ម្តាយយកកូនជាង២ខួប មកផ្ញើសន្តិសុខ ប្រាប់ថា «សុំផ្ញើមួយភ្លែត» បែរជាទៅបាត់ឈឹង រហូតផ្អើ.លដល់អាជ្ញាធរ
- ភ្នំពេញ
រាជធានីភ្នំពេញ ៖ ក្មេងស្រីអាយុប្រហែលជាង២ខួប ត្រូវបានស្ត្រីជាម្តាយយកមកផ្ញើនឹងសន្តិសុខម្នាក់តាំងពីល្ងាចដល់យប់ មិនឃើញមកយកវិញ ត្រូវបានសន្តិសុខរាយការណ៍ជូនអាជ្ញាធរមូលដ្ឋានមកទទួលយកទៅថែរក្សា ។
ហេតុការណ៍ខាងលើនេះ បង្កឲ្យមានការភ្ញាក់ផ្អើលកើតឡើងកាលពីវេលាម៉ោង៩យប់ថ្ងៃទី២ ខែតុលា ឆ្នាំ២០២៦ នៅចំណុចទល់មុខ ឃ្លាំងមួយកន្លែង តាមបណ្ដោយផ្លូវចាក់សំរាមស្ទឹងមានជ័យចាស់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
តាមប្រភពពីបុរសជាសន្តិសុខយាមនៅទល់មុខឃ្លាំងខាងលើសុំមិនបញ្ចេញឈ្មោះបានអោយដឹងថា មុនពេលកើតហេតុ ខណៈរូប គាត់កំពុងតែធ្វើការងារដូចសព្វដង លុះនៅវេលាម៉ោងប្រហែល៤ល្ងាច ស្រាប់តែមានស្ត្រីម្នាក់បានដើរមក ដោយយកកូនស្រីខាង លើ និងមានបង្វិចថង់មួយ ហើយប្រាប់គាត់ថា សុំផ្ញើកូនមួយភ្លែត តែមិនបានប្រាប់ហេតុផលនោះទេ បន្ទាប់មកស្ត្រីរូបនោះក៏បានចេញទៅបាត់ ។
តាមប្រភពដដែលបន្តទៀតថា លុះពេលចាំបាត់ៗ មិនឃើញស្ត្រីជាម្តាយមកយកកូនវិញ ទើបបុរសជាសន្តិសុខយាមនៅទីតាំងខាង លើបានរាយការណ៍បន្តជូនអាជ្ញាធរ និងសមត្ថកិច្ចមូលដ្ឋានអោយចុះមកកាន់ទីតាំងកើតហេតុ ។
ក្រោយកើតហេតុ អាជ្ញាធរមូលដ្ឋានសង្កាត់ស្ទឹងមានជ័យទី២ បានចុះមកទទួលយកក្មេងស្រីខាងលើទៅថែរក្សា រង់ចាំស្វែងរកសាច់ញាតិឱ្យមកទទួលយក តែបើក្នុងករណីរកមិនឃើញ អាជ្ញាធរនឹងប្រគល់ជូនទៅខាងមន្ទីរសង្គមកិច្ច និងអតីតយុទ្ធជន ដើម្បីយកទៅបីចាច់ថែរក្សា ៕
ចែករំលែកព័តមាននេះ