះពិនិត្យផ្លូវថ្នល់ និងជួយពិនិត្យរកដំណោះស្រាយ ពីព្រោះជារឿយៗ ឱ្យតែមានភ្លៀងធ្លាក់ខ្លាំង គឺកំណាត់ផ្លូវជាតិលេខ៦ តែងតែមានសភាពរអិល ដែលហាក់មានបញ្ហាស្ថាបនាខុសបច្ចេកទេស ។
លោកនាយការិយាល័យបានចែករំលែកបន្តអមដោយសំណេរថា «ជារឿយៗ ឱ្យតែមេឃភ្លៀង គឺមានការរអិលនៅលើកំណាត់ផ្លូវនេះ ហាក់មានបញ្ហាបច្ចេកទេសផ្លូវ ដូច្នេះស្នើសុំជំនាញផ្លូវថ្នល់ជួយពិនិត្យ និងរកដំណោះស្រាយបន្ថែមផង» ។ សូមបញ្ជាក់ថា កំណាត់ផ្លូវជាតិលេខ៦ ក្នុងភូមិសាស្ត្រស្រុកក្រឡាញ់ ឱ្យតែមានភ្លៀងគឺរអិលខ្លាំង សូមមន្ត្រីជំនាញពាក់ព័ន្ធជួយពិនិត្យ ៕
ចែករំលែកព័តមាននេះ