ទីក្រុងហូជីមិញ ៖ អអនុស្សរណៈ នៃការយោគយល់គ្នាស្តីពីការអនុវត្តគម្រោងសាងសង់ “សាលាមិត្តភាពកម្ពុជា-វៀតណាម” ដែលជាជំនួយរបស់រដ្ឋាភិបាល និងប្រជាជនវៀតណាម ត្រូវបានចុះហត្ថលេខានៅទីក្រុងហូជីមិញ នារសៀលថ្ងៃទី០៥ ខែតុលា ឆ្នាំ២០២៦ នាទីក្រុងហូជីមិញ សាធារណរដ្ឋសង្គមនិយមវៀតណាម ក្រោមអធិបតីភាពឧត្តមសេនីយ៍ត្រី វ៉ូ វ៉ាន់ឌៀន មេបញ្ជាការយោធាទីក្រុងហូជីមិញ តំណាងឱ្យរដ្ឋាភិបាល នៃសាធារណរដ្ឋសង្គមនិយមវៀតណាម និងលោក ឃួង ស្រេង អភិបាល នៃគណៈអភិបាលរាជធានីភ្នំពេញ តំណាងឱ្យរាជរដ្ឋាភិបាល នៃព្រះរាជាណាចក្រកម្ពុជា នេះបើយោងតាមសេចក្តីរាយការណ៍របស់លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ ពីទីក្រុងហូជីមិញ នៃសាធារណរដ្ឋសង្គមនិយមវៀតណាម នាយប់ថ្ងៃទី០៥ ខែតុលា ឆ្នាំ២០២៦នេះ ។
លោកស្រី បានបន្តថា ថ្លែងក្នុងពិធីចុះហត្ថលេខាដ៏មានអត្ថន័យនេះ ឧត្តមសេនីយ៍ត្រី វ៉ូ វ៉ាន់ឌៀន មេបញ្ជាការយោធាទីក្រុងហូជីមិញ បានគូសបញ្ជាក់ថា រដ្ឋាភិបាល នៃសាធារណរដ្ឋសង្គមនិយមវៀតណាម បានសម្រេចផ្តល់អំណោយនូវគម្រោងសាងសង់អគារថ្មី និងការជួសជុលកែលម្អហេដ្ឋារចនាសម្ព័ន្ធ ដែលមានស្រាប់ក្នុងបរិវេណ “សាលាមិត្តភាពកម្ពុជា-វៀតណាម” រួមមាន៖ ការសាងសង់បន្ទប់សិក្សាថ្មីចំនួន ៨០ បន្ទប់ បន្ទប់ពិសោធន៍ចំនួន ០១ និងបន្ទប់កុំព្យូទ័រចំនួន ០១ សម្រាប់សាលាបឋមសិក្សា, សាងសង់បន្ទប់សិក្សាថ្មីចំនួន ២៤ បន្ទប់ បន្ទប់ពិសោធន៍ចំនួន ០១ បន្ទប់កុំព្យូទ័រចំនួន ០១ សម្រាប់សាលាអនុវិទ្យាល័យ, ជួសជុលបន្ទប់រៀនដែលមានស្រាប់ចំនួន ១៥ បន្ទប់ នៅក្នុងអគារសម្តេចតេជោ, សាងសង់អគារកីឡាពហុបំណងចំនួន ០១ និងអគាររដ្ឋបាលរួមចំនួន ០១ (សម្រាប់សាលាទាំងពីរថ្នាក់) ព្រមទាំងបំពាក់សម្ភារបរិក្ខារចាំបាច់មួយចំនួនទៀតសម្រាប់បម្រើដល់ការបង្រៀន និងរៀនរបស់លោកគ្រូ អ្នកគ្រូ និងសិស្សានុសិស្សសរុបប្រមាណជាង ៥,៥០០នាក់ ។
ឧត្តមសេនីយ៍ត្រី ក៏បានបន្ថែមទៀតថា គម្រោងនេះនឹងប្រើប្រាស់ថវិកាសរុបចំនួន ៨លានដុល្លារអាមេរិក និងមានរយៈពេលសាងសង់ប្រមាណ ០១ឆ្នាំ ដែលបញ្ជាការដ្ឋានយោធាទីក្រុងហូជីមិញជាអ្នកទទួលបន្ទុកសាងសង់។ ជាមួយគ្នាដែរ ដើម្បីឱ្យគម្រោងអាចដំណើរការទៅដោយរលូន ឧត្តមសេនីយ៍ត្រី ក៏បានស្នើសុំការសម្របសម្រួលពីរដ្ឋបាលរាជធានីភ្នំពេញ លើការងារចាំបាច់មួយចំនួនផងដែរ ។
លោកស្រីអ្នកនាំពាក្យ បានបញ្ជាក់ថា ជាកិច្ចឆ្លើយតប លោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងរាជរដ្ឋាភិបាលកម្ពុជា តាមរយៈសិទ្ធិប្រទាន បានជម្រាបជូនឧត្តមសេនីយ៍ត្រីថា រដ្ឋបាលរាជធានីភ្នំពេញ បានបំពេញការងារចាំបាច់មួយចំនួនរួចរាល់ រួមមាន៖ ការរុះរើអគារចាស់ ការរៀបចំការដ្ឋាន ការតប្រព័ន្ធទឹក ភ្លើង និងកិច្ចការសំខាន់ៗមួយចំនួនទៀត ដើម្បីបង្កលក្ខណៈងាយស្រួលដល់ដំណើរការ នៃការអនុវត្តគម្រោងសាងសង់នេះ បើទោះបីជាអនុស្សរណៈ នៃការយោគយល់គ្នាលើការអនុវត្តគម្រោងនេះនៅមិនទាន់បានចុះហត្ថលេខាក៏ដោយ។ ហើយលោកផ្ទាល់ ក៏ដូចជារដ្ឋបាលរាជធានីភ្នំពេញ បានត្រៀមលក្ខណៈរួចជាស្រេចសម្រាប់ជួយជំរុញឱ្យដំណើរការ នៃការអនុវត្តគម្រោងអាចប្រព្រឹត្តទៅដោយរលូន និងជោគជ័យតាមការគ្រោងទុក ។
លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានបន្តថា ឆ្លៀតក្នុងឱកាស នៃជំនួបនេះដែរ លោកអភិបាលក៏បានពាំនាំនូវការផ្តាំផ្ញើសាកសួរសុខទុក្ខ សេចក្តីនឹករលឹក និងអំណរសាទរយ៉ាងថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងថ្នាក់ដឹកនាំព្រះរាជាណាចក្រកម្ពុជាគ្រប់លំដាប់ថ្នាក់ ជូនចំពោះ ឧត្តមសេនីយ៍ត្រី ថ្នាក់ដឹកនាំ និងនាយទាហានទាំងអស់ នៃបញ្ជាការដ្ឋានយោធាទីក្រុងហូជីមិញ ក្នុងឱកាសនៃការអបអរសាទរខួបលើកទី ៨១ នៃទិវាបុណ្យជាតិវៀតណាម ដែលបានប្រារព្ធឡើងកាលពីថ្ងៃទី០២ ខែកញ្ញា ឆ្នាំ២០២៦ កន្លងទៅនេះ ដើម្បីរំលឹកដល់ថ្ងៃប្រវត្តិសាស្ត្រនៃការទទួលបាននូវឯករាជ្យភាពរបស់សាធារណរដ្ឋសង្គមនិយមវៀតណាម ដែលជាពេលវេលាដ៏មានសារៈសំខាន់ បញ្ជាក់ពីគំរូវីរភាពដ៏អង់អាចរបស់ថ្នាក់ដឹកនាំ និងនាយទាហានវៀតណាមគ្រប់ជាន់ថ្នាក់ក្នុងការថែរក្សាការពារនូវឯករាជ្យភាព និងអធិបតេយ្យភាពសម្រាប់ប្រទេស និងប្រជាជាតិរបស់ខ្លួន ៕
ចែករំលែកព័តមាននេះ