អន្តរជាតិ ៖ បន្ទាប់ពីកិច្ចប្រជុំ កាលពីថ្ងៃទី៤ ខែតុលា ឆ្នាំ២០២៦ អង្គការនៃប្រទេសនាំចេញប្រេង និងប្រទេសជាដៃគូ OPEC+ បានព្រមព្រៀងគ្នារក្សាកម្រិតផលិតកម្មប្រេងសម្រាប់ខែវិច្ឆិកាឱ្យនៅថេរដដែល។ ការសម្រេចនេះ គឺស្របទៅនឹងការព្យាករណ៍របស់អ្នកសង្កេតការណ៍ដែលថា OPEC+ នឹងមិនធ្វើការកែសម្រួលណាមួយឡើយ រហូតដល់ដើមឆ្នាំ ២០២៧។ នេះបើតាមការចេញផ្សាយពី Reuters ។
សមាជិកស្នូលចំនួន ៧ រួមមាន អារ៉ាប៊ីសាអូឌីត រុស្ស៊ី អ៊ីរ៉ាក់ កូវ៉ែត អាល់ហ្សេរី កាហ្សាក់ស្ថាន និងអូម៉ង់ ព្រមទាំងបណ្តាប្រទេសសម្ព័ន្ធមិត្ត រួមទាំងរុស្ស៊ីផងនោះ បានធ្វើការសម្រេចចិត្តលើទិន្នផលប្រេង សម្រាប់ខែវិច្ឆិកា នៅក្នុងកិច្ចប្រជុំតាមប្រព័ន្ធអនឡាញដ៏ខ្លីមួយកាលពីថ្ងៃអាទិត្យ។
បណ្តាប្រទេសផលិតប្រេងនៅតំបន់ឈូងសមុទ្រនៃក្រុម OPEC+ បាននឹងកំពុងបូមប្រេងក្នុងកម្រិតមួយទាបជាងគោលដៅផលិតកម្មច្រើន ដោយសារតែការបន្តភាពរអាក់រអួលលើការនាំចេញ ដែលបណ្តាលមកពីសង្គ្រាមសហរដ្ឋអាមេរិកជាមួយអ៊ីស្រាអែល ប្រឆាំងនឹងអ៊ីរ៉ង់ ធ្វើឱ្យមានការប្រែប្រួលក្នុងរង្វង់ពី ៦០% ទៅដល់ ៨០% នៃកម្រិតធម្មតា នៅក្នុងរយៈពេលប៉ុន្មានខែថ្មីៗនេះ។
លោក Giovanni Staunovo អ្នកវិភាគនៅធនាគារ UBS បានលើកឡើងថា ចំណាត់ការ OPEC+ បានបង្ហាញថា ទោះបីជាលំហូរប្រេងឆ្លងកាត់ច្រកសមុទ្រហ័រមូស (Hormuz) មានការកើនឡើងក៏ដោយ ក៏ផលិតកម្មជាក់ស្តែងរបស់ពួកគេ នៅតែមានកម្រិតទាបជាងកូតាកំណត់ ហើយម្យ៉ាងទៀត មកពីទីផ្សារប្រេងនៅតែមានសភាពតឹងតែងនៅឡើយ។
តម្លៃប្រេងបានធ្លាក់ចុះបន្តិច កាលពីថ្ងៃសុក្រសប្តាហ៍មុន បន្ទាប់ពីបណ្តាមេដឹកនាំអឺរ៉ុបបានយល់ព្រមតាមសំណើរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ក្នុងការបញ្ចេញប្រេងម៉ាស៊ូតពីឃ្លាំងបម្រុង។ ទោះជាយ៉ាងណាក៏ដោយ ប្រេងឆៅប្រភេទ Brent ស្តង់ដាអន្តរជាតិ នៅតែមានតម្លៃលើសពី ១០០ ដុល្លារអាមេរិកក្នុងមួយបារ៉ែលដដែល ពោលកើនឡើងពីប្រហែលត្រឹម ៧៣ ដុល្លារ មុនពេលសង្គ្រាមអ៊ីរ៉ង់បានចាប់ផ្តើមកាលពីចុងខែកុម្ភៈ។
គិតត្រឹមម៉ោង ២:២៥ រសៀលថ្ងៃទី៥ ខែតុលា (ម៉ោងនៅកម្ពុជា) តម្លៃប្រេងឆៅ Brent ឈរនៅតម្លៃ ១០១ ដុល្លារក្នុងមួយបារ៉ែល ចំណែកប្រេងឆៅ WTI របស់សហរដ្ឋអាមេរិក តម្លៃ ៨៩,៩៤ ដុល្លារ៕
ចែករំលែកព័តមាននេះ