ទីក្រុងសាណា៖ ដើម្បីកុំឱ្យគេថាឃើញខ្លាក្រាបថាខ្លាសំពះ ពេលនេះ រដ្ឋាភិបាលយេម៉េនដែលសម្ងំស្ងៀមមិនមាត់មិនកជាយូរមកហើយនោះប្រកាសបើកប្រតិបត្តិការរញ្ជួយមេឃដើម្បីចាត់ការក្រុមឧទ្ទាមហ៊ូទីដែលជាសម្ព័ន្ធមិត្តរបស់អុីរ៉ង់។ មែនទែនទៅ ពួកហ៊ូទីថ្វីដ្បិតជាចលនាប្រដាប់អាវុធដែលមិនត្រូវបានទទួលស្គាល់ដោយសហគមន៍អន្តរជាតិក៏ពិតមែន ប៉ុន្តែពួកគេមានកម្លាំងយោធាខ្លាំងមិនធម្មតា ពោលគឺពួកគេគ្រប់គ្រងទឹកដីមួយផ្នែកធំនៅយេម៉េន។ ចាំមើលមើល ក្រោយសេចក្ដីប្រកាសរបស់រដ្ឋាភិបាលទីក្រុងសាណាដែលមានអារ៉ាប៊ីសាអូឌីតជួយជ្រោមជ្រែងពីក្រោយខ្នងផងនោះអាចចាត់ការក្រុមហ៊ូទីបានកម្រិតណា?
ទីភ្នាក់ងារព័ត៌មានអេភី (AP) ផ្សាយថារដ្ឋាភិបាលយេម៉េនប្រកាសបើកប្រតិបត្តិការសឹកទ្រង់ទ្រាយធំលើក្រុមហ៊ូទីព្រោះមើលស្ថានភាពហាក់ដូចជាមិនសូវស្រួល។ ក្រុមនេះកាន់តែវាយប្រហាររន្ថើនចូលដល់តំបន់ខ្សែក្រវាត់ក្រុងសំខាន់ៗទៅហើយ។ លោករ៉ាសាត អាល់ អាលីមី (Rashad al-Alimi) ជាប្រធានក្រុមប្រឹក្សារដ្ឋ និងជាប្រធានាធិបតីយេម៉េន។ លោកប្រកាសសង្គ្រាមទល់នឹងពួកហ៊ូទីនៅពេលហ៊ូទីវាយដល់តំបន់ខ្សែក្រវាត់ក្រុងតាអុីស (Taiz)។ លោកថ្លែងពីប្រទេសអារ៉ាប៊ីសាអូឌីតថាប្រតិបត្តិការសឹកលើកនេះមានគោលដៅវាយដណ្ដើមយកមកវិញនូវទឹកដីដែលពួកហ៊ូទីកាន់កាប់។ ពួកគេវាយយកបានទីតាំងច្រើនណាស់កាលពីខែកញ្ញាកន្លងទៅនេះដោយរឹបអូសបានតំបន់ដីសណ្ដតាមមាត់សមុទ្រក្រហម និងច្រកសមុទ្របាបអែលមេនដេប (Bab el-Mandeb Strait)។
លោកអាល់អាលីមីសូមឆ្លៀតឱកាសនេះអំពាវនាវទៅសហគមន៍អន្តរជាតិជួយជ្រោមជ្រែងរដ្ឋាភិបាលរបស់លោកផង។ ក្រុមហ៊ូទីបើកការវាយប្រហារទ្រង់ទ្រាយធំកាលពីប៉ុន្មានថ្ងៃមុននេះប្រឆាំងនឹងកងទ័ពរដ្ឋាភិបាលយេម៉េន និងសម្ព័ន្ធមិត្តរបស់រដ្ឋាភិបាលយេម៉េននៅតំបន់ខ្សែក្រវាត់ក្រុងតាអុីស ជាហេតុធ្វើឱ្យមានការរំខានយ៉ាងខ្លាំងសម្រាប់ដងវិថីដ៏ធំមួយខ្សែដែលតភ្ជាប់ទីក្រុងនេះទៅទីក្រុងកំពង់ផែអេដែន (Aden)។ ទីនោះជាតំបន់ស្លាប់រស់របស់រដ្ឋាភិបាលយេម៉េន។ ក្រុមហ៊ូទីបានឡោមព័ទ្ធទីក្រុងតាអុីសអស់រយៈពេលជាងមួយទសវត្សរ៍មកហើយ។
កាលពីមុននេះ ក្រុមហ៊ូទីប្រកាសថាមានការវាយប្រហារទៅលើរដ្ឋធានីសាណា។ ពួកគេនិយាយដោយខ្លីតែត្រឹមនេះដោយមិនផ្ដល់សេចក្ដីលម្អិតទេ។ កងទ័ពយេម៉េនដែលគាំទ្រដោយអារ៉ាប៊ីសាអូឌីតប្រកាសថាការវាយប្រហារនោះជាស្នាដៃរបស់ខ្លួនសំដៅទីតាំងសំខាន់ៗនៅរដ្ឋធានី និងខេត្តសាដា (Saada) នៅជាប់នឹងព្រំដែនអារ៉ាប៊ីសាអូឌីត។ សង្គ្រាមនៅយេម៉េនដែលស្ងប់ស្ងាត់អស់បួនឆ្នាំតាមរយៈបទឈប់បាញ់នោះចាប់ផ្ដើមកម្រើករំពើកសាជាថ្មី លើកនេះរឹតតែខ្លាំងជាងពេលណាៗទាំងអស់។
អ្នកនាំពាក្យក្រុមហ៊ូទី លោកយ៉ាស់យ៉ា សារី (Yahya Saree) ថ្លែងថាក្រុមរបស់លោកបាញ់មីស៊ីល និងបញ្ជូនដ្រូនទៅវាយប្រហារទីតាំងប្រេងឆៅរបស់អារ៉ាប៊ីសាអូឌីត។ លោកថ្លែងនៅក្នុងខ្សែអាត់វីឌីអូថាក្រុមរបស់លោកវាយវាយប្រហារទីតាំងប្រេងរបស់ក្រុមហ៊ុនអារ៉ាំកូ (Aramco) ដែលជាក្រុមហ៊ុនរបស់រដ្ឋអារ៉ាប៊ីសាអូឌីតស្ថិតនៅរាជធានីរីយ៉ាត និងវាយប្រហារទីតាំងនៅគូរ៉ាអុីស (Kurais)។ អ្នកនាំពាក្យរូបនេះនិយាយដោយសង្ខេបៗ ដោយមិនបានបញ្ជាក់ថាការវាយប្រហារនោះកើតឡើងនៅពេលណាទេ។ ប៉ុន្តែកាលពីថ្ងៃសៅរ៍ មានការឆាបឆេះរោងចក្រចម្រាញ់ប្រេងរបស់ក្រុមហ៊ុនអារ៉ាំកូ៕ ប្រភព៖ AP
ចែករំលែកព័តមាននេះ