កម្លាំងនគរបាលខេត្តសៀមរាបឃាត់ខ្លួនជនសង្ស័យម្នាក់ ពាក់ព័ន្ធករណីលួចម៉ូតូនៅក្រុងតាខ្មៅ
- សៀមរាប
ខេត្តសៀមរាប៖ ក្រោមការបញ្ជាផ្ទាល់ពីលោកឧត្តមសេនីយ៍ទោ ហួរ សុធី ស្នងការនគរបាលខេត្តសៀមរាប និងមានកិច្ចសម្របសម្រួលនីតិវិធីពី លោក សៀង សុខ ព្រះរាជអាជ្ញាអមសាលាដំបូងខេត្តសៀមរាប កម្លាំងជំនាញបានបើកប្រតិបត្តិការអន្តរាគមន៍ និងឃាត់ខ្លួនជនសង្ស័យម្នាក់ ព្រមទាំងដកហូតម៉ូតូ១គ្រឿង ដែលបានលួចយកមកពីខេត្តកណ្តាល ។
ប្រតិបត្តិការនេះ ធ្វើឡើងកាលពីវេលាម៉ោង១៤:០០នាទី ថ្ងៃទី០៤ ខែតុលា ឆ្នាំ២០២៦។ មុនពេលកើតហេតុ បន្ទាប់ពីទទួលបានព័ត៌មានពីអធិការដ្ឋាននគរបាលក្រុងតាខ្មៅ និងពាក្យបណ្តឹងពីម្ចាស់ម៉ូតូថា ត្រូវបានអ្នកស្គាល់គ្នាលួចយកម៉ូតូ១គ្រឿង ម៉ាក Scoopy ពណ៌ស ស៊េរីឆ្នាំ២០២៥ ពាក់ផ្លាកលេខភ្នំពេញ 1MH-3659 (លេខតួ និងលេខម៉ាស៊ីន 8404434) កាលពីថ្ងៃទី០៣ ខែតុលា ឆ្នាំ២០២៦ នៅសង្កាត់រកាខ្ពស់ ក្រុងតាខ្មៅ ខេត្តកណ្តាល ហើយបានជិះរត់គេចខ្លួនមកខេត្តសៀមរាប ។
ភ្លាមៗនោះ កម្លាំងអធិការដ្ឋាននគរបាលក្រុងសៀមរាប សហការជាមួយកម្លាំងជំនាញព្រហ្មទណ្ឌបានតាមស្វែងរក និងឃាត់ខ្លួនជនសង្ស័យឈ្មោះ សំណាង ចាន់ដារ៉ា ភេទប្រុស អាយុ១៩ឆ្នាំ (មានទីលំនៅភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង) ជាមួយវត្ថុតាង នៅចំណុចខាងជើងស្ដុបគោកបាទ្រី ស្ថិតក្នុងភូមិគ្រួស សង្កាត់ស្វាយដង្គំ ក្រុងសៀមរាប ។
ចំពោះមុខសមត្ថកិច្ច ជនសង្ស័យបានសារភាពថា ម៉ូតូខាងលើនេះ គឺបក្សពួករបស់ខ្លួនជាអ្នកលួច ហើយបានឱ្យរូបគេជិះយកមកកាន់ខេត្តសៀមរាប។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងនគរបាលក្រុងសៀមរាប រៀបចំទំនាក់ទំនងប្រគល់ជូនទៅកម្លាំងការិយាល័យជំនាញនៃស្នងការដ្ឋាននគរបាលខេត្តកណ្តាល ដើម្បីបន្តកសាងសំណុំរឿងបញ្ជូនទៅកាន់សាលាដំបូងខេត្តកណ្តាល ចាត់ការតាមនីតិវិធីច្បាប់ ៕
ចែករំលែកព័តមាននេះ