ខេត្តកណ្ដាល ៖ នៅថ្ងៃទី២ ខែតុលា ឆ្នាំ២០២៦ សមត្ថកិច្ចនគរបាលខេត្តកណ្ដាល បានចុះសហការជាមួយនគរបាលស្រុកអង្គស្នួល និងមានកម្លាំងជំនាញមកពីក្រសួងមហាផ្ទៃ អង្គភាពការពារកុមារ (CPU) និងការិយាល័យស៊ើបអង្កេត សន្តិសុខមាតុភូមិ នៃស្ថាន ទូតអាមេរិក ហៅកាត់ថា HSI ក្រោមការសម្របសម្រួលពីស្ថាប័នអយ្យការអមសាលាដំបូង ផងដែរ បានធ្វើការឃាត់ខ្លួនអ្នកបើកបររថយន្តម្នាក់ ជាអ្នកដឹកសិស្សសាលាឯកជនមួយកន្លែង ស្ថិតនៅភូមិបឹង ឃុំសំរោងលើ ស្រុកអង្គស្នួល យកទៅសាកសួរ តាមពាក្យបណ្តឹងរបស់អាណាព្យាបាលសិស្សពាក់ពន្ធករណី.បៀតបៀនផ្លូវភេទលើកុមារី សិស្សសាលា ចំនួន៣នាក់ និងបង្កប់កាមេរ៉ានៅក្នុងបន្ទប់ទឹក លួចថតសិស្សចេញចូលបត់ដៃបត់ ជើងជាច្រើននាក់ ។
នៅមុននេះបន្តិច ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីប្រកាសព័ត៌មាន ដោយមានខ្លឹមសារទាំងស្រុងថា “ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមជម្រាបជូនសាធារណជនមេត្តាជ្រាបថា ថ្មីៗនេះមានបណ្តាញសង្គមមួយចំនួនបានបង្ហោះផ្សព្វផ្សាយជាបន្តបន្ទាប់មានខ្លឹមសារថា ៖ ដល់ករ ! តៃកុងឡានសាលាឯកជនម្នាក់ បានបៀតបៀនកេរ្តិ៍ខ្មាស់ លើសិស្សសាលាជាកុមារីជាង៤០នាក់ នៅខេត្តកណ្តាល ។
យោងតាមសំណើរសុំកិច្ចប្រតិបត្តិការស៊ើបអង្កេតរបស់អង្គភាពការពារកុមារ (CPU) ពាក់ព័ន្ធករណីផលិតកាន់កាប់រូបភាព សម្ភារៈអាសអាភាសកុមារ និងរំលោភសេពសន្ថវៈមានស្ថាន ទម្ងន់ទោសទាក់ទងនឹងជនរងគ្រោះ ។ ក្រោយពីទទួលបានសំណើរខាងលើភ្លាម ដោយមានការសម្របសម្រួលពីលោក លាង អ៊ូ ព្រះរាជអាជ្ញារង នៃអយ្យការអមសាលាដំបូងខេត្តកណ្តាល លោកឧត្តមសេនីយ៍ទោ ឈឿន សុចិត្ត ស្នងការរនគរបាលខេត្តកណ្តាល ចាត់ឱ្យកម្លាំង នៃការិយាល័យប្រឆាំងការជួញដូរមនុស្ស និងការពារអនីតិជន ដឹកនាំដោយលោកវរសេនីយ៍ឯក ឡុង សាវុធ ស្នងការរង សហការជាមួយកម្លាំងនគរបាល នៃអធិការដ្ឋាននគរបាលស្រុកអង្គស្នួល បានចុះស្រាវជ្រាវស៊ើបអង្កេតជាលទ្ធផល ៖
ករណី ៖ ផលិតកាន់កាប់រូបភាព សម្ភារៈអាសអាភាសកុមារ និងរំលោភសេពសន្ថវៈមានស្ថានទម្ងន់ទោសទាក់ទងនឹងជនរងគ្រោះ ។
ថ្ងៃខែកើតហេតុ ៖ អំឡុងខែកក្កដា ឆ្នាំ២០២៥ និងខែសីហា ឆ្នាំ២០២៦ ។
ទីកន្លែងកើតហេតុ ៖ សាលាអន្តរជាតិ ខ.ព.ភ.ប.ញ ទីតាំងនៅភូមិបឹង ឃុំសំរោងលើ ស្រុកអង្គស្នួល ខេត្តកណ្តាល ។
ជនរងគ្រោះចំនួន០៣នាក់ (កុមារី) ។
ជនសង្ស័យ០១នាក់ ឈ្មោះ ស៊ឹម សុគា ភេទប្រុស អាយុ៣៥ឆ្នាំ ជនជាតិខ្មែរ មុខរបរ អ្នកបើករថយន្ត មានទីលំនៅភូមិព្រៃសំរោង ឃុំបែកចាន ស្រុកអង្គស្នួល ខេត្តកណ្តាល។
ធ្វើតេស្តទឹកនោមរកសារធាតុញៀនលទ្ធផល អវិជ្ជមាន (-)
វត្ថុតាងចាប់យករួមមាន ៖
-ទូរសព្ទ០១គ្រឿង ម៉ាក OPPO A3X ពណ៌ឈាមជ្រូក។
-រថយន្ត ចំនួន ០២គ្រឿង
១.ម៉ាក រ៉េហ្វ ពណ៌ឈាមជ្រូក ផលិតឆ្នាំ១៩៩៧ ពាក់ផ្លាកលេខ ភ្នំពេញ 2O-1945។
២.ម៉ាក ស៊ាំយ៉ុង ពណ៌ស ផលិតឆ្នាំ(មិនស្គាល់) ពាក់ផ្លាលលេខ ភ្នំពេញ 2DI-0427 ។
នៅចំពោះមុខសមត្ថកិច្ច ជនសង្ស័យខាងលើ បានសារភាពថា ខ្លួនពិតជាបានប្រព្រឹត្តសកម្មភាពខាងលើពិតប្រាកដមែន ។
បច្ចុប្បន្នជនសង្ស័យរួមទាំងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី ៕
ចែករំលែកព័តមាននេះ