រាជធានីភ្នំពេញ ៖ ឧត្តមសេនីយ៍ឯកឈឿន ចាន់ថន ហៅម៉ៅ បញ្ជាការអង្គរក្សសម្តេចអគ្គមហាធម្មពោធិសាលជា ស៊ីម បានត្រូវកម្លាំងកងរាជអាវុធហត្ថចាប់ខ្លួន នៅព្រឹកព្រលឹមថ្ងៃទី១៣ សីហា រួមជាមួយអង្គរក្ស៣នាក់ផ្សេងទៀតនៅក្នុងភូមិគ្រឹះ តម្លៃជិត១លានដុល្លាររបស់ខ្លួន លេខ៦៥ ផ្លូវលេខ៩៥ សង្កាត់បឹងកេងកងទី៣ ខណ្ឌ
រាជធានីភ្នំពេញ ៖ ឧត្តមសេនីយ៍ឯកឈឿន ចាន់ថន ហៅម៉ៅ បញ្ជាការអង្គរក្សសម្តេចអគ្គមហាធម្មពោធិសាលជា ស៊ីម បានត្រូវកម្លាំងកងរាជអាវុធហត្ថចាប់ខ្លួន នៅព្រឹកព្រលឹមថ្ងៃទី១៣ សីហា រួមជាមួយអង្គរក្ស៣នាក់ផ្សេងទៀតនៅក្នុងភូមិគ្រឹះតម្លៃជិត១លានដុល្លាររបស់ខ្លួន លេខ៦៥ ផ្លូវលេខ៩៥ សង្កាត់បឹងកេងកងទី៣ ខណ្ឌចំការមន ។ ការចាប់ខ្លួនគួរឱ្យភ្ញាក់ផ្អើលនេះ គឺបន្ទាប់ពីមានព្រះរាជក្រឹត្យដកហូតឋានន្តរស័ក្តិ និងតួនាទីដែលឡាយព្រះហស្តលេខាដោយព្រះមហាក្សត្រកាលពីថ្ងៃទី១២ សីហា ហើយជាមួយគ្នានេះ ក៏មានអនុក្រឹត្យតែងតាំងលោកឧត្តមសេនីយ៍ឯកយឹម លាង ឱ្យទទួលតំណែងជាមេបញ្ជាការអង្គរក្សជំនួស។ មានការកត់សម្គាល់ថា មុនមានការចាប់ខ្លួននេះ នៅជុំវិញភូមិគ្រឹះអតីតផ្កាយ៣រូបនេះ ក៏ត្រូវបានឡោមព័ទ្ធដោយកម្លាំងកងរាជអាវុធហត្ថរាប់សិបនាក់ផងដែរ។
ជុំវិញការចាប់ខ្លួននេះ ក៏មានការកត់សម្គាល់ផងដែរថា ក្នុងប្រតិបត្តិការដ៏រំជើបរំជួលនេះ មន្ត្រីអ្នកអនុវត្តច្បាប់ដែលបានចុះផ្ទាល់ហាក់ដូចជាមានការប្រុងប្រយ័ត្ន ដោយសារតែមិនមានមន្ត្រីណាម្នាក់ហ៊ានបង្ហើបជាផ្លូវការពីការចាប់ខ្លួនអតីតឧត្តមសេនីយ៍ឈឿន ចាន់ថន នេះទេ។
ក្នុងប្រតិបត្តិការនេះ សមត្ថកិច្ចបានឃាត់ខ្លួនបុរស៣នាក់ផ្សេងទៀត ដែលជាអង្គរក្សរបស់លោកឈឿន ចាន់ថន គឺ១-ឈ្មោះប៉ក់ ស៊ា ២-ឈ្មោះពៅ មឿនចាន់ និង៣-ឈ្មោះជុំ ស្រស់។ សមត្ថកិច្ចក៏បានដកហូតអាវុធវែង-ខ្លីនៅភូមិគ្រឹះលោកឈឿន ចាន់ថន បានចំនួន១១ដើម ក្នុងនោះកាំភ្លើងវែង៧ដើម កាំភ្លើងខ្លី៤ដើម ដែលមានគ្រាប់កាំភ្លើងចម្រុះ១.៤០០គ្រាប់ និងឯកសណ្ឋាន ព្រមទាំងសម្ភារយោធាមួយចំនួនទៀត ។ ទាំងសម្ភារដែលបានដកហូតរួមជាមួយអ្នកដែលត្រូវចាប់ខ្លួនទាំង៤នាក់ ត្រូវបានសមត្ថកិច្ចនាំយកទៅកាន់បញ្ជាការដ្ឋានកងរាជអាវុធហត្ថរាជធានីដើម្បីចាត់ការបន្តតាមច្បាប់។
តាមប្រភពព័ត៌មានពីសមត្ថកិច្ចកងរាជអាវុធហត្ថលើផ្ទៃប្រទេសបានឱ្យដឹងថា ឈ្មោះឈឿន ចាន់ថន និងកូនចៅទាំង៣នាក់ ត្រូវបានកសាងសំណុំរឿងបញ្ជូនទៅសាលាដំបូងរាជធានី ពាក់ព័ន្ធនឹងបទល្មើសរក្សាអាវុធខុសច្បាប់ និងនាំចូល-នាំចេញអាវុធគ្រឿងផ្ទុះ គ្រាប់រំសេវដោយគ្មានច្បាប់អនុញ្ញាតពីអាជ្ញាធរមានសមត្ថកិច្ច។ ទោះបីជាបែបណា សម្រាប់អាវុធដែលបានប្រមូលពីភូមិគ្រឹះអតីតនាយទាហានរូបនេះ ហាក់ដូចជាមិនធំដុំនោះទេ ព្រោះផ្ទះមន្ត្រីយោធាមិនខ្វះទេ អាវុធ តែដោយសារពុំមានមន្ត្រីណាមួយហ៊ាននិយាយប្រាប់អ្នកកាសែតក្រៅពីវត្ថុតាងដែលបានរឹបអូសជាក់ស្តែង ទើបគេមិនដឹងថា អតីតផ្កាយបីរូបនេះមានបទល្មើសត្រូវចោទ ប្រកាន់អ្វីខ្លះនោះទេ ។ លោកឧត្តមសេនីយ៍ត្រីយ៉ា គឹមអ៊ី មេបញ្ជាការកងរាជអាវុធហត្ថរាជធានី មិនបានថ្លែងឱ្យដឹងពីមូលហេតុនៃការចាប់ខ្លួននេះទេ តែលោកបានសំអាងថា គឺអនុវត្តទៅតាមដីការបស់តុលាការ។
ចំណែកលោកមាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានី ក៏មិនធ្វើអត្ថាធិប្បាយជុំវិញការចាប់ខ្លួនមន្ត្រីយោធាថ្នាក់ឧត្តមសេនីយ៍រូបនេះដែរ។ រីឯតាមប្រភពព័ត៌មានក្រៅផ្លូវការនានាបានឱ្យដឹងថា មានរឿងជាច្រើនដែលទាក់ទិននឹងអតីតផ្កាយបីរូបនេះ ដូចជាបញ្ហាដីធ្លី និងការទាក់ទិននឹងការឆបោកលុយកាក់ និងរំលោភលើសេចក្តីទុកចិត្ត។ ប្រភពមិនផ្លូវការនិយាយទៀតថា មានបញ្ហាជាច្រើនទៀត ដែលធ្ងន់ធ្ងរជាងនេះ តែមិនមានការអះអាងពីប្រភពផ្លូវការណាមួយទេ ។
តាមប្រភពពីមន្ត្រីដែលសុំមិនបញ្ចេញឈ្មោះបានឱ្យដឹងថា អតីតផ្កាយ៣ ឈឿន ចាន់ថន ត្រូវនាំខ្លួនមកកាន់សាលាដំបូងរាជធានី នៅថ្ងៃទី១៥ សីហា ជាមួយកូនចៅ៣នាក់ទៀត និងទំនងត្រូវបានចោទប្រកាន់២ករណី។ ទាក់ទិននឹងជន៣នាក់ទៀតដែលត្រូវបានឃាត់ខ្លួនក្នុងរង្វង់ប្រតិបត្តិការនេះមិនមានរបាយការណ៍ណាមួយឱ្យដឹងថា ពួកគេទាក់ទិន ឬបែបណានោះទេ ៕
ចែករំលែកព័តមាននេះ