ពិនិត្យតាមដាន និងវាយតម្លៃពីដំណើរការលក់ដូរនៅ «ផ្សារបក្សី» ក្នុងខេត្តតាកែវ
- តាកែវ
ខេត្តតាកែវ៖ នៅថ្ងៃទី៥ ខែតុលា ឆ្នាំ២០២៦ ការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តតាកែវ សហការជាមួយ រដ្ឋបាលក្រុងដូនកែវ ទទួល ស្វាគមន៍យ៉ាងកក់ក្តៅចំពោះដំណើរបំពេញបេសក កម្មអធិការកិច្ច និងទស្សនកិច្ចរបស់ លោកស្រី STEFANIA DINA នាយិកាផ្នែកកសិកម្ម ចំណីអាហារ ធនធានធម្មជាតិ និងអភិវឌ្ឍន៍ជនបទ (AFNR) នៃធនាគារអភិវឌ្ឍន៍អាស៊ី (ADB) ព្រមទាំងគណៈប្រតិភូអមដំណើរ នៅសាលប្រជុំរដ្ឋបាលក្រុងដូនកែវ។
នៅក្នុងជំនួបសំណេះសំណាល និងពិភាក្សាការងារនេះ ភាគីទាំងពីរបានផ្លាស់ប្តូរមតិយោបល់លើកិច្ចសហប្រតិបត្តិការអភិវឌ្ឍន៍វិស័យកសិកម្ម សុវត្ថិភាពម្ហូបអាហារ និងការលើកកម្ពស់ហេដ្ឋារចនាសម្ព័ន្ធក្នុងមូលដ្ឋាន។ បន្ទាប់ពីបានបញ្ចប់កិច្ចភាក្សានៅសាលប្រជុំ ថ្នាក់ដឹកនាំអាជ្ញាធរក្រុង ដែលដឹកនាំដោយ លោក ឌឹម គឹមសាន្ត អភិបាលនៃគណៈអភិបាលក្រុងដូនកែវ រួមជាមួយ លោក ថៃ លី ប្រធានការិយាល័យផលិតកម្ម និងបសុព្យាបាល ខេត្តតាកែវ និង លោកស្រី STEFANIA DINA ព្រមទាំងក្រុមការងារបច្ចេកទេស បានអញ្ជើញចុះពិនិត្យ និងទស្សនកិច្ចផ្ទាល់នៅ «ផ្សារបក្សី» ដែលស្ថិតនៅក្នុងផ្សារធំតាកែវ ខេត្តតាកែវ។
តាមការឱ្យដឹងពីរលោក ថៃ លី ប្រធានការិយាល័យ ផលិតកម្ម និងបសុព្យាបាល ខេត្តតាកែវ ឱ្យដឹងថា ការចុះទស្សនកិច្ចផ្ទាល់ដល់ទីតាំងនេះ ធ្វើឡើងក្នុងគោលបំណង ដើម្បីតាមដាន និងវាយតម្លៃពីដំណើរការលក់ដូរបច្ចុប្បន្នរបស់អាជីវករលក់ដូរសត្វបក្សី និងសាច់សត្វនៅក្នុង «ផ្សារបក្សី»។ ពិនិត្យមើលលទ្ធផលនៃការអនុវត្តគម្រោងដែលទទួលបានការគាំទ្រ និងឧបត្ថម្ភថវិកាពី ធនាគារអភិវឌ្ឍន៍អាស៊ី (ADB) និង ធនាគារវិនិយោគមួយ ។ ពង្រឹងការអនុវត្តបទដ្ឋានអនាម័យ សុវត្ថិភាពម្ហូបអាហារ និងការបង្ការជំងឺឆ្លងផ្សេងៗ ដើម្បីធានាសុខុមាល ភាពរបស់អ្នកបរិភោគ ព្រមទាំងចូលរួមចំណែកលើកកម្ពស់ជីវភាពរស់នៅរបស់អាជីវករ និងប្រជាពលរដ្ឋក្នុងមូលដ្ឋានឱ្យកាន់តែប្រសើរឡើង។
ក្រុមអាជីវករដែលកំពុងលក់ដូរនៅក្នុងផ្សារបក្សី បានបង្ហាញនូវក្តីរំភើបរីករាយ និងសម្តែងនូវអំណរគុណយ៉ាងជ្រាលជ្រៅចំពោះអាជ្ញាធរដែនដី មន្ទីរកសិកម្ម ព្រមទាំងដៃគូអភិវឌ្ឍន៍ ដែលបានយកចិត្តទុកដាក់រៀបចំទីតាំងលក់ដូរឱ្យមានអនាម័យ របៀបរៀបរយ និងមានសុវត្ថិភាព ដែលជួយឱ្យការប្រកបអាជីវកម្មប្រចាំថ្ងៃរបស់ពួកគាត់កាន់តែមានភាពងាយស្រួល និងកើនឡើងនូវប្រាក់ចំណូល ។
គណៈប្រតិភូធនាគារ ADB និងអាជ្ញាធរដែនដី បានសម្តែងនូវការកោតសរសើរចំពោះកិច្ចសហការយ៉ាងជិតស្និទ្ធរវាងស្ថាប័នពាក់ព័ន្ធទាំងអស់ និងបានប្តេជ្ញាបន្តកិច្ចសហប្រតិបត្តិការបន្ថែមទៀត ដើម្បីប្រែក្លាយទីផ្សារក្នុងមូលដ្ឋានឱ្យមានអនាម័យ សុវត្ថិភាព និងបម្រើដល់ការអភិវឌ្ឍសេដ្ឋកិច្ចក្នុងខេត្តតាកែវឱ្យកាន់តែរស់រវើក ៕
ចែករំលែកព័តមាននេះ