រាជធានីភ្នំពេញ ៖ រថយន្តទ្រុងឃ្លុបដឹកអីវ៉ាន់ ១គ្រឿង បានបើកវ៉ាជែងរថយន្តកុងតឺន័រ ១គ្រឿងទៀត ប៉ុន្តែរថយន្តកុងតឺន័រនោះ មិនព្រមឲ្យវ៉ាឡើយ ហើយរថយន្តទ្រុងឃ្លុបខាងលើ ក៏បានកាច់ចង្កូតងាកចេញមកវិញ។ ខណៈនោះក៏ជ្រុលទៅបុកបង្គោលស្លាកបង្ហាញទិសដៅផ្លូវទៅកាន់ខេត្តកំពង់ស្ពឺ ខេត្តកំពង់ឆ្នាំង និងអាកាសយានដ្ឋាន បណ្តាលឲ្យរងការខូចខាតខ្ទេចមុខ ហើយគាបជាប់ជាមួយបង្គោលស្លាកនោះតែម្តង ប៉ុន្តែមិនបានបង្កឲ្យអ្នកបើកបររងរបួសឡើយ ។
ឧប្បត្តិហេតុនេះបានកើតឡើងកាលពីវេលាម៉ោង០៩និង៤០នាទីព្រឹកថ្ងៃទី០៦ ខែតុលា ឆ្នាំ២០២៦ នៅត្រង់ចំណុចគល់ស្ពានអាកាសមហាវិថី ស៊ី ជីនពីង ត្រើយខាងត្បូង ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
រថយន្តទ្រុងឃ្លុបដឹកអីវ៉ាន់ ១គ្រឿង ខាងលើនោះ ម៉ាក ហ៊ីយ៉ុនដាយ (Hyundai) ពណ៌ស លាយក្រហម ពាក់ស្លាកលេខ ស្វាយរៀង 3A-6381 បើកបរដោយបុរសមិនស្គាល់អត្តសញ្ញាណម្នាក់ ។
បុរសអ្នកលក់ទឹកអំពៅម្នាក់ បាននិយាយថា នៅវេលាម៉ោងកើតហេតុខាងលើ គាត់បានឃើញរថយន្តទ្រុងឃ្លុបនោះ បើកបរធ្វើដំណើរក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ក៏បានវ៉ាជែងរថយន្តកុងតឺន័រ ១គ្រឿងទៀត ដែលកំពុងបើកបរស្របទិសគ្នា។ ប៉ុន្តែពេលនោះ រថយន្តកុងតឺន័រមិនព្រមឲ្យវ៉ាឡើយ ហើយរថយន្តទ្រុងឃ្លុបក៏ងាកចង្កូតចេញមកវិញ ហើយក៏ជ្រុលទៅបុកបង្គោលស្លាកបង្ហាញផ្លូវទៅកាន់ខេត្តកំពង់ស្ពឺ ខេត្តកំពង់ឆ្នាំង និងព្រលានយន្តហោះពេញទំហឹង គាបជាប់បង្គោលស្លាកនោះ និងរងការខូចខាតខ្ទេចមុខតែម្តង ។
សមត្ថកិច្ច បានប្រាប់ថា នៅក្នុងហេតុការណ៍នេះ មិនបានបណ្តាលឲ្យអ្នកបើកបររថយន្តខាងលើរងរបួសនោះទេ ហើយបង្គោលបង្ហាញទិសដៅផ្លូវទៅខេត្ត និងអាកាសយានដ្ឋាននោះ បានរងការខូចខាត ប៉ុន្តែមិនបានដួលរលំឡើយ។ ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលចោមចៅទី៣ បានចុះទៅសម្រួលចរាចរណ៍ និងរាយការណ៍ជូនកម្លាំងការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះទៅនាំយករថយន្តខាងលើទៅរក្សាទុក រង់ចាំចាត់ការតាមនីតិវិធីច្បាប់ ៕
ចែករំលែកព័តមាននេះ