ដឹកដៃកូនតូចដើរឆ្លងផ្លូវជាតិលេខ៤ ត្រូវរថយន្តបុ.កស្លា.ប់ម្តាយ កូនរបួ.ស រួចម៉ូតូកិ.នពីលើស.ពទៀត អ្នកបើកម៉ូតូរបួ.សធ្ងន់
- កំពង់ស្ពឺ
ខេត្តកំពង់ស្ពឺ៖ ស្ត្រីជាម្តាយម្នាក់បានស្លាប់ភ្លាមៗនៅកន្លែងកើតហេតុ ហើយកូនប្រុសតូចអាយុ៥ឆ្នាំបានរងរបួសស្រាល ខណៈដែលដឹកដៃកូនឆ្លងផ្លូវជាតិលេខ៤ ត្រូវបានរថយន្តតាកូម៉ាបុកស្លាប់ ហើយត្រូវបានម៉ូតូ១គ្រឿងលឿនបើកមកកិនសពថែមទៀត បណ្តាលឱ្យអ្នកបើកបរម៉ូតូរងរបួសធ្ងន់ធ្ងរ បង្កឱ្យមានការភ្ញាក់ផ្អើលដល់អ្នកធ្វើដំណើរ និងសមត្ថកិច្ច ។
ករណីគ្រោះថ្នាក់ចរាចរណ៍ខាងលើនេះ បង្កឱ្យមានការភ្ញាក់ផ្អើល កាលពីវេលាម៉ោង៦និង៣០នាទីព្រលប់ថ្ងៃទី៤ ខែតុលា ឆ្នាំ២០២៦ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៤០ ទៅលេខ៤១ត្រង់ចំណុចក្នុងភូមិវល្លិ៍សរ ឃុំវល្លិ៍សរ ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឱ្យដឹងថា នៅមុនពេលកើតហេតុ រថយន្ត១គ្រឿងម៉ាកតូយ៉ូតាតាកូម៉ា ពណ៌ខ្មៅ ពាក់ផ្លាកលេខ ភ្នំពេញ 2BH-6920 អ្នកបើកបរមិនស្គាល់អត្តសញ្ញាណ(បានរត់គេចខ្លួនក្រោយពេលកើតហេតុរួច) រថយន្តបានបើកបរ តាមបណ្ដោយផ្លូវជាតិលេខ៤ ពីទិសខាងលិច ទៅទិសខាងកើត លុះពេលធ្វើដំណើរ មកដល់ចំណុចខាងលើបានបុកស្ត្រីម្នាក់ឈ្មោះ សូ ចំរើន អាយុ៤១ឆ្នាំ និងកូនប្រុសឈ្មោះ អែម វុទ្ធី អាយុ៥ឆ្នាំ ។ ជនរងគ្រោះទាំង២នាក់ រស់នៅក្នុងភូមិត្បែស ឃុំវល្លិ៍សរ ស្រុកសំរោងទង ខេត្តកំពង់ស្ពឺ ដែលកំពុងដើរឆ្លងផ្លូវពីត្បួងទៅជើង រួចមកក៏មានម៉ូតូ១គ្រឿងទៀតម៉ាក ហុងដា សេ១២៥ ស៊េរីចាស់ ពណខ្មៅ ពាក់ផ្លាកលេខ ភ្នំពេញ1P-4397 អ្នកបើកបរឈ្មោះ ហ៊ន ករុណា ភេទប្រុស អាយុ១៧ឆ្នាំ រស់នៅក្នុងភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ដែលកំពុងបើកបរពីលិចទៅកើត បានកិនសពស្ត្រីរងគ្រោះនៅលើផ្លូវថែមទៀត ។
នគរបាលស្រុកសំរោងទងបានបន្តទៀតថា ក្រោយកើតហេតុនគរបាលជំនាញបានចុះធ្វើការវាស់វែងនៅកន្លែងកើតហេតុ បានហៅរថយន្តសាម៉ុយដឹកយុវជនអ្នកបើកបរម៉ូតូយកទៅសង្គ្រោះព្យាបាលភ្លាមៗនៅមន្ទីរពេទ្យបង្អែកខេត្តកំពង់ស្ពឺ។
ចំពោះសពស្ត្រីរងគ្រោះខាងលើ នគរបាលបានប្រគល់ជូនសាច់ញាតិក្រុមគ្រួសារយកទៅធ្វើបុណ្យតាមប្រពៃណី ។ ដោយឡែកម៉ូតូរងការ ខូចខាត១គ្រឿងកំរិតស្រាល ។
រថយន្ត១គ្រឿងរងការខូចខាត កំរិតស្រាល នគរបាលបានយកទៅ រក្សាទុកនៅប៉ុស្ដិ៍នគរបាលរដ្ឋបាលឃុំវល្លិ៍សរ បណ្ដោះអាសន្ន រង់ចាំធ្វើការដោះស្រាយនៅពេលក្រោយ និងកសាងសំណុំរឿងចាត់ការបន្តតាមផ្លូវច្បាប់៕
ចែករំលែកព័តមាននេះ