អាជីវករផ្សារលើលើកគ្នាមកមុខសាលាខេត្តតវ៉ានិងសំណូមពរមិនឲ្យមានការប្រគំតន្ត្រីដាក់ស្តង់លក់ទំនិញ
- កំពង់ឆ្នាំង
ខេត្តកំពង់ឆ្នាំង ៖ អាជីវករផ្សារលើ ខេត្តកំពង់ឆ្នាំងជាច្រើននាក់ កាលពីរសៀលថ្ងៃទី៥ តុលា ឆ្នាំ២០២៦ បាននាំគ្នាមកតវ៉ា និងសំណូមពរដល់អភិបាលខេត្ត ស្នើសុំបញ្ឈប់ការឱ្យលេងការប្រគំតន្ត្រី (ខនសឺត) ខណៈដែលជុំវិញបរិវេណសួនច្បារវិមានឯករាជ្យក្រុមហ៊ុនកំំពុងតែញាប់ដៃជើងដំឡើងស្តង់លក់ទំនិញច្រើនប្រភេទ និងមួយវិញទៀត សំណូមពរឲ្យរៀបចំសណ្ដាប់ធ្នាប់ជុំវិញបរិវេណផ្សារលើ ។
ក្រុមអាជីវករទាំងនោះបានលើកឡើងថា ខនសឺតដែលបានមកលេងម្ដងៗបានដំឡើងស្តង់លក់ដូរអីវ៉ាន់គ្រប់ប្រភេទ ស្ទើរតែមួយខែ ខនសឺតមកលេង២ដង ហើយក្នុង១ដងយ៉ាងតិចមួយសប្តាហ៍ ពិសេស ក្នុងខែបុណ្យទាន ។ ក្រុមអាជីវករទាំងនោះលើកឡើងថា នៅរដូវបុណ្យទាន បុណ្យដាក់បិណ្ឌ និងភ្ជុំបិណ្ឌនេះ ពួកគាត់ខំចងការប្រាក់ ទិញអីវ៉ាន់មកដាក់លក់ដូរ ប៉ុន្តែប្រសិនបើមានខនសឺត ពួកគាត់លក់មិនដាច់ដើរពួកគាត់សង្ឃឹមអី ។ អាជីវករម្នាក់ៗស្ទើរដាច់បាយហើយ ព្រោះចម្ងាយស្តង់លក់ដូររបស់ខនសឺត និងផ្សារលើប្រហែល៥០ម៉ែត្រពីគ្នាតែប៉ុណ្ណោះ ។
មួយវិញទៀត ពេលមានការប្រគំតន្ត្រីម្ដងៗ សួនច្បារវិមានឯករាជ្យ បានរងផលប៉ះពាល់ដូចជាការបន្ទោរបង់ ចាក់ទឹកលាងចាន លាងដៃ និងខ្ទេចស្មៅក្នុងបរិវេណសួនច្បារផងដែរ ។ ក្រុមអាជីវករផ្សារលើក៏បានសំណូមពរដល់អាជ្ញាធរខេត្តកំពង់ឆ្នាំង ជួយរៀបចំសណ្ដាប់ធ្នាប់ជុំវិញផ្សារលើផង ព្រោះមានអាជីវករមិនព្រមចូលលក់ដូរទីកន្លែងខ្លួននៅខាងក្នុងផ្សារទេ មកលក់ខាងក្រៅតាមថ្នល់ មិនត្រឹមតែធ្វើឱ្យបាត់បង់សណ្ដាប់ធ្នាប់ប៉ុណ្ណោះទេ ធ្វើឱ្យអ្នកដែលលក់ដូរខាងក្នុងដែលមិនហ៊ានចេញក្រៅក៏លក់មិនដាច់ដែរ ។
ចំណុចនេះ កោះសន្តិភាពធ្លាប់ផ្សាយ១លើកជា២លើកមកហើយ ជុំវិញករណីការលក់ដូរគ្មានសណ្ដាប់ធ្នាប់ជុំវិញផ្សារលើ ដែលចុះរៀបម្ដងៗមិនបានមួយចំអិនកំពឹស រួចក៏ត្រឡប់មកលក់ដូរវិញដដែល ។ ក្រុមអាជីវករបានបញ្ជាក់ទៀតថា សុំបញ្ឈប់បិទមិនឱ្យលេងខនសឺតនៅយប់នេះតែម្ដង ។
លោក ខឹម នឿន នាយករងរដ្ឋបាលសាលាខេត្តកំពង់ឆ្នាំងបានបញ្ជាក់ថា ក្រោយមានបញ្ហានេះ រដ្ឋបាលសាលាខេត្តបានអនុញ្ញាតឲ្យអាជីវករប្រមាណ១០នាក់ចូលជួបពិភាក្សា និងដោះស្រាយ ។ ជាលទ្ធផល លោកបានបញ្ជាក់ថា ខាងសាលាខេត្តស្នើសុំពន្យារពេល១ថ្ងៃ ដើម្បីសម្របសម្រួលជាមួយក្រុមហ៊ុន (ខនសឺត) ជាលទ្ធផលរង់ចាំថ្ងៃស្អែក ។
ជុំវិញបញ្ហាអាជីវករលក់ដូរជុំវិញផ្សារ កន្លងមក ខាងសាលាក្រុងធ្លាប់អនុវត្ត១លើកជា២លើកមកហើយ តែមិនទទួលជោគជ័យ មិនមែនថា មិនគិតគូរនោះទេ ដោយហេតុនេះ ខាងសាលាខេត្ត និងរៀបចំប្រជុំបង្កើតគណៈកម្មការថ្នាក់ខេត្ត ដើម្បីរៀបចំសណ្ដាប់ធ្នាប់ជុំវិញផ្សារលើឡើងវិញ ។ ក្រោយស្ដាប់ការបកស្រាយរួចមក តំណាងអាជីវករទាំងនោះ ក៏ទទួលយល់ព្រម និងបានវិលត្រឡប់ទៅផ្ទះវិញ ៕
ចែករំលែកព័តមាននេះ