អាសូរណាស់! ស៊ីឈ្នូលបើកគោយន្តច្នៃដឹកស្រូវតាមផ្ទះយកទៅកិនឲ្យគេ ទាក់ដាច់ខ្សែភ្លើងលើដងផ្លូវឆក់ស្លា.ប់
- បាត់ដំបង
ខេត្តបាត់ដំបង ៖ យុវជនម្នាក់ស៊ីឈ្នូលបើកគោយន្តដឹកស្រូវតាមផ្ទះយកទៅកិនឲ្យទេ តែអកុសលទាក់ខ្សែភ្លើងលើដងផ្លូវដាច់ធ្លាក់ ឆក់បណ្ដាលឲ្យស្លាប់ កាលពីវេលាម៉ោង៩ និង៣០នាទីព្រឹកថ្ងៃទី០៦ តុលា នៅចំណុចភូមិអឲពោធី ឃុំរកា ស្រុកសង្កែ ។
សមត្ថកិច្ចបានឲ្យដឹងថា ជនរងគ្រោះឈ្មោះ ហ៊ុន ឡាយ ភេទប្រុស អាយុ២៤ឆ្នាំ រស់នៅភូមិអូរស្រឡៅ ឃុំអូរដំបង១ ស្រុកសង្កែ ។ ជនរងគ្រោះត្រូវចរន្តអគ្គិសនីឆក់ស្លាប់ នៅលើដងផ្លូវត្រង់ចំណុចភូមិ-ឃុំកើតហេតុខាងលើ នៅពេលខ្សែភ្លើងដែលគេចងយ៉ាងរញ៉េរញ៉ៃតាមដងផ្លូវបានដាច់ធ្លាក់ ។
អ្នកភូមិបានប្រាប់សមត្ថកិច្ចថា ជនរងគ្រោះបានបើកគោយន្តកែច្នៃ ទាក់ខ្សែភ្លើងឆ្លងកាត់ផ្លូវបណ្ដាលឲ្យដាច់ធ្លាក់ប៉ះចំក៏ឆក់ធ្លាក់ពីលើគោយន្តតែម្ដង ។ ប្រភពដដែលបាននិយាយថា ជនរងគ្រោះគ្រោះជាអ្នកស៊ីឈ្នូលបើកគោយន្តដឹកស្រូវតាមផ្ទះយកទៅកិនឲ្យគេ ប៉ុន្តែពេលដឹកដល់ចំណុចកើតហេតុ ស្រាប់តែទាក់ខ្សែភ្លើងដែលអ្នកភូមិបំពាក់ធ្លាក់រញ៉េរញ៉ៃឆ្លងកាត់ផ្លូវ ធ្វើឲ្យដាច់ធ្លាក់ប៉ះលើជនរងគ្រោះ ទើបធ្វើឲ្យឆក់ជនរងគ្រោះតែម្ដង ។
បើតាមសមត្ថកិច្ចបានបញ្ជាក់ថា ជនរងគ្រោះប្រកាច់ធ្លាក់ពីលើគោយន្តសន្លប់ ហើយបានស្លាប់ពេលគេដឹកទៅដល់មណ្ឌលសុខភាពក្នុងមូលដ្ឋាន ។ សមត្ថកិច្ចបានបញ្ជាក់ដែរថា កម្ពស់ស្រូវលើគោយន្តមិនខ្ពស់ប៉ុន្មានទេ តែដោយសារខ្សែភ្លើងឆ្លងកាត់ផ្លូវធ្លាក់រយីករយាកទាក់ពេក ថែមទាំងជនរងគ្រោះបើកបរខ្វះការប្រុងប្រយ័ត្នផង ទើបទាក់ខ្សែភ្លើងដាច់ធ្លាក់ឆក់ស្លាប់តតែម្ដង ។
យ៉ាងណា បងប្អូនប្រជាពលរដ្ឋ ឬអាជ្ញាធរមូលដ្ឋាន ជាពិសេស ក្រុមជំនាញអង្គភាព«អគ្គិសនី» គួរតែជួយត្រូតពិនិត្យមើលផងចំពោះបណ្ដាញខ្សែភ្លើងដ៏រញ៉េរញ៉ៃបំពាក់នៅតាមមូលដ្ឋានដូចខាងលើនេះ ព្រោះអាចប្រឈមនឹងគ្រោះថ្នាក់ខ្លាំងណាស់ដល់យានយន្ត ឬអ្នកដំណើរនានា ដែលធ្វើដំណើរឆ្លងកាត់ ដែលនឹងអាចប៉ះពាល់បង្កគ្រោះថ្នាក់ដោយយថាហេតុ ៕
ចែករំលែកព័តមាននេះ